الجمعة، 26 نوفمبر 2010

تاج جديد خالص ، بس هو مش تاج أوي يعني ، مش تاج أساسا... :))


بعيدا عن التيجان و السلطانيات اللي لبسناهم و لبسناهم لغيرنا كتير...
المرة دي هانلعب و ياريت اللي عايز يلعب فالدعوة مفتوحة ، لإنها لعبة هاتعرفنا علي بعض أكتر...
من خلال معرفتي الوطيدة ببعض المدونين و كمان معرفتي السطحية بآخرين ، قدرت أرسم لكل واحد فيهم تصور لشخصيته بناء علي أسلوبه في الكتابة و الموضوعات اللي بيختارها و تعليقاته و طريقة كلامه في التجمعات التدوينية ، و أكيد كل واحد فينا بيعمل كده مع كل الناس...
هحاول علي أد ما اقدر اصف بإيجاز كل مدون ، و قاعدة اللعبة و شرطي الوحيد ان محدش يزعل من نظرتي ليه عشان لو كانت نظرتي غلط لازم يصلحهالي فورا في الكومنتس و دي من فوايد اللعبة ، ان النفوس تصفي... :)
الترتيب هايكون عشوائي ، يعني اللي بيخطر علي بالي فجأة وانا بكتب بتكلم عنه ، محدش بقا يقول ف سره اشمعنا انا جاي في الآخر و حركات العيال دي ، مش تتر فيلم هوا... :))
انما لو حد عايز يعني اكتب اسمه الأول ، فانا مش ضد الرشوة و الكوسة يعني معنديش مشاكل... :))

نبدأ بأعز أصدقائي:)

رامي : خليط من الرومانسية و الكوميديا يخليك مش عايز تسيبه أبدا ، أسلوبه و طريقة كلامه بتفكرني أوي بمذيع برنامج (ع القهوة) ، المكتوب عنه كتير و محتاج بوست لوحده.

الشوكة الناعمة : ثقة غير طبيعية في النفس ، شئ من التسلط يخليني أتنبأ لأولادها بإذن الله بمستقبل واعد من العقد النفسية ، تسكت تسكت و تقول تعليقات تخليك ضحك من قلبك ، و دي مش حاجة معتادة من بنت انها تخلي راجل يضحك بجد من غير ما يكون بيجاملها ، صريحة لدرجة ترفع ضغطك ، من رواد الكوميديا السوداء...
مدام مني : احترت ف أمرها :) بعتبرها رمز التحضر في كل شئ ، مثقفة إلي حد تخليك تستصغر نفسك قدامها ، بعتبرها أختي الكبيرة بالمعني الحرفي للكلمة ، سهل  جدا انك تغيظها :) و ساعات بتصنع الغباء مخصوص عشان أشوف رد فعلها و أضحك... :)

كلمات من نور : في نفس مقام مدام مني بالنسبالي ، معرفش عنها كتير بس في ناس مش بتحتاج تعرف عنها أي حاجة عشان تحس براحة نفسية في الكلام معاها...
خالد همس الأحباب : مشفتوش غير مرة واحدة في تجمع التبرع بالدم ، لكن بنظرة واحدة ليه عرفت انه انسان عملي جدا ، و بياخد عمل الخير علي محمل الجد ، يعني حسيت ان ضميره شغال بنسبة غالبة علي أكتر تصرفاته ، معرفش هايشوف البوست ده ولا لأ بس أنا اتشرفت جدا بمعرفته و لسه هاتشرف تاني أكيد...
الحب الجميل : عاطفة نشطة في تعاملاتها مع لولو بنتها ، و بيتهيألي انها واخدة 75% من اهتماماتها ، لمحة حزن أو جدية أو رزانة مش عارف ، بس رغم صوتها المرح في كل اتصال لينا ف أي تجمع بحس بلمحة جدية متسللة من بين الكلام ، أتنبأ للولو معاها بمستقبل نفسي كله ورود...

