الجمعة، 16 سبتمبر 2011

زهايمر الأحلام...




بجد الموضوع زاد عن حده...

يعني ايه كل ليلة اشوف احلام و انساها بمجرد ما اصحا ، ينفع كده ؟
المشكلة انها بتكون أحلام طويلة ، أحلام ليها قصة ، أنا بحس بكده ، و بعصر دماغي عشان افتكرها ، و اتغاظ لما اراجع كل اللي درسته عن آلية الأحلام لفرويد و اكتشف ان كل كلامه صح ، عداه العيب و قزح ، بس نسي يقول إن الأحلام قابلة للنسيان ، مكانش العشم يا خواجة...


ساعات بتضرب معايا و افضل ورا الحلم لحد ما افتكر تلميح بسيط ، امسك طرف الخيط ، و بعدها افتكر كل حاجة ، صحيح بتبقا احلام ملهاش تفسير واضح بس اهي في الآخر أحلام ، شوية ساسبنس في حياة الواحد...


انا عارف ان اي تفسير لأي حلم مش هايكون له أهمية بالنسبالي ، لإن غالباً مفيش حاجة مهمة أوي بتحصلي عشان اهتم بتفسير حلم عنها ، بس مش معني كده ان الأحلام تسوء فيها و تنفضلي بالشكل ده...


لو مش هافتكرها يبقا بلاش منها أحسن ، ولا إيه ؟!!

11 التعليقات:

ع.سالم يقول...

للأسف بواجه نفس المشكلة، كإنّك إتفرجت على فيلم ونسيته كله ف الآخر، حاجة تغيظ :D

Ali Soliman يقول...

حقيقى بتحصل كتير بتبقى كأنك بتعيش فى عالم تانى

والمشكله بقه والادهش لما تكون حاسس انه كان واقع مش حلم ولما تفوق تخبط ايدك على راسك وتقول "اووووه" ايه دا هو اللى كنت فيه دا مجرد حلم؟!!

بتوه بعديها وبتوه اكتر انى ماعرفش اضحك على نفسى ولا احزن ههه

sony2000 يقول...

ياريت بجد الواحد بيكون فيها بيعمل حاجه
هي قصه جوا الحلم وبنعيشها

بس اللي بنفتكره ديمن هي الرؤي

حاول علي اد ماتقدر انك تقري قران وتصلي قبل ماتنام
علشان دي احيانا بتكون من الشيطان
علشان يشغل بالك

فاهمني؟

فشكووول يقول...

السلام عليكم
تحياتى
صحيح مستفز
يا عم سيب المخ يحلم ويحلم .. ايه المشكله .. اما انك مستفز بصحيح
ثم ان يا سيدى المخ بيفكر بطريقته وعايز يشوف حل للمشاكل اللى مكركبه فيه وبيحاول يحلها بطريقته ما تسيبه
تحياتى

BNT ELISLAM يقول...

السلام عليكم
انا كمان بتحصلى حاجه زى
بس حمدربنا انى مشبفتكرها يمكن تكون وحشه مثلا
او مفهاش منفعه لانى اوقات بفتكر احلام تانيه
اوقات بنحلم بحاجات ونتمنى اننا نساها فالحمدلله على ربنا يقدره
تحياتى لك

Saydalanya Mat7oona يقول...

لازم يبقى فى حاجة تنكد عليك...حاجة تخليك مستنيها...حتى و إن كان انت اللى بتعملها بدماغك

أووووف....بتخلينى أعلق برضو

مبقتش طريقةدى
:D

norahaty يقول...

السلام عليكم
أن تفتكر كل
حلم بالظبط
والربط:):):)
صعب شوية لكن اعمل
زى ما عملت انا فى
فترة ما من حياتى
حط نوتة وقلم جنب
السرير واول ما تصحى
اثناء الليل او بالصباح
أكتب ما تتذكره ولو كلمة
وبعد كدا اقرا ربما تذكرت
الحلم كله بطريقة (تداعى الأفكار)
بالصور والكلمات

ELMOSTAFZ يقول...

ع.سالم...
و اللي يغيظ أكتر انك بتبقا فاكر انك شفت حاجة أساساً ، يعني لو الواحد ناسي الموضوع كله كان يبقا احسن و اريح D:

ELMOSTAFZ يقول...

علي سليمان...
لأ هوا لا بتضحك ولا بتحزن انتا بتتغاظ بس D:

ELMOSTAFZ يقول...

سوني...
الرؤي دي بتبقا رسالة من ربنا طبيعي و لازم و حتماً نفتكرها :))

ELMOSTAFZ يقول...

فشكووول...
ماهو عشان انا مستفز بقا محبش حاجة تستفزني أبداً و عشان كده تلاقيني دايماً بحب اراقب كل حاجة بتحصل و احب امشيها علي مزاجي :))
اللي اعرفه فعلاً ان الأحلام بتكون طاقة رغبات جوا الواحد و مشاكل متحلتش فالمخ بيفرغ الطاقة دي جوا الحلم...

Share |