الثلاثاء، ١٣ سبتمبر ٢٠١١

Life updates...



ناس كتير اعرفها لسة مش مدركة اني يدوب بدأت استكشف جمال الحياة من حوالي سنة أو أقل ، ولو أدركوا مظنش هايفهموني كويس بردو...

الأفلام الأجنبي القديمة ، و المسرحيات القديمة و الأبيض و اسود ، رغم اني شوفتها ألف مرة زمان ، بس مؤخراً بدأت احسها ، و اضحك عليها من قلبي كإني بشوفها لأول مرة ، و بحس انهم كانوا ناس فعلاً مبدعين و سابقين عصرهم ، و ان كل الكوميديين بتوع دلوقت سخفا لإن ببساطة بتوع زمان خلصوا الكوميديا كلها ، و جابوا المفيد اللي مفيش بعده حاجة جديدة تتقال...

و ضريبة السعادة البسيطة دي بدفعها من تريقة اخواتي عليا كل ما يشوفوني بتفرج بشغف و فرحة علي حاجة من الحاجات (الحمضانة) دي ، و دايماً علي لسانهم جملة (انت جيت متأخر اوي علي فكرة ، شوفلك كهف اقعد فيه)...

كمان الأغاني القديمة خصوصاً بتاعة عمرو دياب ، و أغاني فيروز اللي لسة لحد دلوقت مبهور بيها و بكتشف فيها كل يوم أغنية جديدة ، و كل حاجة...

أنا جايز فعلاً معشتش الفترة دي ، و جايز المفروض اعيش في العصر الحالي ، بس انا بعرف اميز بروحي كل حاجة جميلة عن كل حاجة سخيفة ، أو علي الأصح بدأت أميز من حوالي سنة أو أقل ، و أدركت اني فعلاً كنت عايش جوا كهف ، أو مغيب عن كل حاجة جميلة في الدنيا...

بدأت احب الموسيقي و افهم ليه الناس بتحبها ، و اسمع مقطوعات من زمن الزمن و تعجبني جداً ، و أقول كانت تايهة عني فين دي ، و ساعتها افهم ليه بيتهوفن و موتسارت اتشهروا...

بدأت احب القراية ، في الأول كنت بحبها لكن مكنتش بتمعن في المعاني و تفضل معلمة في دماغي و مأثرة فيا زي دلوقت...

بدأت احب الشجر و المطر و النسيم و الطبيعة كلها بشكل عام ، و في المقابل بدأت اكره الحر و الرطوبة و اكره صوت الدق اللي جاي من عند النجار اللي تحت شباك اوضتي ، مع اني مكنتش بتدايق في الأول و كنت بعرف اركز و انام عادي وسط الدوشة ، و كنت استغرب لما ابويا يقولي مش عارف انام من الراجل ابن التيييييييييت ده ، واضح اني بدأت ادقق زيه ، و زي كل الناس ، يعني باختصار في مقابل إحساسي بالحاجات الجميلة بدأت احس بالحاجات المزعجة و السخيفة ، بدأت أميز كل شئ عن بعضه...

بدأت استكشف مشاعر جديدة فيا ، بدأت احس بكل جوانب العاطفة البشرية ، صحيح ممرتش بتجربة عاطفية أبداً ولا همر ، بس ع الأقل بقيت اما بشوف اتنين بيحبوا بعض احس بأسبابهم ، قبل كده كنت عامل زي اللي بيسأل نفسه عن السبب اللي بيخلي المدمنين يدمنوا المخدرات ، او ليه المدخنين بيشربوا سجاير و مقتنعين بيها ، و كنت متأكد اني أكيد لو اديت نفسي فرصة التجربة ، هفهم ، بس كان فيا شئ بيمنعني ، و يحاول يأجل إحساسي بكل حاجة جميلة لوقت تاني...

الموضوع زي ما اكون سمحت لنفسي اخيراً باستقبال Updates من الحياة و من كل حاجة حواليا ، لإني فعلاً كنت مغلق تماماً ، و مقتنع بنفسي زي مانا ، مقتنع بالـ(ولا حاجة)...