مرمر : ساعات بحس انها أخت الحب الجميل و ريتشارد ، برغم ان ريتشارد أكثرهم مرحا ، لكن بحس ان مرمر بتستخدم المرح زي وسيلة للهروب من حاجة ، خصوصا انها دايما في حالة حنين دائم لوالدتها ألف رحمة و نور عليها...
ريتشارد : نكتة مجسمة ، تعرف ازاي تخليك تضحك بالعافية :) بعتبرها رمز الفرح في البلوجر ، برغم كده وقت النصيحة بتقلب وشها و تزعق فيك جامد لكنك بردوا تحس انك عايز تضحك... :))

سيادة الريس : نلقائي لأبعد الحدود ، ساعات بيقول الكلام من غير تفكير ، عنده ولع غريب بالشعر و الأقوال المأثورة ، طفولة حافلة بالمغامرات...
فاتيما : شعلة متقدة من المرح ، مستحيل تحس معاها بأي ملل ، ترسملك الحياة بأزهي الألوان مهما كانت مشاكلك ، متحمسة لدرجة الحماس ذاته ، و عشان كده بعتبرها رمز الحماس... :)

عمرو يسري : نسختي التانية في نقطة قلة الكلام و الإنطواء الجزئي ، أسلوبه في الكتابة متنوع و غير ثابت ، يعني مرة خبري زي القالب المصمت و مرة يستعمل اسلوب خاص للسرد ، شكله كده من اللي تشوفهم تقول عليهم (طيب و ابن حلال) من أول نظرة ، ما تشوفوله عروسة يا جدعان...:))

بنت خيخة : مرحة جدا لكن مبتضحكش ، يعني ممكن تكون بتقول حاجة تضحك لكن تعبير وشها ثابت تخليك محتار هي قالت حاجة تضحك ولا لأ... :) بتحرك بسرعة أوي ممكن تكون قصادك و فجأة تلاقيها وراك :) ، بردوا متحمسة لعمل الخير أوي و جايز أنا شايف كل الناس متحمسة عشان أنا طبعي بارد و صعب اتحمس لشئ بسهولة :))

بجد في ناس كتيرة أوي كتبت عنهم في أجندتي لكن انا قاعد ف سايبر و الجو متلج :) نكتفي بهذا القدر و ياريت تلعبوا اللعبة دي ف بلوجاتكم و تسيبولي لينكاتها في الكومنتس عشان عايز اعرف صورتي المهببة ف نظركم ايه... :))

34 التعليقات:

الشوكه الناعمه يقول...

امممممممممممممممم
اولا عاوزه اضحك كتير اوى
الفكره بتاعه التاجه تعتبر رائده على حد رأى طبعا
كلامك عنى مش غريب ، مش مستغرباه ومعترفه بيه كليا معاده حاجه واحده ولادى انشالله ده ان جم صدقنى هايحكموا العالم مش امنيه ولا غرور بس ثقه اكتر فى اللى اتعلمته وانشالله هاعلمه ليهم
عشان بكره بالنسبه لى مافيش غير شمس
و ده على كل الاحوال املى
بس بجد عجبنى اوى التاج
كون بخير

Timo.. يقول...

حلوووو قوي فكرة البوست ده..
ولو اني كان نفسي يطول اكتر من كده بس كنت انت ها تتلج من البرد :)

على العموم ها اتابع وها استنى تكملة باقي البوست في بوست تاني :)

Tamer Nabil يقول...

فكرة حلوة وجديدة

تسلم عليها

ربنا يوفقك ويكرمك


مع خالص تحياتى

قول ياااارب يقول...

فعلا فكرته حلوة وبجد قدرت توصل صورة للشخصيات اللى اتعاملت معاها لدرجه اننا حبناهم بس من كلامك ده
تحياتى لعقلك

آخر أيام الخريف يقول...

لأ بجد مش معقول !!!!!!!!!!!!!!

انت بتقرا افكارى , عارف انا كنت فكرت فى وقت ما زى ما بكتب بورتريهات عن المشاهير أعمل من حين لآخر بورتريه لحد من المدونين أصحابى ...و اديك حرقت الفكرة ما بقتش عارفة الاقيها منك وللا من شريف القاضى :)

جامد البوست كالعادة يا حسنى و فى انتظار جديدك :))

الحب الجميل يقول...

