الخميس، ٢٤ مارس ٢٠١١

كلام الليل...





الليل حزن و فرح و جنون...
و بنات قمرات حاضنين وردة حبيب...
و شموع في عز الليل تلهلب في نار اشواقهم...
و تنور لقلوبهم اللي تاهت وسط الأيام...
الليل سكونه ده أجمل صوت...
يغني ويا القمر يقول يا مين يسمعني...
أنا اللي اشتكالي البشر من يوم ولادة النور...
لا ف يوم صديت قلب ولا ليلة خدني النوم...
لياليا ليها العجب ، لكن يا مين يقعد و يشوف...
خدهم بريق الصدا و النت و اللفلفون...
أنا اللي كنت مرسال القلوب من يوم ولادة الخلق...
بقيت مجرد صفحة سودة و ضلام ممقوت...


10 التعليقات:

Noha Saleh يقول...

خدهم بريق الصدا والنت والفلفون

وعجبى

بجد حلوة جدا تقريبا انا اول تعليق ودى اول مرة تحصل معايا

بس بجد كلام جميل جدا تسلم ايدك

ممكن أسأل سؤال
هو انت قفلت الصفحة اللى كنت عاملها بإسمك على الفيس بوك
لو ماكنتش اتقفلت استأذنك تبعتلى اللينك بتاعها لانها ضاعت منى

Unknown يقول...

ربنا يخليكي يا أستاذة نها ، أنا أول مرة اكتب حاجة من النوع ده و يارب اكون عرفت اعمل حاجة كويسة شوية...
لينك الصفحة هتلاقيه ف البوكس اللي علي يمين الصفحة فوق أو لو مش ظاهر عندك اللينك أهو
http://www.facebook.com/pages/من-مذكرات-مريض-نفسي/193468894005190
نورتيني أوي بجد...

كلمات من نور يقول...

يا سلام عالجمع بين الحزن والفرح والجنون والبنات القمرات ووردات الحب

حلوة يا حسني ولو جديد ليك وعجبي

richardCatheart يقول...

صباحك جميل زى وشك الباشوش

مش هاقولك حلو ولا لاء

هاقولك حاسه من فتره انك بتحب لان اللى زيك مايعرفش يكتب كلام حب مباشر يا مستا

قد اصيب وقد اخطىء

الشوكة الناعمة يقول...

ما انت طلعت بتفهم اهه
و و النعمه انتا بتحب يا ابو لي

reham lotfy يقول...

حلوة جدا للاسف ان كل الحاجات الرومانسبة دى راحت فعلا

Unknown يقول...

كلمات من نور...
الجمع ده كله بتلاقيه فعلا في وقت الليل بالذات ، وقت كله سكون صحيح بس مليان حاجات كتييييير...
نورتيني أوي :))

Unknown يقول...

ريتشارد...
يبقا قد أخطئ :))
بس المهم انها عجبتك ، نورتيني أوي :)

Unknown يقول...

الشوكة الناعمة...
طول عمري بفهم مش لازم يعني ابقا مسهوك عشان اطلع بفهم :))

Unknown يقول...

ريهام لطفي...
اللي عايز يرجع الحاجات دي ممكن يرجعها بصورة منفردة ، و ساعتها هايحس فعلا بأد ايه هوا متميز عن غيره في نفس الزمن...

Share |