شوية فضفضة... D:

بيجبلك دايما في الأفلام ان الوغد مهما كان واطي و شرير بس لازم تلاقيله موضوع حب معين في حياته ، كائن حي يتفاعل معاه عاطفيا عشان لو شحنة العاطفة اللي جواه متفرغتش أول بأول ممكن تأثر علي صورته قدام رجالته أو قدام ضحاياه...

و انطلاقا من افتراض اني وغد قديم أوي خصوصا مع اخواتي ، لفتوا نظري مؤخرا لحاجة مكنتش واخد بالي منها ، و هي ان موضوع الحب بتاعي أو نقطة ضعفي الوحيدة هيا اليمام !!

و ده بيرجع لإن عندنا المنور فيه شبكات حديد مسلح عند كل دور ، و الشبكات دي كانت مأوي لأعشاش اليمام علي مر السنين في بيتنا ، فكان لازم كل سنة بعد ما البيض يفقس الاقي يمامة صغيرة واقعة في المنور ، ساعتها معرفش ليه فعلا كان اهتمامي كله بيتركز عليها ، اجيبلها كل حاجة عندنا ف البيت رز عدس حلبة أي حاجة و افضل أأكل فيها و اشربها مية لحد يجي 3 اسابيع تكون هيا بدأت تحاول تطير و تبقا غلسة متتهدش ف مكان ، ساعتها اطلعها تاني لحد الشبكة في المنور و هيا و نصيبها بقا ، طبعا مع اي حيوان تاني كان زماني رميته ف الشارع بدون تفكير...

لما اخواتي لفتوا نظري للموضوع ده انا طبعا مسكتش ، و بدأت ادور جوا في تاريخي النفسي عن الجذور التاريخية لهذه الخصلة البذيئة... D:

اكتشفت ان الأسباب المحتملة بتنحصر في الآتي :

-من صغري متربي وسط الفراخ و البط ، كنت بحب اقعد اتفرج عليهم و اركز ف كل حركاتهم لحد ما تقريبا حفظتها...

-سبب تاني بردو هوا إني من صغري عندي ميل شديد لقراءة قصص بطوط و عم دهب ، كنت اجيب قصة ميكي من عند الراجل و افضل افر في الصفحات لو ملاقيتش قصة واحدة ع الأقل لبطوط اشوف قصة ميكي غيرها لما يبقا صاحب المحل اتخنق مني...

-سبب آخر بردو هوا إني من صغري عندي حلم معين بيتكرر علي فترات متفرقة بأكتر من شكل بس فكرته واحدة و هيا إني طول الحلم بحاول امسك طير معين جوا بيتنا و يا إما ينتهي الحلم بإني أمسكه أو ممسكوش ساعات و ساعات يعني...

-سبب تاني بردو مالوش علاقة مباشرة بالموضوع بس له دلالة إسقاطية ، و هيا إني من صغري كنت أول ما اشوف طيارة في السما او بس اسمع صوتها افتكر علي طول ان ابويا جه من السفر ، كنت دايما نفسي اسافر معاه ولو مرة ، لدرجة ان اي طيارة وقتها كانت بالنسبالي "بابا" طاير في السما...

دلوقتي انا بقول الكلام ده ليه ؟

بقوله عشان لو ف يوم سيبت دراسة علم النفس و اشتغلت فرارجي محدش يسألني ليه... D:

اقعدوا بالعافية...