الثلاثاء، 31 أغسطس، 2010

سري الكبير...


انصاف النائمين امثالي يعانون من ذلك...
و في الغالب حينما تصطدم طائرة استطلاع بأنفك لن تبالي كثيرا و ستستكمل نومك ، لكن الأمر يختلف عندما تجد قاعدة امريكية كاملة اسفل ذراعك...
كان الأمر يزعجني في البداية ، لكنني صرت معتادا علي شكواهم الدائمة من رائحة فمي ، علي كل حال ليست مشكلتي فالسرير يكفي الف قاعدة فلماذا لم يجدوا الا المكان المواجه لفمي...
اتحاشي ازعاجهم و اوجه نفسي نحو الحائط فأجده مشروخا تسيل من ثناياه الدماء ، اغمض عيني متسائلا عن مصدر الدماء فأسمع موسيقي (هاللويا) قادمة من لا مكان ، و يجيبني اسامة منير بصوته الخفيض...
-ليست هذه بدماؤك ، و ليست لك دماء بجدران احد.
حينها ادرك انه محق ، لطالما انصت لأسرارهم ، و لطالما كان لكل منهم سره الكبير ، السر الذي يحفظه كل منهم خلف اكثر ابواب عقله إحكاما ، هكذا امتلأت بدمائهم و صرت مزحوما بألامهم ، حتي صرت لا أعرف من انا ولا بماذا احلم ، ماذا يؤلمني و ماذا يسعدني...
لطالما تسائلت هل للباعوض فصائل دم محددة أم ان الباعوضة الواحدة تحمل بداخلها الاف الفصائل ممن امتصت دمائهم ، دماء طفل نام خائفا من عقاب مدرسته غدا لأنه لم ينه واجبه ، دماء رجل اشيب يحلم بالخلاص ، دماء مراهق مفعم بالأحلام ،  دماء فقير يحلم بالعشاء ، دماء شاب يحلم بالزواج ، و دماء زوجة تحلم بالطلاق...
قمت من مرقدي بهدوء فتلاشي كل ذلك ، غالبا لا اذكر شيئا من تلك الروئ الا ذكريات مشوشة رغم انني اكون بنصف وعي ، لكن هذه الرؤية بالذات كانت اوضح من الواقع ذاته ، كانت نقية واضحة ، موجهة لشخصي و مركزة علي ذاتي...
فتحت درج مكتبي و اخرجت اجندة مذكراتي ، من الغريب ان تتصفح مذكراتك لكنك قد تكون غافلا عن اكثر جوانب حياتك اهمية ، في لحظات كهذه تظهر اهمية المذكرات...
بحثت عن مغامرة ما ، سر كبير اخفيه ، شئ اخاف عليه ، روح أتعلق بها ، حب يحيا بداخلي ، شئ أتمناه ، أمل أعيش عليه ، أو طموح أتطلع إليه...
كان محقا ، لا تحمل مذكراتي شيئا يستحق الإخفاء ولا تحمل حياتي عبرة ما قد تفيد الأجيال القادمة ، إنها حياة خالية من الأسرار ، حياة روتينية ، نمطية ، حياة بلا حياة...
الآن فقط أدركت أن سري الكبير ، هو أنه لا سر لي...

29 التعليقات:

آخر أيام الخريف يقول...

أسلوبك فى السرد دايماً جذاب و سلس ...

تحياتى

mrmr يقول...

علشان انت شخص واضح جدا مع نفسك ومع الاخرين فلم تجد اى سر تخفيه
هكذا الاشخاص البسطاء

اسلوبك رائع يا حسنى

سلامتك الف سلامه ربنا يعفى عنك

تصبح على خير

الشـــــوكه النــاعمه يقول...

لا تطمئن كثيرا
الاسرار اتيه فاانت مازلت قلى مشارف الطريق البئر مازالت بعيده والطريق جدا طويل ومتعثرا كثيرا
الاحداث لما تبدء بعد
كون على حذر ولكن لا تخف
انتطر اجمل ايام واعز اسرارك
تحياتى

داليـ ـ ـ ـ ـ ـ ــــا يقول...