و في الآخر ، تيجي انت تقولي نهاية العالم قربت ؟!! دانا ملحقتش اتهني يا جدع...

34 التعليقات:

kmhmhgfd يقول...

هههههههههههههههههه
نهيت البوست بجمله دمها خفيف بجد
فى الوست اللى فات كان فى فيرز وده برده فيروز
وهى تستاهل فعلا :)
فى حجات مهما عف وطال عليها الزمن بتفضل برونقها وحلاوتها
يارب دايما سعيد فى الايام اللى جاية :)

Amani يقول...

مبروك عليك الريسيفر الجديد :)
انا كنت زيك بالزبط والحاجة اللي خلتني "اشوف" الحاجات الحلوة حواليا كانت مزيكا الجاز .. جرب اسمع لبوني جيمس :)

candy يقول...

ماهى دى نهاية العالم ...
:)

لما الواحد عينه تتفتحح على جمال كل حاجة فى الحياة ويحس بكل التفاصيل ..
شوية شوية هايحس أن كل الدنيا دى تفصيلة صغيرة من حاجة كبيييييييييرة ..
ويحس بشوق ولوعة أن عينه تتفتح على كل حاجة مرة واحدة ويحس بكلللل المشاعر بكل عمقها فى لحظة واحدة ..

وأعتقد هى دى نهاية العالم ، وبداية الحياة الجديدة اللى هانكتشف فيها قد إيه حياتنا دى كانت صغيرررررة وظل لشىء عظيم

Ramy يقول...

حسنى صديقى العزيز


على فكرة انت متأخرتش لأن دة السن اللى تقدر تبتدى تحس فيه هو دة السن الصح

و يمكن انا ابتديت احس بالموسيقى شوية بدرى علشان والدى و الدتى و ولاد خلاتى (:
كان بيحبوا الموسيقى جداً

بس دة الطبيعى اللى انت فيه

و أستمتع بكل شيىء لأن لسه فى حاجات كتير تستمتع بيها

و ميهمكش النهاية قربت و لا بعدت

الأنسان نهايته مع كل نفس خارج او داخل

سيبها على ربنا

(:

_________________________
I have added cool emoticons to this message.
To see them go to http://x.exps.me?9964217694904afa96c69c5a7dcdc95e

عبد الرحمن سالم يقول...

كلنا ملحقناش نتهنى فعلاً :]

موناليزا يقول...

ياااه
حمدالله على السلامة:)

راء يقول...

ههههههههههههههه

كنا ماشيين حلو لحد اخر سطر..

بجد البوست ده حسسني اني بقالي قرنين تلاتة مجتش هنا...حقيقي الكلام ده !!!

انا كنت هنا من زمان..بس لأول مرة احس انك اتغيرت ..اتغيرت اوي

كان فيه مع الوقت تعديلات بسيطة بلاحظها بس ده سحر اللي يخليك توصل لكده..قولي على عم الشيخ اللي خالاك كده يمكن يعدلني انا كمان D:

ومفيش نهاية عالم..خليه يخلص انا رايحة اعيش ف بلوتو ولا يهمني

Kem يقول...

هو انت عندك كام سنة ؟؟؟
اصل انا عندى 16 سنة و ابتديت احس بالتفاصيل ,
كنت بتريق على ام كلثوم زمان و بقيت بسمعها دلوقتى و فيروز و اسمهان .
بقيت بتأثر بافلام شاهين و هيتشكوك
هو انت اللى متأخر و لا انا اللى جاتلى الحالة دى بدرى ؟؟؟
نا عن نفسى مش فارق معايا الدنيا تخلص ولا لأ
كده عايش فى الدنيا
و كدهون عايش فى الاخرة :))
تحياتى

غير معرف يقول...