بضحك
مش عارفه
بجد
عندك حق
مش بقولك مخك مفيش منه اتنين
وتعالى هنا ...انت قاعد وبتذاكر فينا ولا ايه ؟؟؟
ايه الشغل الجامد دا
ههههههههههه
فكرة حلوة اوى يا حسنى
ابقى تقل وانت خارج
نشوفك على خير ان شاء الله

Mona يقول...

فكرة البوست حلوة أوى ياحسنى مرة فكرت أعمل كده بس خفت أضايق حد بصراحة بس فكرة حلوة.

وفعلا أنا بتغاظ بسرعة :)) بس بروق بسرعة برضة

بس أستصغار النفس ده مش صح لأن فرق السن والخبرة هو الى بيخلينى كده فالأفضل أنك تقول أنى ممكن أكون قدوة وطبعا أنت مجاملنى لأنى أعتبرك فى مقام أبنى وخاصة أنك أصغر من الصغير عندى :)))
تحياتى القلبية

كلمات من نور يقول...

كلمات من نور : في نفس مقام مدام مني بالنسبالي ، معرفش عنها كتير بس في ناس مش بتحتاج تعرف عنها أي حاجة عشان تحس براحة نفسية في الكلام معاها...
================================

راحه نفسيه ...يارب دايما يا حسني ويارب يديم التواصل والمعرفه بيننا

بلاش الله يخليك اعمل التاج داه علشان أنا عندي حوالي 300 مدون ومدونة و أكتر اقعد اتكلم عن مين والا مين؟؟؟؟ دي كارثه نفسيه...أقولك حاتكلم عنك هنا إيه رأيك؟؟

انت يا حسني بجد رغم قصر مدة تعارفنا إلا إني باعتبرك إبن جديد لي عالانترنت
اه اولادي كتار بس كل واحد فيهم مميز بشيء ( مش حاقولك بقى انت مميز بإيه )ههههههههههه وش شرير وبيضحك

فاتيما يقول...

انتا بتضحك علينا يا بنى ؟!!

دا مش تاج خالص

ومش تاج اساساً

دا محاولة شيك عشان منك
عشان تقول تعبر عن مشارعك الطيبة ناحية الناس المكتوب اسمها دى

ولحسن الحظ ..اسمى بينهم


لو فكرت اعمل زيك
عليزة عشرميت بوست
الأحباب هيعدوا ال400 وكل واحد له ف قلبى انطباعات .. مش انطباع واحد بس


انا كتبت حاجات مشابهة لكدا
فى كل مرة كنت برجع من لقاء تدوينى
عشان كدا ازعم انى فاهمة احساسك لما جت الفكرة ف دماغك
ولما قفعدت قصاد الكيبورد وكتبتها


كلامك عن الناس المشتركة بينى وبينك
أبصملك عليه
مارو والحب الجميل وخالد و رامى و مرمر وعمرو يسرى وخوخة خيخة ...

اما اللى مشفتهمش لسه واعرفهم إفتراضياً عبر الشاشة
فمتفقة معاك عليهم ... الدفا مالى الحروف والتعليقات


اما اللى لسه معرفهموش
فربنا يقدرنى و تيجى الفرصة


كلامك عنى
لما قريته عند منونا .. ذهلت
يمكن لأنى استغربته منك
انتا غالبية الوقت كنت ساكت يوم التبرع وانا شغالة رغى ودوشة
انا مبسوطة قوى بكلمة الحماس دى
اصلها بتطمنى انى صح
اصل الدنيا بتاعتى مليانة احباطات
ولو استسلمت للإحباطات دى
الدنيا هتغمق ومش هشوف قصادى
هتبقى كل حاجة ملهاش طعم
ولا لازمة
ولا اى امل ف بكرة
شوية الحماس اللى عندى واللى بتقول عليهم هما شباكى ع الدنيا
هما الحاجة اللى بتخلينى اتشجع وافتح عينيا كل يوم الصبح
واغمض عينى بليل وانا عندى امل ف بكرة

الحماس هما كل ما املكه ..عشان اقضى بيه ايامى اللى جاية
مهما كان شكلها ونهايتها

انا عاجزة عن شكرك يا حسنى
وان شاء الله اشوفك يوم البؤجة
ف أحسن حال يا فندم


اختك فاتيما

بيتنا القديم يقول...