يعنى من الأخر كده
حياتك كتاب مفتوح
وعمتا أعرف ان الاسرار المخفيه بتبقا كلها سوداويه

لك تحياتى وكل ما يلزم

Mona يقول...

ماتستعجلش الطريق لسة فى أوله ويوم ما سيكون لك سر فدائما ما نحب أن يكون لنا أسرار والسر قد يكون جميلا وتأبى أن يشاركك فيه أحد -

Noha Saleh يقول...

ان لم يكن لك سر الان فربما يصبح لك سرا فيما بعد

Ramy يقول...

حسنى العزيز

أسف جدا على عدم المتابعة الفترة السابقة

و ألف سلامة يا صحبى بس انت كويس أهوا و بتستفزنا ببوستاتك (:

شوف يا سيدى أولا أحمد ربنا أن ملكش سر

الحمد لله

ثانيا ليه ملكش حلم ليه اللى أنت فيه دلوقت مش حلم مش حاجة تقدر تكون بيها شيىء كويس شيىء تفتخر بيه

ربنا يوفقك يا حسنى انا هتصل بيك قريب

صدقنى كنت مهدود اليومين اللى فاتوا

سلام مؤقت يا صديقى العزيز

dreams يقول...

انا اول مرة ادخل المدونة بس استمتعت اوى بكتاباتك واسلوبك الرائع
ومبسوطة انى عرفت ان مش انا بس اللى ما ليش اسرار ...

عمدة كفر المظاليم يقول...

أيووووه يا حسني
انت بتجيب الكلام ده منين يابني
بجد
ما شاء الله عليك

أتفق معك في معظم ما جاء في البوست
إلا أنني أختلف مع السطر الأخير
لا يا حسني
لدي أسراري
التي أعتقد انني قد أموت بها
ليس بالضرورة أن تكون الأسرار شيئا يخجل منه صاحبه
ولكنها تعبر عن منطقةما بين الأورطى والتاجي

لا أريد لأأحد أن بطلع عليها
إلا رب الأرض والسماوات
تحياتي

ELMOSTAFZ يقول...

آخر أيام الخريف...
بجد متشكر أوي علي كلامك ربنا يجبر بخاطرك...
نورتيني أوي...

ELMOSTAFZ يقول...

مرمر...
و الله انتي اللي طيبة يا مرمر ، انا بتمني تحصلي حاجة كبيرة تبقا سري الوحيد ، بس المشكلة ان التفاصيل كلها لسة صغيرة أوي ، و نفسي الاقي التفاصيل الكبيرة اللي احس انها تستاهل تكون سري الكبير...
الله يسلمك يا مرمر متشكر أوي...
و انتي من اهله...

ELMOSTAFZ يقول...

الشوكة الناعمة...
الفيلم يا إما أتاخر أوي في بدايته يا إما مافيش فيلم اساسا ، محدش ضامن عمره ممكن متكونش في أحداث جاية في الطريق...
يسمع منك ربنا ، انا بانتظار الأسوء دايما و لكن لما تقابلني أجمل أيام هعترفلك اني كنت حمااار...
نورتيني...

ELMOSTAFZ يقول...

آنسة داليا...
كتاب بس فاضي اوي و محتواه مافيهوش اثارة او مغامرة او شئ يجذب الإهتمام...
و ليه كلها تكون سوداوية ، في اسرار ممكن الواحد يخاف ان حد يعرفها لمجرد انها شئ نادر حصل له و خاص بيه لوحده ، و لو غيره عرف السر ده جمال السر و خصوصيته هاتضيع...
نورتيني آنسة داليا...

غير معرف يقول...

