السبت، ٨ مايو ٢٠١٠

مشهد 1


أحب حقا الجلوس بتلك المقاعد المنفردة...
ليس فقط لأنها بعيدة عن روائح العرق و حرارة الركاب ، لكن لأنها تعطيني مشهد بانورامي شبه شامل لعربة المترو...تعطيني الفرصة للتطفل التليسكوبي علي اي شخص داخلها دون أن يلاحظ...قد يراها البعض وقاحة ، و أنا لا أدري حقا كنه هذا السلوك لكنه شئ غريزي بداخلي...لاحظ أنني لا أرتدي أجنحة بيضاء و فوق رأسي سحابة مستديرة ، لكنني علي الأقل أخفي اهتمامي و تطفلي بمهارة خبير في شئ كهذا...أضف لذلك أنني لا أفعل شئ كهذا إلا من باب الفضول العلمي ، فالإنسان مهما بدا لك جوهره لا يمكنك إنكار كونه كائن معقد للغاية من الصعب التنبؤ بسلوكه..و الحصول علي ثوابت للسلوك الإنساني في نظري يعتبر إنجازا ألمعيا يستحق التقدير ، دعك من الفكرة القائم عليها علم النفس..مثير و استجابة و الفرد وسطهما ، هذه القواعد هي أساسيات تمهيدية للغاية..إن نظرتي للنفس البشرية تمتد إلي ماهو أبعد من ذلك بكثير..أعلم ما يدور بخلدك الآن ، إن الحياة بالتأكيد لسخيفة في نظر شخص يتناولها دائما كأحد أفلام ناشيونال جيوغرافيك ، لكن دعني أقل لك أنني أؤمن بما قاله العظيم جل جلاله(لا يغير الله مابقوم حتي يغيروا ما بأنفسهم)...
لدي شعور بأن لديك خبرة ما في ذلك المجال...سنري ، و الأن أختر لي شخصا ما و أرني مهارتك في التطفل...
أعتبر نفسك في مدونتك و أخبرني بتفاصيل مشهدك...

24 التعليقات:

أنا - الريس يقول...

ماشي يعمنا .. انا مش بعتبر ده تطفل بقدر ما هو مادة لدراسة الشخص المختار .. ولكن احيانا تقلب مع بعض الناس لتطفل ثم لغتاته ...

هقولك عن شخص قابلته اليوم بالصدقفة .. شعره مقلوب لورا دليل الاهتمام رغم سنه الكبير شفتيه سمراوين من شرب الدخان .. قصير القامة احتمال يدل علي انه داهيه .. سمين بعض الشي يدل انه متوسط الحال لأنه بكرش .. صحفي وذلك ما علمته منه .. يكره الجماعات الاسلامية ويعتقد انها سبب تخلف وان وجود طاغية افضل منهم .. معجب باسرائيل كدولة ديمقراطيه .. شعرت انه ربما مريض .. حاولت استفزازه باستمرار بالدفاع عن الجماعات الاسلامية وانها من حقها .. اخرجته عن شعوره وهذا يدل علي انتصاري عليه بعض الشيء .. علمت بعد خروجه من المكان الذي كنت موجود به عن طريق احد معارفه أنه ينكر وجود الله والله اعلم .. ادعو الله ان يهديه ويهديني ويهدي المسلمين اجميعين ويدل غيرهم علي الطريق القويم .

Tears يقول...

رأيت المدونة صدفة و اجتذبنى جدا اسمها

فكرة جديدة و جميلة


بالتوفيق

Tarkieb يقول...

بقى احنا جايين نقري انت اللى تحلب الكلام مننا ..ماشي ياعم حسني الظاهر ده طبع اي حد اسمه حسني

