الأربعاء، 24 نوفمبر، 2010

بوست مالوش لازمة...


البوست ده عملته مخصوص عشان النوتس السريعة اللي كتبتها في الغربة ، غربة الفيس بوك بعيدا عن جو البلوجر الدافئ...

********************

لم يكن الأمر صعبا كما ظننت ، إن الناس مسلون حقا ، يمكنك قضاء بعض الاوقات معهم لتزيح عن كاهلك عبء انتظار الموت ، ثق أن هذه من أفضل مميزاتهم...

********************
 
ليه دايما بعد ما يطلبوا الحاجة تقوم الكتكوتة تمشي و هيا متنرفزة و هوا يقوم يجري وراها بعد ما يدفع حساب الحاجة اللي متلمستش اساسا...
أيه الناس دي :)

 ********************

ستظل ذاتي عدوي الأول حتي أموت ، حينها لن تكون أكثر من فكرة مجردة داخل عقول الآخرين ، و ستعيش أسوأ فتراتها من بعدي ، لأنها لن تجد عقلا يذكر لي خيرا ، و لن تجد قلبا يتحرق شوقا لي...

********************

التخطيط عدو القدر ، نظرية خاطئة تماما علي النحو العام ، و من المؤسف أنها أثبتت صحتها علي النحو الشخصي ، ولا تقل لي أنها مصادفة فقانون المصادفات لا يشمل مرة ثالثة ، فماذا عن عمر بأكمله...

*******************

ليه بقينا نتكلم عن السلبيات بس و نقعد نحسر و نتحسر ، مع ان الكلمة الإيجابية أثرها أكبر ألف مرة و بتشحن النفوس ، مين المغفل اللي قالكوا ان الندم بيفيد...
انتوا مبتسمعوش ام كلثوم ولا ايه :)

******************

كثر الحديث عن الإنتخابات الرئاسية القادمة...
و بعيدا عن التحيزات السياسية ، لست ضد التغيير ، لكنه نوع من التعود و المعاشرة ، كأبطال ذلك المسلسل التركي ، من الصعب مفارقة وجوها ألفتها علي مدار 643722460 حلقة ، فماذا عن وجه ألفته عمرا بأكمله...
صدقا حتي الفساد يمكن معاشرته ، إن الإنسان كائن ودود عاطفي لأقصي الحدود...

*****************

عشان منظلمش مصر...
الطب اتقدم ، و العلم اتقدم ، التعليم اتقدم ، الفن اتقدم...
بس ابو العروسة مش موافق...
و يوم ما الهلس اتقدم...
قرا الفاتحة طوالي... :)

****************

إن حب شئ ما و كره آخر لهو نشاط أزلي يشير إلي كل منا كشخصية و كيان نفسي مستقل...
لكني برغم ذلك لا أجد في إزدواجية العاطفة ما يمثل إضطرابا سلوكيا أو مرضا يستحق العلاج ، فلا أفهم لماذا يجب علينا توحيد اتجاهاتنا نحو موضوع ما بكل خصائصه الإيجابية و السلبية (بسلطاته و بابا غنوجه) ، و ما الذي يجردني من حقي في إمتلاك أسباب الحب و الكراهية لذات الموضوع ؟
إن تسرعنا البشري المعهود في تكوين اتجاهات موحدة إنما ينم-في رأيي-عن جهل بتفاصيل الموضوع المكروه أو المحبوب...

***************

إن الحياة حبلي بتلك الدهاليز الفلسفية التي نستغلها مرارا لإقناع الآخرين-و أنفسنا قبلهم-بجدوي أفعالنا مهما كانت خاطئة...
لا أنكر امتلاكي لفلسفة خاصة في تبرير أفعالي الخطأ منها و الصواب ، لكني علي الأقل مازلت أخجل من نظرات ضميري الخبيثة المتشككة ، تلك النظرات التي تقول بوضوح (هانصيع علي بعض ؟)...