داندورما
الحياة فاضيه من غير ذكريات وممله من غير احداث وقاسيه جدا من غير احلاااام...حتى لو كانت الذكريات دى وحشه اهى ذكرياتى مش بتاعة حد تانى وحتى لو احداث حياتى متقلبه من كويس لسيئ او لأسوا..برضه ده المسلسل بتاعى مش بتاع حد تانى وانا اللى بالعب فيه دور البطوله..اما الاحلااام فده خيالى الجميل اللى من حقى اتخيله زى مانا عايزة وماحدش ليه انه يتحكم انا باحلم بأيه ولا من حقه يعرف غير اللى انا اختاره يكون فى الاحلاام دى...وربنا وحده هو القادر على تحقيقها...بس ده مش معناه انى ااقعد لوحدى احلم من غير ماحاول اوصل لحلمى..او اخاف انى انجرح لو حاولت او استسلم للملل اللى فى حياتى
لازم الواحد يتعلم من اخطائه والاهم انه يغلط علشان يتعلم..زى البيبى اللى بيتعلم المشى..لازم يقع كتييير قبل مايقدر يقوم ويمشى ويجرى..
اوعى تكون اتلخبطت من كلامى..اكيد انت فاهمنى..
دايما باطول فى الكلاااام ..رغايه قوى انا..
تحياتى

صوت من مصر يقول...

اكدب واقول وحش
ولا اقولك
بجد ابهرتنى فى طريقة السرد اللى بصراحة لسه كنت بدور على شىء مميز
وكمان المريض النفسى كثيرا ما يكون مبدع

خيط الحرير يقول...

بسم الله والصلاة علي رسول الله
يلهمني في أحرف كلماتك ألف سر...
والسر يعني الجرح ...الذي تلقي به خلف ألف باب كما تقول..حتي لا يشتمه أحد...فأنوف الناس مفعمة بالصمت.. لكل منا عطره الخاص ..يزيد وينقص نفورا أو جاذبيه كل علي قدر سره ..
أودع الله لك سر طاهرا من عنده يكون لك به عطر جذاب خاص...
فالصفحة مازالت بيضاء ..فليكن سرك ..هو سر الوصول الي الله
فأنت بدون الأسرار البشرية أنقي وأطهر ...خفيف هكذا يحملك الهواء أينما أردت حلقت حر في رحاب الله ..
فإن كان لدنيا كأرض فسيسجنك حب المكان ...
وإن كان سرا متعقا بشخص فأنت المعتقل
السر الذي فيك ولا تعرفه
هو أنك من نفخ روح الله فيك...
فما أجمل سرك الأوحد فما زلت أنقي وأطهر...
ولنعلم ذلك للأجيال وكفي به علم .
أننا خلقنا من يد الله وصنعه ونفخ روحه ...فلنحيا بذكر الله حتي نصل الي سر مالا عين رأت ولا أذن سمعت ولا خطر علي قلب بشر...
اللهم نولنيها والمسلمين..
آمين..
و

ELMOSTAFZ يقول...

مدام مني...
مش مستعجل و الله بس بتمني حاجة نفسي فيها ، يكون ليا سري الجميل الخاص ، حدث أو صفة أو شئ ، أي حاجة حلوة احتفظ بيها لنفسي و اخاف عليها من الناس ، و احس بيها اني مميز...
اعتذر عن تأخيري ف الرد...
بجد نورتيني يا مدام مني...

ELMOSTAFZ يقول...

آنسة نهي...
ما هو ده عشمي و الله ، يسمع منك ربنا...
نورتيني...

ELMOSTAFZ يقول...

رامي...
بتعتذر علي ايه مانا اسخم منك :) بقالي كتير أوي مش بتابع المدونات و بقيت بتأخر ف الرد ع التعليقات ، و الله مكسوف من كل الناس اللي متابعاني وانا نايم ف الخط...
لو بقالي سر يا رامي هقدر احس بثقة ف نفسي ، هقدر اعوض النقص اللي جوايا بالسر ده ، هفضل كل ماتدايق او احس بالضعف افتكر السر ده عشان اشحن نفسي ، طول مانا عارف ان في حاجة حلوة انا عايش عشانها مش عايش كده و خلاص...
مش عارف يا رامي بس يمكن ده مش حلمي اللي كان نفسي فيه ، هوا حاجة كويسة طبعا و فيها فايدة ليا بس زي ما تقول حماسي انخفض بالتدريج تجاه الموضوع ، ادعيلي ربنا يوفقني...
آه صحيح دانتا دعيت لوحدك اهو :) :)
انا كنت حاسس انك هاترجع من لقاء ابو الريش تعبان لإنك اخدت الموضوع بسرعة و ف يوم واحد من غير ما ترتاح ، كان نفسي اكون معاكوا اوي و الله بس حكم القوي...
نورنتي يا راااامي...