شوف يا سيدي كنا ماشيين في مظاهرة زمان على كبري جامعة القاهرة تقريبا كل الجامعة خارجة وفي وسط الزحمة لاقيت واحد شكله متخلف وماسك علم وبيقول تحيا مصر... عادي قلت قلنا مجانيين وبنحب مصر...الدنيا مطرت...قال الدنيا بتمطر والشمس طالعة حكومة معفنةبنت ستين في سبعين ... قلت له طيب وهو ذنب أم الحكومة اية؟ ايه التخلف ده أجري ياد العب بعيد .؟.. بعدها بخمس سنين بالظبط كنا بنتفرج على ماتش بيتلعب في سويسرا ..وكانت الدنيا بتمطر واللعيبة بتتزحلق... رحت قايل حظهم بجد وحش راح رد على واحد يعتبر بجد عالم روسي كبير وقال لى الشمس طالعة والدنيا بتمطر سويسرا دي معفنة... قلت وهي مال ام سويسرا ...قالي شوف يا سيدي احنا لما بيبقى في ماتش كدة في روسيا بنطلع نحقن السحاب قبلها بالطيرات عشان المطر ينزل قيل الماتش.. أفتكرت الراجل المجنون بتاع المظاهرة وقلت طيب مش ممكن يعني نظريا الواحد يطلع يسوق السحاب كدة زي الغنم وينزلها في الصحرا وبكدة تنحل مشكلتنا... قال ماهو ده اللي بيعمله اخويا دلوقتي في جيش الدفاع الاسرائيلي بعد ما هاجر هناك عشان يستيفيدو بيخبرته...وبيسرق السحب من الاردن ومصر وبينزلها في صحراء النقب او صحراء تانية... قلت سبحان الله الراجل اللي كان ماشي معانا عبقري وكان سابق عصرة واحنا اللي كنا مجانيين..

Unknown يقول...

سيادة الريس...
هو انا ماليش خبرة تعامل مع الناس المخرفة دي ، بس اللي اعرفه ان اللي يحط سياسة الدولة في الأولوية و يشكل ديانته بناء عليها هو مجرد انسان آلي غبي لا يفكر الا بعقل الدولة...شمال يبقا شمال يمين يبقا يمين ، بيني و بينك أنا مش برتاح للصحفيين أوي خصوصا اللي غاويين فلسفة...كلامهم غالبا متناقض و غير محكم ، حاجة زي دي ساعات بتوصلهم لتفكير متعمق ينتهي بالكفر و العياذ بالله زي أخينا ده...ربنا يقوي ايماننا و يرفع كلمة الإسلام بإذن واحد أحد...
منورني دايما سيادة الريس...

Unknown يقول...

تيرز...
يارب يكون البلوج عجبك...
شرفتني بمرورك و أهلا بيك في اي وقت...

Unknown يقول...

تركيب...
بصراحة أنا طبيعتي أساسا قلة الكلام..جايز تلاقيني بلت و بعجن كتير ف البوستات لكن طبيعتي ممل ممل يعني مبتكلمش غير كل فين و فين...قولت اخلي تصنيف مشاهد ده عشان أخلي الزوار تقول تجاربها ف كذا موقف...ماهو دور المدون اللي بيكتب و يستنا التعليقات بس مش بالعه بصراحة عايز حد أكلمه و اعرف منه شايف الدنيا ازاي و كده...
بس واضح انك شفت ف حياتك ناس ما يعلم بيها الا ربنا...الناس دماغها فوتت ولا ايه.. :)
.علي كل حال ربنا يستر و نخلص فترتنا في الدنيا و احنا لسة بعقلنا...
نورتني بجد تركيب و لك تحياتي الخالصة...

Mona يقول...
أزال المؤلف هذا التعليق.
Mona يقول...
أزال المؤلف هذا التعليق.
Mona يقول...