***************

عندما تنبذك الأخريات ، إتصل بداليا...
و إن لم يكن لديك داليا فلابد أن لديك رحاب ، و إن لم يكن لديك رحاب فلابد أن لديك دينا ، و في جميع الحالات لابد أن لديك إحدي هاته المسئولات عن مواساتك وقت انهزاماتك العاطفية ، صديقة الدراسة التي اتخذت قرارك منذ البداية أنها لا تصلح إلا كأخت لك ، أو آلة بشرية لنقل المحاضرات التي فاتتك...
و تفوتك دائما...

و شكراااا ، أشوفكم-بإذن الله-في تجمع بؤجة الخير ان عشنا و كان لنا عمر...

9 التعليقات:

mrmr يقول...

داليا ورحاب ودينا
ومين كمان يا سحس
الحبل على الجرااااااااار
اعترف واقر

بس من وجهه نظرك ان البوست مالوش لزمه لكن فيها حاجات كتير حقيقه مره بنعشها

صباحك قشطه بالهبل علشان خلاص مافيش لبن ابتدينا صياااااام
اقعد بالعافيه

Mona يقول...

أكيد مش حأعلق تانى :)))

الحب الجميل يقول...

ليه دايما بعد ما يطلبوا الحاجة تقوم الكتكوتة تمشي و هيا متنرفزة و هوا يقوم يجري وراها بعد ما يدفع حساب الحاجة اللي متلمستش اساسا...
أيه الناس دي :)

دى ناس مخها تعبان
سيبك منها
دا يا عم حسنى دلع البنات
المفروض يطنشها
ويقعد يشرب الطلبات ويكمل قاعدته
ههههههههههههه
والبوست ليه لازمه لان وراه كلام وكلام كتير
تحياتى

لـــولا وزهـــراء يقول...

البوست ده عملته مخصوص عشان النوتس السريعة اللي كتبتها في الغربة ، غربة الفيس بوك بعيدا عن جو البلوجر الدافئ...

" انا بكره الفيس بوك مبطقوووووووووووووش بحسه انه حاجة كدا تيك اواي ملهاش طعم "


لم يكن الأمر صعبا كما ظننت ، إن الناس مسلون حقا ، يمكنك قضاء بعض الاوقات معهم لتزيح عن كاهلك عبء انتظار الموت ، ثق أن هذه من أفضل مميزاتهم...

********************

ليه دايما بعد ما يطلبوا الحاجة تقوم الكتكوتة تمشي و هيا متنرفزة و هوا يقوم يجري وراها بعد ما يدفع حساب الحاجة اللي متلمستش اساسا...
أيه الناس دي :)


" حاااااااجة تفرس "

********************


كثر الحديث عن الإنتخابات الرئاسية القادمة...
و بعيدا عن التحيزات السياسية ، لست ضد التغيير ، لكنه نوع من التعود و المعاشرة ، كأبطال ذلك المسلسل التركي ، من الصعب مفارقة وجوها ألفتها علي مدار 643722460 حلقة ، فماذا عن وجه ألفته عمرا بأكمله...
صدقا حتي الفساد يمكن معاشرته ، إن الإنسان كائن ودود عاطفي لأقصي الحدود...
" هههههههههه تقصد اوليمبك عشرة عمر "



***************

إن الحياة حبلي بتلك الدهاليز الفلسفية التي نستغلها مرارا لإقناع الآخرين-و أنفسنا قبلهم-بجدوي أفعالنا مهما كانت خاطئة...
لا أنكر امتلاكي لفلسفة خاصة في تبرير أفعالي الخطأ منها و الصواب ، لكني علي الأقل مازلت أخجل من نظرات ضميري الخبيثة المتشككة ، تلك النظرات التي تقول بوضوح (هانصيع علي بعض ؟)...

" حلوة دي انت الوحيد اللي متقدرش تهرب منك لو ضحكت على الناس كلها دا انتوا مع بعض من زماااااااااااان

لـــولا

لـــولا وزهـــراء يقول...
أزال المؤلف هذا التعليق.
The One Who May Care يقول...

