الجمعة، 24 فبراير، 2012

ميكانزمات...



كبت :

-عارف يعني إيه تكون الدنيا كلها عبارة عن مراية كبيرة بتعكس آلامك بوضوح ؟ حتي الحاجة الوحيدة اللي فيها دوا لجراحك...
غصب عنك لازم تهرب ، حتي لو مش عايز تهرب...

تكوين عكسي :

-عارف يعني إيه تكره حد لدرجة انك تحبه بجنون غريب ، عشان بس مش قادر تتحمل فكرة إنك تكرهه...
-يعني إليسا طلعت خريجة اداب علم نفس ؟ !

نكوص :

-عارف ، ساعات بحس ان كل الناس عندها ميل غريزي للنكوص ، الكل نفسه يرجع لأيام الأمان و الدفا.
-مش ضروري ، مش كل الناس كانت طفولتها أمان و دفا ، انا اعرف ناس كبرت و عجزت قبل الأوان عشان تهرب من طفولتها.
-بس عند مرحلة معينة هايرجعوا لنقطة البداية ، صدقني محدش بيقدر يهرب من ماضيه ، لو مرجعتش لماضيك ، هايرجعلك...

تبرير :

-دي من الأوقات القليلة اللي بصارح فيها نفسي بالحقيقة ، انا مش ندل ، انا عندي أزمة في التواصل مع الناس ، بس لو اتقال عليا ندل أحسن ما يتقال عليا انعزالي.
-بس دي تبريرات مالهاش معني.
-بالنسبالك ، انما بالنسبالي الندالة دي مرحلة متقدمة بتمني أوصلها فعلياً ، الندالة معناها اني تجاوزت مرحلة التواصل مع الناس لمرحلة التخاذل مع الناس.
-امممم.
-هوا انا سبق و قولتلك ان تخييب أمالِك فيا كان هوايتي المفضلة طول الفترة اللي فاتت ؟
-لأ ، بس انت مش محتاج تقول.

تعميم :

-عارفة احنا ليه بقينا نخاف من الناس الودودين زيادة عن اللزوم ؟ عشان النصابين دايماً بيستغلوا النقطة دي في البني آدم.
-أيوة بس دي بقت موضة قديمة أوي في النصب ، دلوقتي في طرق أحدث بكتير ، النصب اتقدم عن زمان.
-بس انا مقصدش النصب المادي ، انا قصدي النصب الشعوري ، الاحتيال علي عواطف الناس.
-و انت بقا حد نصب عليك في مشاعرك قبل كده ؟
-للأسف لأ ، أنا مش بالعمق ده ، بس اتنصب عليا في فلوسي كتير.

تعويض :

-فكرك انا اساسا بعرف اكتب ؟ فكرك اني اتولدت وانا عندي موهبة ؟ دي مجرد تعويض ، زي بالظبط الأعمي اللي سمعه بيقوي عشان يعرف يعيش ، انا خايف لو اتعالجت معرفش اكتب تاني بنفس العمق ، أصل المعاناة دي بتخلي الواحد متغلغل في كل شئ ، قادر يحس بجمال أبسط الحاجات اللي ممكن غيره ميحسهاش ، انشالله حتي لو نسمة الهوا اللي بيسيبها المترو وراه.
-بس مفيش حاجة أبداً تساوي انك تكون انسان طبيعي.
-و مين قال اني عايز ابقا طبيعي ؟


12 التعليقات:

ehahe ..soso ..eso iam me :) يقول...

المؤلم ان يكون الابداع حته من الوجع اللى الواحد حاسس بيه
وعجبتنى الحته بتاعه تخييب امالك فيا كان هوايه
هو انت بتكتب كده ازى ^^

richardCatheart يقول...

ومين قال انى عايز ابقى طبيعى :))

لايييييييييييييييييييييييييييييييييييييييك

Israa' A. Youssuf يقول...

عجبني أوي أسلوب السخرية.. مابين إليسا لتخييب الآمال للنصب وغيره..

الظاهر إن الوجع مش ناوي يسيبنا ف حالنا..

قلب ارهقته الاحلام يقول...

جميل جدااااا

ومن منبع الألم دائما يكون الإبداع ...

candy يقول...

ساعات بقى النوع التالت دا بيكتشف أن الحالة اللى هو فيها دى بقت هى "الطبيعى" الناس كلها تحت ضغط مصيبة من مصايب الحياة ..
أو فى وضع سياسى واجتماعى معين بفرض حالة من المعاناه على الناس كلها ..
فبيحزن أنه مش "فيلسوف" لوحده .. وأن تمن المعاناه مش جايب همه .......... بس برضه مش هايعرف يرجع طبيعى

وعلى رأى أحمد خالد توفيق
" كان يعتقد أن بلاهته وعقده فريدة من نوعها...عندما إختلط بالناس أدرك أنه وباء متفش..وقد أصابه هذا بالذعر..كان يظن نفسه متميزا أكثر من هذا...!!"

فافى يقول...

حسنى
بوست لذيذ جدا ووصف مبسط لميكانيزمات الدفاع
بس تعرف يا حسنى مش دايما بنعمل تكوين عكسى فى النقطه دى بالذات لان ممكن نضطر نحب لان الكره مؤلم اوى لكن الحب مهما كان مشاعره جميله

Ali Soliman يقول...

"فكرك انا أساساً بعرف اكتب؟
فكرك انا اتولدت وانا عندى الموهبه؟
............ انا خايف لو اتعالجت معرفش اكتب تانى"
.
.
.
للاسف ..انت جيت على الجرح :(

Saydalanya Mat7oona يقول...

normal is overrated :)

غير معرف يقول...

النصب الشوري والاحتيال علي عواطف الناس اقسي كتير من النصب المادي بيخلي الانسان حريص في مشاعره مع نفسه ومن هم حوله خايف يتنصب عليه تاني وبيكبت مشاعره ويتجاهلها عشان حس انها بقت نقطة ضعفه

غير معرف يقول...

الأكثر وجعا أنه رغم ألمك لا يوجد هناك تعويض.

غير معرف يقول...

تحفة.

غير معرف يقول...

رائع جداً

Share |