مش عارفة ليه كل كومنت أكتبه يطلع ملخبط لما أحط فيه كلمة أنجليزى فشلت الكلام الانجلش بلاش منه
بص ياسيدى أنا برضة عندى العادة ديه برضة من باب دراسة تصرفات الناس وبص معلش حأقولك عن حاجة يتميز بها الرجل المصرى و
هى نظرة الردار أو نظرة الجهاز الى بيكشف عن الى جوة الشنط عارف الى بيقى محطوط فى الحتت الشيك والمطارات - النظرة ديه يتميز بها الرجل المصرى دون عن كل رجال العالم بما فيهم الاجانب ولا يعمل هذا الجهاز فى عينيه الا حين تمر أمامه فتاة أو سيدة أى كانت والله حتى لو لابسة ملس تلاقى الجهاز اشتغل وله سرعات وضوابط معينة والجهاز شغال سواء الدبلة فى اليمين أو الشمال أو كانت ذهبية أو فضية وطبعا لو مافيش دبلة خالص و الجهاز شغال
وكمان يعمل مع أصحاب الذقون ومع من ليس لهم ذقون
ويصلح لجميع الاعمار يعنى من سن 12 كده لغاية 80
والله أنا مش بفترى أنا مافيش حتة رحتها وأقعد أستنى حاجة الا لما ألاقى التصرفات ديه وعلى فكرة أماكن الانتظار بتكون يا أما فى البنك أو فى مثلا دفع الموبايل أو الانترنت
والصراحة أنا سافرت كذا بلد عمرى ماشفت رجل ينظر بمثل تناحة (مش حأقول وقاحة) الرجل المصرى لاى سيدة
معلش هو ممكن تكون ملحوظة سخيفة ومش حتعجبك ولا تعجب ناس كتير بس للاسف ديه الحقيقة وأبقى لاحظها كده بنفسك لما تركب المترو المرة الجاية
وبالمناسبة أنا سافرت باريس ولما بنت أو ست بتطلع المترو لو لابسة حتى شورت محدش بيبص لها لانهم مشغولين بقرأة كتاب ولو حد بصلها الناس كلها تبص له بأشمئزاز على أنه متخلف
بس خلاص

Unknown يقول...

مدام مني...
عسكري أمن قدام جامعة القاهرة شوفته بيعاكس طالبة...و الأسوأ منقبة..و الأسوأ بيعاكسها عشان عنيها حلوة...
هوا انا لسة هلاحظها؟؟!!!الكل عارف و شايف و معترف بفضوله اللزج تجاه اي شئ و الله مش حتي الأنثي بس..إذا كنت انا الراجل بعاني من الموضوع ده معاناة شبه يومية في كل مكان و من أغلب الناس ، في البداية قولت أن انا مصاب بجنون الإضطهاد و إلا ازاي كل الناس عايشين كده وانا الوحيد اللي حاسس بالضيق من النظرات دي ، كل مرة تخلي دمي يفور أما تفكريني بحاجات ليا معاها أسوأ خبرات :(
أبسط مثال و ده شوفت بوست مكتوب عنه في مدونة مش فاكر اسمها...اما اكون فاتح الموبايل و داخل ع النت او بهبب اي حاجة لازم الاقي اللي جنبي باصص بفضول مفضوح بيبقا ناقص ينط جوا الشاشة معايا..
الموضوع مش محتاج اسافر بره عشان اقارن..و عموما بطلت اقارن من زمان منعا للحسرة و ايمانا مني بصعوبة تغيير بعض الخصال في الشخصية المصرية...
تحياتي الكبيرة مدام مني و منوراني دايما..

richardCatheart يقول...

جميله اوى المدونه دى يا كرستين بيل هههههه
والاجمل موضوع انك بتشوف الحياه ماشيه زى فيلم فى ناشونال جوجرفيك شانل
اخويا الكبير وسام كده زيك شديد التامل شديد التحليل لدرجه انه نضح عليا بس مش بنسبه كبيره الحمد لله علشان اعرف اعيش

عندى وحده ماعرفهاش اوى كانت معرفه طيارى بس كونت عنها انطباع قوى
من الشكل تبان متدينه منتميه لافكار متدينه
انما من معاملاتها تجدها ناعمه الصوت فى محاوله دائمه لبث شعور برقتها ومدى نعومتها وانوثتها
واعتقادى ومفهومى ان هذا الاسلوب بعيد كل البعد عن التدين وحتى لو موجود بنحاول نداريه حتى لا يطمع الذى فى قلبه مرض بما انها متدينه ياعنى
تجد لها كلمات زى يا مان وتكير بينما هى تستشهد بمشايخ
تجدها تتكلم عن التواضع بل شده التواضع بينما هى تكتب فى نفسها قصائد المديح الا منتهى
تتكلم دوما على الصدق وهى دائمه الكذب
تتعامل مع الناس وكانها لبسه طاقيه الاخفاء
تدعى الذكاء بينما تستخف بعقول الناس وهذا قمه الغباء
انطباعى عنها كان
مدعيه عند كلامه لاتملك الحجه
مدعيه ثقافه ودا نقص لانى المفروض الناس اللى هاتعرفنى وتحبنى يبقى زى مانا
مدعيه اخلاق وصدق وشجاعه بينما هى عكس كل ذلك
شديده التطفول كثيره الاسئله
رايتها بهذه العين رغم معاملاتى البسيطه معها
شكرا على البوست الحلو

Unknown يقول...