ELMOSTAFZ يقول...

دريمز...
و يا رب ما تكون آخر مرة و تعجبك دايما البوستات ، و الله لحد دلوقت مش قادرين نحدد اذا كان انعدام الأسرار ده شئ إيجابي ولا لأ ، بس انا شايف ان الراحة النفسية هنا هيا الشئ اللي يحددلك ، يعني لو حاسة انك مرتاحة بدون اسرار في حياتك يبقا تفضلي زي مانتي ، انما انا نفسي الاقي سري الخاص الجميل...
نورتيني دريمز...

ELMOSTAFZ يقول...

عمدة...
ربنا يجبر بخاطرك انتا اللي رافع روحي المعنوية :)
الاسرار اللي هموت و بيها و محدش اطلع عليها هيا اسرار الاف الناس اللي سمعت مشاكلهم و اسرارهم ، من غير ما اسأل نفسي ف يوم فين اسراري انا ؟ و المنطقة بين الأورطي و التاجي عندي كلها فراغ مش أكتر ، أنا فارغ جدا أكتر مما تتصور...
نورتني يا عمدة...

ELMOSTAFZ يقول...

داندورما...
مش عارف ايه سر تركيزك علي ملكيتي لأحداث حياتي و لأحلامي ، ما الناس اللي حواليا هيا اللي بتصنع الأحداث دي ، انما خيالاتي دي حاجة مرتبطة بيا ، وانا للأسف أحلامي مبهمة جدا لدرجة انها اختفت و زالت ملامحها...
انا فعلا اتلخبطت شوية ف وسط الكلام ، حاولي تستعملي زرار انتر شوية عشان الكلام يتفصل عن بعضه الله يكرمك :)
نورتيني داندورما...

ELMOSTAFZ يقول...

صوت من مصر...
يا سيدي الله يكرمك و يجبر بخاطرك :)
المريض النفسي لا يبدع كن متأكد من ذلك ، انما المريض النفسي يأتي بتصرفات و ردود أفعال عشوائية بنشوفها احنا نوع من الإبداع لإنها بتكون شئ جديد و منفرد بالنسبة لينا ، لكن مش كل حاجة جديدة و منفردة تبقا ابداع ، احنا درسنا فصل كامل عن الموضوع ده....و اتلغا قبل الإمتحان :) :)
نورتني صوووووت...

ELMOSTAFZ يقول...

خيط الحرير...
يا ريت يكون ده أجمل سر افضل عايش عشانه ، اني اقرب من ربنا ، ده أعظم سر...
بجد مش لاقي رد علي كلامك ده بجد لمسني من جوايا و خلاني احس براحة غريبة...
مش هقدر اقولك غير نورتيني أوي أوي أوي ، و أكبر شرف ليا وجودك هنا...
بس انتي اكيد عارفة تأثير كلماتك دي عليا و إلا ماكنتيش قولتيها...

خيط الحرير يقول...

بسم الله والصلاة علي رسول الله
أنا التي تشرفت فعلا بمنطق هذه المدونه وإن دلت علي شيء ...فلن تدل إلإ علي شخص مفعم بالحياة ..حساس أصيل خلق من فطرة سويه ..وإن كانت الشوائب تعلوه فلا تخف فالفرع يرد الي أصله..
راحتك أنا لم أجلبها لك بكلماتي ..بل هي مردود لما تأصل في خلق الله بيديه ..هل تقدر هذه الجمله ..إنها روحك التي نفخ لك فيها ...إنها روح الله فيك ..وعندما تستمع أسمه وتحدثك أحكامه..فإذا بكل الهموم زوال..
إذا الي زوال ولننعم بهذه الراحة للأبد..
ولكن الغبي من يدرك أننا فيها بلا إبتلاء والأغبي من لا يدرك أن اإبتلاء هذا بثمن عظيم ..فإلي ما لا عين رأت ولا أذن سمعت ولا خطر علي قلب بشر... ألا تتوق اليها مثلي ألا تشتم عبيرها لننال فيها ومنها مالم ندركه الآن في زيف هذه الحياة المترصدة لجحيمنا ..هنا وهناك
عافانا الله منكي يادنيا وأبدلنا ربنا النظر الي وجهه الكريم ..
سيشرفني حتما رأيك علي مدوناتي خاصة شيطان يرقص في بيتي..وحب الرمان.
ولنغرس نخله في جنة الله بقول.
سبحان الله والحمد لله ولا إله إلا الله والله أكبر..
اللهم زد من نخيلنا في جنانك ..ولا تورثها أحدا غيرنا ...