مدونة جميلة...
ولنا عودة للقراءة والتعليق..
(:
دمت بخير

mrmr يقول...

ايه الافكار الجامده دى بس يا سحس
هروب ايه ياعم انا مش بحب اهرب
احب اقف فى وش المدفع هههههه
اما الحنين لامى ده ح يستمر لاخر نفس فى حياتى لانها الحب الصافى والملاك الطاهر اللى كان بيمشى على الارض وفى لحظه واحده اتخطفت منى وحفضل طول عمرى قلبى ينزف الم ً على فراقها

فكره البوست جامده قوى يا سحس
اعتقد لولا ما الهواء والصقيع لفحك على فقاك مكنتش خلصت كتابه البوست ده
فنحن نشكر الظرووووف
ربنا يسعدك ايامك

Mona يقول...

http://mona-myownroom.blogspot.com/2010/11/blog-post_27.html

Tears يقول...

فكرة جديدة بس محتاجة دقة و وقت للكتابة


تحياتي

richardCatheart يقول...

صباح اللى بتغنى صباح الخيرات تشرفات افندم مستا باشا

ايه الكلام الجامد الملغم دا يا عمو هههههههه كتير عليا والله جميل انى اكون فى نظرك بسمه وفرح وبعرف ارسم الضحكه على وشك يا مستا بعتبر دا ملكه قويه ونادره ف زمن المر اللى احنا فيه

يارب افضل ارسم على وشك ضحكه حلوه

بس ليا سؤال هو انا شخطت فيك قبل كده
متهيئلى لو شخطت فيك قبل كده وشوف الوش التانى ماكنتش جبت سيرتى من اساسه ههههههههههههه

تسلمى يا مستا يارب وربنا يسعد ايامك

Noha Saleh يقول...

فى انتظار استكمال باقى البوست
فكرة هايلة على فكرة

همس الاحباب يقول...

السكوت اللى يسبق العاصفة
ههههههههه
كل ده يطلع منك يا باشا
ماشى الكلام ويارب نكون عند حسن ظنك والكلاده ده يكون حقيقى
وشكرا على المجاملة والكلمات الطيبة
والفكرة موجودة بداخل كل منا وبيعبر عنها بطريقة او اخرى
تحياتى

fafy يقول...

بصراحه يا حسنى فكرتك جميله اوى وعيب عليا كأخصائيه انى مش انا الى اعمل كده انما ملحوقه بس انا زعلانه منك لانك مش جبت سيرتى (مذكرات اخصائيه نفسيه)ياريت تحللنى نفسيا وتقولى ومش هازعل يا سيدى

ELMOSTAFZ يقول...

الشوكة الناعمة...
وانا أكره ؟ دانا أفرحلك :))

ELMOSTAFZ يقول...

تيموووو...
مبسوط ان البوست عجبك ، معلش بقا المهم ان الفكرة وصلت للجميع عشان اللي مفكرش فيها يعملها...
نورتني يا باشمهندس تيمووو...

ELMOSTAFZ يقول...

تامر نبيل...
متشكر أوي ربنا يوفقنا جميعا...
نورتني...

ELMOSTAFZ يقول...

قول ياااارب...
بجد كان نفسي أكتب باستفاضة أكتر من كده بس الظروف مش مساعداني للكتابة الأيام دي...
شرفتني بوجودك...

ELMOSTAFZ يقول...

آخر أيام الخريف...
الفكرة لابد و حتما موجودة ف دماغ كل واحد فينا بس جايز مجتش الفرصة المناسبة أو مكانش حد متحمس لتنفيدها...
يلا بقا هارد لك المرة الجاية :))
نورتيني اوي...

ELMOSTAFZ يقول...