بدأت احس بكل جوانب العاطفة البشرية ، صحيح ممرتش بتجربة عاطفية أبداً ولا همر ، بس ع الأقل بقيت اما بشوف اتنين بيحبوا بعض احس بأسبابهم

طالما حسيت يبقى هتمر ان شاء الله

ربنا يسعد ايامك يارب يا حسنى

حاجات كتير بتكون موجوده ومش بنحس بيها الا لما يجى وقتها ونستكشفها ونقول دى كانت غايبه عننا فين
وطول ما احنا عايشين هنستكشف قديم وجديد

بوست جميل
:))

well يقول...

من الاخر بوست جميل لانه فيه معانى من اللى بتلمس الروح الانسانية وتعشش فى الدماغ
على فكرة انا بحب صوت عمرو دياب وفيروز وجات عليا فترة كنت كل يوم اكتشف ليها اغنية
اجمل حاجة انك تميز بروحك بين الحاجة الجميلة والحاجة السخيفة عارف بتحس ان انت نزيه متأثرش فيك فلوس ولا شئ بيلمع لكنه مش طيب
عجبتنى جملة الاستقبال Updates
بجد البوست فيه معانى حلوة
تحياتى

قلب ارهقته الاحلام يقول...

هههههه :)
جميل اوي البوست

ساعات ممكن نعيش عمرنا كله ومنحسش بجمال كل الحاجات ال حوالينا ونشوف الوحش بس

بهنيك علي استقبال ال updates

ويارب يدوم احساسك بكل ماهو جميل

sony2000 يقول...

بالله
حساها حاله نفسيه

كلنا بنمر بيها
تفتكر

دا من ايه؟

مدونة رحلة حياه يقول...

السلام عليكم
كبرت واتغيرت يا حسنى
مراحل الحياة تختلف ويختلف معها فكرك وثقافتك حسب ما تمر به من مواقف فى كل وقت من الاوقات
ربما يكون هذا هو السبب
وربما تكون زيادة قرتك على الاستيعاب والادراك وتحليل الامور
دومت بخير اخى

مذكرات موززه عانس يقول...

ولا هاتمر بقصة حب؟؟؟؟

Ali Soliman يقول...

عندك حق ... وموضعاتك مميزه وقرائتها لذيذه جدا والاسلوب جميل الصراحه

بيسعدنى دائما قرءاه مواضيعك لان فيها اشياء فيا وبعض معتقداتها ههه يمكن مش لوحد اللى عكس الناس كده

وكمان يسعدنى اكون من المتابعين :)

Unknown يقول...

زي ما تيجي...
فيروز دي زي ما تكون بتغني لكل الأجيال بجد ، انا لو عيالي محبوش فيروز هرميهم في الشارع و احرمهم من الميراث ^_^

Unknown يقول...

miya...
الله يبارك فيكي ^_^
انا اللي بدأ معايا كان فيروز و فرقة إيرا ، و حالياً بدأت فعلاً احس بموسيقي الساكسفون و الجاز ، واحدة واحدة كله هايجي ورا بعضه ^_^

Unknown يقول...

كاندي...
طب انا اعمل ايه دلوقت بقا ^_^
انا في الأساس بحاول قدر الإمكان آأجل إحساسي بكل حاجة حاجة حلوة عشان خايف الأحاسيس دي كلها تخلص و افقد اهتمامي و استمتاعي بكل ده ، أنا عارف ان مفيش حاجة كده بس تقدري تقولي عليه خوف مرضي ^_^

Unknown يقول...

راااااامي...
مانا جايز فعلاً متأخرتش ، بس التعليقات اللي بسمعها بتحسسني اني مش متأخر بس لأ دانا جاي من العصر الطباشيري ^_^
أكيد طبعاً انا مسلمها لله ، بس الواحد كل ما بيشوف حاجة تحسسه ان النهاية قربت غصب عنه كده بيفتكر ان لسة في حاجات كتيييير أوي معملهاش ، و ان النهاية دي جاية ف غير وقتها ^_^

Unknown يقول...

ع.سالم...
هتقفلها ف وشي ليه ده بدل ما تقولي تفائل و ابتسم للحياة و كل الكلام الفارغ ده D:

Unknown يقول...