ريتشارد...
هوا انا معرفش مين كرستين بيل دي بس وفقا لكلام جوجل طلعت البطلة بتاعة فيلم اكوالايبريم ، طب أنا راجل علي فكرة و ربنا...لكن إلي حد ما عرفت طريق وصولك للمدونة كان منين :)
انا مش فاهم هي الأخت المدعية اللي بتقولي عليها دي فيها ايه كويس بالظبط...دانا من أول الكومنت مستني كلمة (لكن) بس الواضح ان مفيش خالص..يعني مافيهاش حاجة عدلة أبدا ؟؟؟لكن هرجع و اقولك كمية التناقضات اللي موجودة فيها مش أول مرة أشوفها ، لازم تلاقي نسبة في كل ديانة من المتدينين شكلا فقط..و في ناس يحملوا الدين اسما فقط لا شكلا ولا مضمونا كمان...و دول طبعا نسبتهم مش محتاجة مقياس دي واضحة زي الشمس..كل اللي هقدر أقوله لو علاقتك بيها سطحية ادعيلها ربنا يهديها و اهو تاخدي ثوابها...و لو شايفة انك مؤهلة تنصحيها اتكلي علي الله...
منورة المدونة دايما ريتشارد و أهلا بيكي ف اي وقت...

richardCatheart يقول...

هههههههههههههه
انا جايه من عالم تركيب
مدونتى الاصليه والمفضله للمتابعه

لاء طبعا عارفه انت راجل وسيد الرجاله
سورى كتبت الاسم بسرعه
كرستيان بيل اسم الممثل اللى انت حاطت صورته
اول مره اعرف ان بطله الفيلم اسمها كرستين بيل
دا تشابه اسماء غريب وفى فيلم واحد

اه ممكن ادعها طبعا
انما انصحها ماينفعش لانها منصحه الكون الاولى
ههههههههههه
ربنا يدهلها نفسها اللى شايفها احسن حاجه فى الكون
شكرا يا سيدى على الترحاب والذوق
كتر خيرك

Unknown يقول...

ريتشارد...
جوجل بيعدل كلمات البحث الغلط...عاملين حساب المغفلين امثالي و بردوا بغلط...معرفش اسم البطلة ايه بس اكيد مش كرستين ده تهييس مني :)
عموما اعملي اللي تقدري عليه تجاهها و ربنا يهدينا جميعا...

فاروق سحير ( فاروق بن النيل ) يقول...

حسنى محمد .........
أولا فكرة المدونة كما قالت الأخت تييرز أتفق مها تماما
جيدة وجميلة والنفس البشرية بها الكثير وقد قال العالم الدكتور أحمد عكاشة رائد الطب النفسى ورئيس جمعية الطب النفسى على مستوى العالم أن كل نفس بشرية تتكون من ثلاثة شخصيات :
1- الشخصية الإجتماعية:وهى التى تظهر بها أمام الناس
2-الشخصية الحقيقية:وهى التى تظهر بها أمام المرآةوحدك
3-الشخصية المثالية: وهى التى من المفروض أن تتبعها
والشخص الطبيعى يحاول أن يوفق بين الثلاثة شخصيات بمعنى أن تكون متقاربة جدا أو هى واحدة وبهذا يكون شخصا طبيعيا والمرض النفسى يأتى من الإبتعاد عن التوافق بينها
المهندس/فاروق بن النيل farouksam.blogspot.com

Unknown يقول...

