الأحد، 25 ديسمبر، 2011

شوية فضفضة... D:


بيجبلك دايما في الأفلام ان الوغد مهما كان واطي و شرير بس لازم تلاقيله موضوع حب معين في حياته ، كائن حي يتفاعل معاه عاطفيا عشان لو شحنة العاطفة اللي جواه متفرغتش أول بأول ممكن تأثر علي صورته قدام رجالته أو قدام ضحاياه...
و انطلاقا من افتراض اني وغد قديم أوي خصوصا مع اخواتي ، لفتوا نظري مؤخرا لحاجة مكنتش واخد بالي منها ، و هي ان موضوع الحب بتاعي أو نقطة ضعفي الوحيدة هيا اليمام !!
و ده بيرجع لإن عندنا المنور فيه شبكات حديد مسلح عند كل دور ، و الشبكات دي كانت مأوي لأعشاش اليمام علي مر السنين في بيتنا ، فكان لازم كل سنة بعد ما البيض يفقس الاقي يمامة صغيرة واقعة في المنور ، ساعتها معرفش ليه فعلا كان اهتمامي كله بيتركز عليها ، اجيبلها كل حاجة عندنا ف البيت رز عدس حلبة أي حاجة و افضل أأكل فيها و اشربها مية لحد يجي 3 اسابيع تكون هيا بدأت تحاول تطير و تبقا غلسة متتهدش ف مكان ، ساعتها اطلعها تاني لحد الشبكة في المنور و هيا و نصيبها بقا ، طبعا مع اي حيوان تاني كان زماني رميته ف الشارع بدون تفكير...
لما اخواتي لفتوا نظري للموضوع ده انا طبعا مسكتش ، و بدأت ادور جوا في تاريخي النفسي عن الجذور التاريخية لهذه الخصلة البذيئة... D:
اكتشفت ان الأسباب المحتملة بتنحصر في الآتي :
-من صغري متربي وسط الفراخ و البط ، كنت بحب اقعد اتفرج عليهم و اركز ف كل حركاتهم لحد ما تقريبا حفظتها...
-سبب تاني بردو هوا إني من صغري عندي ميل شديد لقراءة قصص بطوط و عم دهب ، كنت اجيب قصة ميكي من عند الراجل و افضل افر في الصفحات لو ملاقيتش قصة واحدة ع الأقل لبطوط اشوف قصة ميكي غيرها لما يبقا صاحب المحل اتخنق مني...
-سبب آخر بردو هوا إني من صغري عندي حلم معين بيتكرر علي فترات متفرقة بأكتر من شكل بس فكرته واحدة و هيا إني طول الحلم بحاول امسك طير معين جوا بيتنا و يا إما ينتهي الحلم بإني أمسكه أو ممسكوش ساعات و ساعات يعني...
-سبب تاني بردو مالوش علاقة مباشرة بالموضوع بس له دلالة إسقاطية ، و هيا إني من صغري كنت أول ما اشوف طيارة في السما او بس اسمع صوتها افتكر علي طول ان ابويا جه من السفر ، كنت دايما نفسي اسافر معاه ولو مرة ، لدرجة ان اي طيارة وقتها كانت بالنسبالي "بابا" طاير في السما...
دلوقتي انا بقول الكلام ده ليه ؟
بقوله عشان لو ف يوم سيبت دراسة علم النفس و اشتغلت فرارجي محدش يسألني ليه... D:
اقعدوا بالعافية...

6 التعليقات:

Nelly Adel يقول...

ههههه جميلة
انا كمان موضوع الطيارة اللى بتمثل بابا جه من السفر كان عندى برضو

دامت الفضفضة حتى لا يتق البشر :)

موناليزا يقول...

ابتسم دوما هنا تجبرنى حروف كلماتك على ذلك :)

أنا كمان لما بابا راح يحج كنت كل ما أشوف طيارة افضل أنادى على بابا :)

Saydalanya Mat7oona يقول...

و بعد فترة من الوغوديه المقصوده بإنى ما اسيبش تعليق...نجحت فى إنك تخلينى أسيب واحد

ألا و هو

إبتسامة عريضة :))

هبة فاروق يقول...

حلو قوى البوست وحلو خيالك ونظرتك لليمام ..بس اقدر اسميه ادمان ..او تعلق شديد بالطيور ..فأنا مدمنه مثلك لبعض الاشياء ايضا
بس ادمانك رائع واسلوبك وسردك مرح
تحياتى لك يا فررجى المستقبل

Israa' A. Youssef يقول...

ابتسامة عريضة :)))))))))))))

بس كده
:D

Sara S. Eldafrawy يقول...

عجبنتي أوي فضفضتك.. :)
طريقتك في الكتابة حلوة أوي

Share |