الأربعاء، 21 سبتمبر 2011

ارتباطات شرطية - فيروز



يعني ايه ارتباط شرطي ؟

يعني تبقا متعود تترزع في كافيه ممل مش بيشغل غير كام ألبوم لكام مطرب علي طول ، لدرجة انك لو سمعت أغنية من دول في اي وقت أو أي مكان أول حاجة تيجي علي بالك الكافيه ده...

يعني ببساطة ، كل واحد فينا ليه مواقف معينة صادف فيها أكتر من مثير مع بعض ، و مع تكرار الموقف بيحصل حاجة اسمها "تدعيم الروابط بين المثيرات" ، يعني لو واجهت مثير واحد من الاتنين دول بعد كده يفكرك بالتاني ، و اللي يعرف تجربة بافلوف الشهيرة مش محتاج يقرا كل الرغي اللي فات ده...

فيروز :

-يعني المترو بصفة عامة ، خط حلوان بصفة خاصة ، الكام محطة اللي بيظهر فيهم جبل حلوان من بعيد بصفة أخص ، يعني اتدايق أوي لو ركبت و غلطت في الناحية اللي قعدت فيها بحيث يبقا الجبل ورايا مش قصادي ، و يعني الناس تبصلي باستغراب لما اقوم من مكاني للمكان اللي قصادي عشان اشوف الجبل ، هوا لا جبل ولا حاجة هوا أقرب للهضبة بس بسمعهم بيقولوا عليه كده...
-يعني ريحة المطر من شباك المترو بعد آخر امتحان ترم أول في أولي آداب ، يومها مشيت علي طول و سبت بشوي في الامتحان لإنه بيقعد لآخر الوقت و كل مرة بستناه تحت ، بس المرة دي حسيت انه مش هيتدايق مني ، هو أصلاً عمره ما اتدايق مني و عشان كده بحترمه جداً لإنه مش محبكها معايا و بيعذرني تحت أي ظرف ، بيستحمل صمتي المبالغ فيه ، بيعذرني لو وعدته ف يوم اني نازل الجامعة و اتصل لقاني ف تاسع نومة ، صداقة مناسبة فعلا بالنسبالي لإني مبحبش اللي يقفلها ف كل حاجة من باب اننا "صحاب و عيب أوي اللي بتعمله ده"...

في اليوم ده كان قصادي في المترو 2 أجانب و معاهم طفل صغير ، واحد ماسك خريطة بيمقق عينه فيها و مراته قاعدة بتقرا كتاب...

المطر مع جوز الأجانب دول و موسيقي بحيرة البجع ، كان ناقص ابص من شباك المترو الاقي كام بقرة حلوب تلهو في المراعي الخضراء الشاسعة...

بس طبعاً مش معقول هفضل ساعة بحالها اسمع بحيرة البجع لحد آخر الخط ، غيرتها و شغلت "إداش كان في ناس" مع اني كنت زهقت من كتر ما بسمعها وقتها ، بس لقيتلها طعم تاني في الجو ده...

-يعني أركز علي اللحظة الحالية و استمتع بيها علي أد ما اقدر ، و ارمي الماضي و المستقبل كله ورا ضهري...

-يعني المشي جنب النيل من محطة الأوبرا لحد مكتبة مصر "مبارك سابقاً"...

-يعني مذاكرة ملازم المراجعة النهائية قبل الامتحانات بأسبوعين تلاتة علي صوتها مع مج نسكافيه باللبن أو بلاك لو مفيش لبن...

-يعني لقاء تبرع الدم مع رامي اللي سمعت فيه لأول مرة عن ألبوم "إيه في أمل"...

-يعني احساس داخلي بالرضا و ابتسامة خفيفة جوايا مش ظاهرة علي شفايفي...

9 التعليقات:

zay maTigy يقول...

لحظات مبتتنسيش وبتتحفر جوانا فى ذاكرتنا
ولما نفتكرها بنحس احنا كنا ساعتها ازاااى بالظبط

جمييييل

وجع البنفسج يقول...

امم .. جميلة ..

استمتعت بمروري من هنا ..

دمت بخير.

Ramy يقول...

ههههههههههههه

تصدق كان البوست عاجبنى لحد ما شوفت اسم رامى ده

قعدت اضحك

كويس ان انا ارتباط شرطى مع حاجة كويسة (:

.......

عندك حق يا حسنى

كل واحد فينا عنده أرتباطاته الشرطية دى

(:

norahaty يقول...

فعلا بتحصل معانا
كتير مثلاً ارتباط
عطر معين بأنسان
معين ايضا
(فهمت صح كدا ؟)

mrmr يقول...

ارتباط بلحظات جميله عمرها ما تغيب عن عيونا مهما مرت بينا من صعاب ومشاكل
بس كويس قوى انك بتمر باحاله من الرضا والاستقرار النفسى
سعيده جدا بالبوست يا سحس
كل عام دراسى وانت بخير

ع.سالم يقول...

جميل. رائع !

فافى يقول...

اه انا عارفه نظرية بافلوف ومش محتاجه انى اقرأ كل الرغى ده
وكمان عارفه موضوع المترو وفيروز ده قلته ميت مره خلاص؟؟
ههههههههههههههه
just kidding

غير معرف يقول...

s7sssssssssssssss
3aml a ya waaaaaaaad
enta lsa 3aish :D
p:


shosho0000000

miya يقول...

يعني تصحى كل صبح وتسمع لفيروز ولا جوليا بطرس ،،المهم اغاني لبنانية مرتبة .. وتشم ريحة قهوة مع انك بتشرب شاي .. وبتسمع الناس تقول نسيم الصبح مختلف ويرد الروح والحقيقة انك من باب العمارة لباب السيارة عشان تلحق على المكيف قبل ماتتلسع من الشمس .. ومع كل دا فيه ارتباط شرطي ان الصبح لسه حلو زي مااكل بيقول عنه!

يمكن في مصر بتحسوا بجمال الدنيا عكس عندنا بالسعودية بس اهو عايشين زي مالافلام علمتنا :)

Share |