ميكانزمات...

كبت :

-عارف يعني إيه تكون الدنيا كلها عبارة عن مراية كبيرة بتعكس آلامك بوضوح ؟ حتي الحاجة الوحيدة اللي فيها دوا لجراحك...
غصب عنك لازم تهرب ، حتي لو مش عايز تهرب...

تكوين عكسي :

-عارف يعني إيه تكره حد لدرجة انك تحبه بجنون غريب ، عشان بس مش قادر تتحمل فكرة إنك تكرهه...
-يعني إليسا طلعت خريجة اداب علم نفس ؟ !

نكوص :

-عارف ، ساعات بحس ان كل الناس عندها ميل غريزي للنكوص ، الكل نفسه يرجع لأيام الأمان و الدفا.
-مش ضروري ، مش كل الناس كانت طفولتها أمان و دفا ، انا اعرف ناس كبرت و عجزت قبل الأوان عشان تهرب من طفولتها.
-بس عند مرحلة معينة هايرجعوا لنقطة البداية ، صدقني محدش بيقدر يهرب من ماضيه ، لو مرجعتش لماضيك ، هايرجعلك...

تبرير :

-دي من الأوقات القليلة اللي بصارح فيها نفسي بالحقيقة ، انا مش ندل ، انا عندي أزمة في التواصل مع الناس ، بس لو اتقال عليا ندل أحسن ما يتقال عليا انعزالي.

-بس دي تبريرات مالهاش معني.

-بالنسبالك ، انما بالنسبالي الندالة دي مرحلة متقدمة بتمني أوصلها فعلياً ، الندالة معناها اني تجاوزت مرحلة التواصل مع الناس لمرحلة التخاذل مع الناس.

-امممم.

-هوا انا سبق و قولتلك ان تخييب أمالِك فيا كان هوايتي المفضلة طول الفترة اللي فاتت ؟

-لأ ، بس انت مش محتاج تقول.

تعميم :

-عارفة احنا ليه بقينا نخاف من الناس الودودين زيادة عن اللزوم ؟ عشان النصابين دايماً بيستغلوا النقطة دي في البني آدم.

-أيوة بس دي بقت موضة قديمة أوي في النصب ، دلوقتي في طرق أحدث بكتير ، النصب اتقدم عن زمان.

-بس انا مقصدش النصب المادي ، انا قصدي النصب الشعوري ، الاحتيال علي عواطف الناس.

-و انت بقا حد نصب عليك في مشاعرك قبل كده ؟

-للأسف لأ ، أنا مش بالعمق ده ، بس اتنصب عليا في فلوسي كتير.

تعويض :

-فكرك انا اساسا بعرف اكتب ؟ فكرك اني اتولدت وانا عندي موهبة ؟ دي مجرد تعويض ، زي بالظبط الأعمي اللي سمعه بيقوي عشان يعرف يعيش ، انا خايف لو اتعالجت معرفش اكتب تاني بنفس العمق ، أصل المعاناة دي بتخلي الواحد متغلغل في كل شئ ، قادر يحس بجمال أبسط الحاجات اللي ممكن غيره ميحسهاش ، انشالله حتي لو نسمة الهوا اللي بيسيبها المترو وراه.
-بس مفيش حاجة أبداً تساوي انك تكون انسان طبيعي.
-و مين قال اني عايز ابقا طبيعي ؟

المفتاح...