ستظل ذاتي عدوي الأول حتي أموت ، حينها لن تكون أكثر من فكرة مجردة داخل عقول الآخرين ، و ستعيش أسوأ فتراتها من بعدي ، لأنها لن تجد عقلا يذكر لي خيرا ، و لن تجد قلبا يتحرق شوقا لي...

>>>>>>>>>>>>

أحب بس اعدل الجزء الاخير حتى اموت فنتعذب احنا الاتنين ببعض حتى فى الاخره و هو ده معنى الحياه " او الممات "

و عجبتنى بتاعه الريييس
ههه

فاتيما يقول...

ازيك يا استاذ

اولا احييك على اول جملة ف البوست
اللى له لازمة ونص دا

اصلى متفقة معااااااك جدا
ودايما اقول ع الفيسبوك انه بارد
لما دخلته حسيت بكدا
المدونات فيها دفا فعلا
و حميمية اكتر
ولهذا انا معتصمة بها
ومش عاوزة اغادرها لنداهة الفيسبوك


انتا كاتب كلام كبير قوى على فكرة
فيه عبر
متفقة برضو معاك ف كتير منها
خصوصا حكاية ان كل انسان حالة بذاته
ومهما كانت فيه افكار جمعية تلمنا
لازم ع الأقل تقبلنا ليها واستيعابنا وتطبيقنا ليها ف الواقع يكون مختلف
زى ما كل بنى آدم له بصمة
كل روح وليها بصمة
محدش مفروض يبقى شبه حد
لازم كل واحد يكون نفسه

بس عقبال ما الواحد يدرك الحقيقة دى
ويبتدى يقرر يطبقها
وميهموش حاجة
بيكون الوقت فات
وانغمس حتى مفرقه ف حياة
ويبقى صعب يفلفص منها
فبيقول يعوضها ف ولاده
او اخواته
او تلاميذه
الخ


ملحوظة تانية بقى
هوه نون النسوة مزعلينك ليه كدا
وشيكلهم بيعملوا حركات نص كم معاك كتير ؟؟!!!
يا عم ادينا فرصة
تملى لما حد يسألنى من زمان ولحد النهادرة ..المرأة دى مخلوق غريب وصعب نفهمه
ارد اقولهم بمنتهى البساطة
متحاولوش تفهمونا
حبونا وبس
حبونا زى اطفالكم
وانتوا شوية شوية هتتعودا على طباعنا وجنونتنا وصخبنا وكل حاجة
ويبقى خلاص

عارف
الحكاية اشبه بالمتاهة
لو عرفت دروبها
هتمشى فيها بعد بسهولة
وتوصل
متقفش حيص بيص كل مرة

حبونا واقبلونا زى ما احنا
زى ما احنا بنحاول ندور على اللى يريحكم ونعمله دون اقتناع ف الغالب لأنه بيناقض مشاعرنا ويتسق مع عقلكم

المسألة تكاملية
مش تنافسية


انا رغيت كتير قوى
مش بقولكم لما بنفتح مبسكتش
بس البوست (آل اللى ملوش لازمة آل) فتح شهيتى للفذلكة

اجمل حاجة بقى
وعد حضور البؤجة
ان شاء الله اشوفك يومها على ألف خير
وفرحانة بجد انك متحمس


بس تعالى وحدك يا جدع
متجبش رحاب ولا دينا
:)

سلام يا فندم

وكتب بوستات ملهاش لازمة براحتك
واحنا هنقرى
وعلى قلبنا زى العسل
ملكش دعوة انتا بس
ومتتحشرش بينا وبين المستفز بتاعنا
ماشى؟

خالص ودى ليك

كلمات من نور يقول...

خسارة هنا مافيش لايك يا حسني

بس بجد كلام في الصميم وخاصة عن دفء البلوجر وغربة الفيس بوك

وعجبني قوي موضوع ان ابو العروسة قرا الفاتحه مع الهلس ...طيب يبقى نذكر ايجابيات منين يعني؟؟؟؟؟؟؟

fafy يقول...

كلامك جميل طبعا بس مستغربه انه اكبر من سنك انت عندك فعلا 19 سنه؟

Share |