موناليزا...
الله يسلمك ، بس انا رجعت بقالي يجي 3 بوستات فاتوا و ربنا ^_^

Unknown يقول...

رضوي...
هوا في حاجة بتفضل علي حالها ؟ ^_^
بس السؤال بقا هل اتغيرت للأحسن ولا للأوحش ، و ده طبعاً سؤال غبي لإنك بتقولي مين الشيخ اللي خلاك ده و ده معناه اني اتغيرت للأحسن ، هوا انا كان لابسني عفريت ولا ايه D:
علي كل حال ، لما تنوي علي طلعة بلوتو دي ، متنسيش تاخديني معاكي و النبي D:

Unknown يقول...

أغاني الشتاء...
انا من حوالي اسبوع بالظبط قفلت عششين سنة ^_^
و مش عايز احبطك بس 16 سنة دي فيما فوق كانوا اسود أيام حياتي ، انما طبعاً ربنا يسعدك دايماً يا رب ^_^
مين عارف جايز فعلاً انا جاي متأخر ، لإني لحد دلوقت ملقيتش وجهة نظر موحدة من الإخوة المدونين ^_^

Unknown يقول...

الحب الجميل...
ليه الفال ده بس دانا معرفتش حد مرتاح في علاقة أبداً ، لازم تلاقي مشاكل و قلة راحة و قلق دايماً ، لأ ، كده أحسن ^_^
عارفة المشكلة اما اكون شفت الحاجات دي مرة و اتنين و ألف قبل كده ، بس لأول مرة أشوفها من زاوية تانية و افهمها بطريقة تانية ، ساعتها يبقا التغيير حصل فيا انا...

Unknown يقول...

ويل...
كلامك فعلاً وصف الحالة اللي انا فيها احسن من وصفي ، ان فعلاً بقيت بقدر أي حاجة له طابع روحاني أكتر من اي شئ مادي ، بقيت بحس بقيمة الحياة في معني الحياة نفسها...
انا مبسوط ان البوست عجبك ^_^

Unknown يقول...

قلب أرهقته الأحلام...
لو حد عاش حياته من غير ما يحس بجمالها ده اكيد هيروح الجنة طوالي ^_^

Unknown يقول...

سوني...
لو حالة نفسية و هتعدي ، يبقا يا خسارة ، انا نفسي تطول معايا لحد ما اموت ، عشان انا فضلت كتير أوي مش حاسس بحاجة ، و أول مرة احس...

Unknown يقول...

محمد متولي...
انا بردوا بقول انها مرحلة و هتعدي ، بس انا متعديش ، نفسي دي تكون آخر مرحلة في حياتي و اثبت علي كده لحد آخر العمر...
نورتني يا محمد ^_^

Unknown يقول...

بومبونا...
محدش عارف الأيام مخبياله ايه ، وانا لو قولت اني هفضل مصر علي اني مدخلش في علاقة حب ابقا غير جدير بدراستي ، لإني عارف ان الأفكار و النوايا بتتغير في لمح البصر حسب الظروف و المستجدات...
بس هيا الفكرة كلها اني متأكد ان مفيش واحدة ممكن تعبرني ^_^

Unknown يقول...

علي سليمان...
مبسوط بجد ان البوست عجبك و يشرفني بجد انك تكون من متابعين البلوج ^_^
وانا بفرح جداً لما بلاقي حد بيني و بينه نقاط مشتركة...

OldCatLady يقول...

جميــــــــــــــــــل

أنا بتوصف مع وصفك

سلامات من هنا لحد باب بيتكو
:)))

Unknown يقول...

صيدلانية...
جمييييل ، يبقا انا كده ماشي صح D:
سلامات من هنا لحد آخر شارعكوا :)))

هبة يقول...

من فترة قريبة برضه بدأت احس باللي بتقول عليه..وحسيت ان انا قبل كده ما كنتش عايشة خالص..

Unknown يقول...

هبه...
الواحد فعلاً مكانش عايش ، كإنه كان ميت و الله...

Share |