الحب الجميل...
طب كويس ان كلامي طلع صحيح مش فشنك :))
آهو بسلي نفسي بين المذاكرة و اقعد اذاكر فيكوا شوية :))

ELMOSTAFZ يقول...

مدام مني...
في ناس كتير كانوا بيكرهوني لما اواجههم بحقيقتهم ، محدش من حقه يزعل غير لو كان عايز غيره ينافقه ، صدقيني انتي عملتي الصح ده غير انك زي ما قولت انتقائية جدا ف اختيار اصدقائك ف صعب تكون عيوبهم فادحة للدرجة...
استصغار النفس ده حاجة لا ارادية بحسها قدام اي حد بيعجبني تفكيره أو تصرفاته...
متشكر جدا لاستجابة دعوتي...

ELMOSTAFZ يقول...

مفيش زر لايك هنا نمشي بيه الليلة ؟ :))

ELMOSTAFZ يقول...

كلمات من نور...
انا زيك بردوا بس مشكلتي النسيان ، بعرف ناس كتيييييييير و أنساهم تماما ولا اسأل عنهم و بالتالي هما ينسوني ، يعني المجموعة اللي كتبت عنها هنا متجيش نقطة ف بحر...
مميز بإيه بقا ؟ :))

ELMOSTAFZ يقول...

فاتيما...
ما هو مش تاج ، وانا نفسي معرفتش الاقيله اسم :))
أنا مش عارف ليه كل الناس شايفاني ساكت ، أنا بتكلم بس لما بلاقي كلام أو لما حد ينكشني بتلاقيني فتحت في الكلام ، انما هشتغل تلقائي كده ازاي بس :)
تعريفك للحماس خلاني عايز ابقا زيك كده بس دي مش حاجة تتغير بين يوم و ليلة ، أنا بيأس بسرعة أووووي...
بجد نورتيني أوي...

ELMOSTAFZ يقول...

بيتنا القديم...
تنور ف أي وقت البيت بيتك :))

ELMOSTAFZ يقول...

مرمر...
ربنا يعوضك خير و تعيشي و تفتكري...
أنا مبعرفش أواسي حد بس في النهاية مقدرش اقول اني حاسس بنفس آلامك زي ما كل الناس بتعمل و إلا هاكون كداب أوي ، ربنا يخفف عنك...
يا رب البوست يكون عجبك و كويس ان توقعاتي طلعت خاطئة... :))

ELMOSTAFZ يقول...

تيرز...
ولا دقة ولا حاجة ، اللي عارف اصدقائه كويس بيكتب عنهم بدون تفكير و تزويق ف الكلام ، و بالتالي مش هايتعب فكريا...
يعني اتركي الأفكار تنطلق و تنساب كده...

ELMOSTAFZ يقول...

ريتشارد...
لا مشخطتيش فيا قبل كده بس اتحكالي عنك و انتي بتنصحي :) ربنا يكفينا شر نصايحك و كفاية علينا البسمة منك :))

ELMOSTAFZ يقول...

آنسة نهي...
لا مانا لو هستكمل البوست هحتاج افتح مدونة مخصوص عشان اتكلم فيها و أحلل باقي الشخصيات... :))
نورتيني...

ELMOSTAFZ يقول...

أستاذ خالد...
و أكتر من كده هوا انتا شوية :)) انا بقدر الناس العملية جدا و الناس اللي بتعمل الخير بأكتر من أسلوب زيك...
نورتني و أشوفك بخير ان شاء الله الجمعة القادمة...

ELMOSTAFZ يقول...

فافي...
طب ماشي ولا يهمك نفذي الفكرة عندك ف البلوج و متقوليش ان انا صاحب الفكرة ، و اهو محدش واخد باله :)))
أنا و الله مش ناسي حد و الكل عندي محفوظ مكانه جوايا ، بس عندي مشكلة في التواصل الأيام دي و مش عارف أزور أي مدونات تانية ولا حتي عارف ارد ع الكومنتات هنا...
كلها كام سنة ان شاء الله و نكون زملا في مهنة واحدة :))
مدونتك جميلة جدا و تصميمها كمان عجبني أوي...

Share |