Story pain يقول...

كنت بقول على نفسى صريحة لحد ما قرأت بوستاتك...وأنا بقرأ ملف التعريف..قلت أنا نفسى أباه زيك..انا ليه كنت متخيلة أن الصراحةللدرجة اللي انت وصلتلها ممكن تكون جنون...حتى لو جنون ياريت الناس كلها تبأه مجنونة ...نفسى وانا بكتب ماشطبش علي كلمة..ولا اعمل دليت...بجد نفسى في يوم أبأه زيك

Story pain يقول...

رغم انى قرأت بوست واحد لكن متأكده ان كل البوستات هتباه بنفس العمق والصدق والابداع...البوست جميل جدا...فكرني بزحمة الافكار والكلام اللي بيتفقوا عليا وانا بحاول انام ..وفي الاخر اعمل نفس اللي عملته ..أكتب...بس طبعا مش بكتب كلام جميل زي اللي كتبه...أسلوبك في السرد رائع..رغم ان القصة قصيرة لكن ثرية باللغة والافكار المرتبة رغم عفويتها وتناثرها وتنوعها...بحب جدا اللون ده في الكتابة..النهاية كمان عجبتنى اوي..تسلم ايدك

سعيدة جدا بزيارتى للمدونة :)

ELMOSTAFZ يقول...

خيط من الحرير...
و عليكم السلام و رحمة الله و بركاته...
و عليه أفضل الصلاة و السلام...
و الله ما عارف ارد ع الكلام ده بإيه...
بجد في كل مرة بتعيدي توجيه عقلي نحو ذكر الله بطريقة جميلة جدا جدا تلين الحجر ، اكيد هازورك و اشوف كل مدوناتك ، ده لازم...
سبحان الله والحمد لله ولا إله إلا الله والله أكبر..
نورتيني و نورتي الدنيا بحالها...

ELMOSTAFZ يقول...

story pain...
انتي أول حد ف الدنيا يقولي انا نفسي ابقا زيك دي :) الصراحة اللي انتي بتقولي اني فيها دي جزء بسيط من اللي كنت بعمله زمان ، مع الوقت فهمت ان لو استمريت ع الحال ده هفضل بقية عمري لوحدي منبوذ ، مش كل الناس بتحب تسمع الحقيقة، بعض الأشياء لازم نمسك أعصابنا عندها...
أرائك الشخصية طبعا تقدري تكوني صريحة ف تقريرها براحتك ع الآآآآآآخر محدش يقدر يقولك حاجة ، إنما التسرع في الحكم ممكن يخليكي تجرحي حد مظلوم اساتي الظن فيه و قولتليه ظنك السئ ده بمنتهي الصراحة...
متعمليش ديليت بس فكري في اللي هاتقوليه نفسه هل صحيح ولا لأ ، الديليت يعني مجاملة ، و إوعي تجاملي حد ، المجاملات أوسع أبواب النفاق في رأيي...
للأسف يا ستوري حتي الصراحة لها حدود بتمنعها انها تنقلب لوقاحة...
الأفكار عندي انا بقا بتخليني انام اسرع ، لكن المشكلة لما يكون النوم متقطع عندي و كل شوية اصحا ببقا نص نايم ، بسمع حاجات غريبة و بشوف حاجات أغرب ، و لما بفوق بعرف اني كنت بخرف جامد :)
متشكر جدا لكلامك و يارب كل البوستات تعجبك...
نورتيني جداااا و شرفتيني بزيارتك......

Share |