الأستاذ فاروق...
عسي ان تظل المدونة فريدة في نظرك بإذن الله..
تقسيم الشخصية أول مرة أشوفه لكن فعلا حتي اللي مالوش خبرة في علم النفس ممكن يلاحظه..في مادة عندنا بندرسها اسمها علم النفس الإجتماعي و أغلب متناول دراستها من خلال الشخصية الاجتماعية و الحقيقية ، لأن بالفعل لا يمكن دراسة سلوك الإنسان إلا بإعتباره عضو داخل المجتمع ولو تمت دراسته منفردا لن نحظي بنتائج دقيقة..علم النفس يركز علي الشخصية الحقيقية بنسبة أكبر...اما الشخصية المثالية فهي الأنا العليا وفقا لنظرية فرويد الشهيرة عن الشخصية...
غالبا يحدث المرض النفسي نتيجة صدمة تعيق عملية التوافق بين الثلاثة أجزاء...
منور الدونة دايما أستاذ فاروق و أشكرك جدا علي المعلومات القيمة...

داليـ ـ ـ ـ ـ ـ ــــا يقول...

حسنى ازيك انا متابعه البوست بتاعك من اول ما اتكتب وبشرف معاك على التعليقات عندى قصص كتيره صعبه ومحرجه بس اسمحلى متكلمش عنها عشان انا عايزه مغلطش فى الناس عشان احتفظ بحقى عند ربنا وانا بصراحه لما بفتكر المواقف دى مش بقدر امسك نفسى بجد

تحيه ليك
تعرف انا متنبأه ليك مستقبل هايل هايل فى الكتابه

Unknown يقول...

آنسة داليا...
أنا بخير الحمد لله أزيك انتي...
مين جاب سيرة الناس ؟ أحنا بنتكلم علي سلبيات موجودة في الإطار العام..كان نفسي طبعا أقول ايجابيات لكن زي مانتي شايفة تليسكوبات السادة لم تلتقط الا السلبيات...لو عنيكي شافت شئ جميل قوليه ، أنا مشترطتش في البوست سرد المواقف ذات العلامة السوداء لكن للأسف فعلا كفة السلبية غالبة في الوقت الحاضر...زائد أن محدش ممكن يزعل لأني متأكد أن الأغلبية بشكل أو بآخر هتكون مرت بنفس موقفك أو شافته أو سمعت عنه...ولو محصلش كل ده بردوا هتلاقي الأغلبية عندهم إيمان بوجود العنصر السلبي المذكور في الموقف...
يسمع من بوقك ربنا و اعرف استمر...
نورتيني بجد و متتأخريش علينا تاني...

r يقول...

انا بفضل الكنبه المجاور للباب مباشره حتى عندما احتاج للوقوف من طول المسافه او لوجود واحده تستحق الجلوس-لا اركب سوى عربه السيدات
مش فاكره مواقف كتيره لانى طبيعى مش بركبه كتير
لكن اتذكر راكبه اجنبيه شابه ظلت تعمل العقله ومتعلقه فى الماسوره بأيديها اعلى الراكبات وتتمرجح تماما كالمجانين
كان نفسى اديها قلمين علشان تثبت
لكن طبيعى ما حد اتكلم وانا انشغلت بالكتاب اللى طبيعى كان معايا بقرأه

واكتر شئ ممكن اركز فيه التعبيرات اللى بتتكلم فى الموبايل بتكون تعبيرات هايله
خاصه لو كان صوتها غير مسموع هتشوف مسلسل قدامك
ودا شفته كتير

كل التحيه

Unknown يقول...

آنسة بسنت...
للأسف الأجانب واخدين حقهم في البلد دي زيادة عن الحد المسموح...ولو فتحتي بوقك بنص كلمة هيقولك بتعطلي حركة السياحة و بتشوهي سمعة البلد في الخارج و هتتجابي من قفاكي لا مؤاخذة...
تعبيرات الموبايل مش بركز فيها أوي..لكن لو صوت غير مسموع يبقا غالبا هشوف مسلسل تركي شفته 85748754 مرة قبل كده...
تحياتي الكبيرة لكي و منورة المدونة دايما...

راء يقول...

لم أر كائنات أكثر تعقيداً من البشر..

ألغاز متحركة على الأرض..

وهو كان أحد تلك الشخصيات المحيرة كلياً

عندما تنظر إليه تظنه شخصاً مريباً

ربما يكون مطلوباً للعدالة أو شارب حاجة أصفرة..

والغريب أن ملامحه مرهقة بشكل غير اعتيادي

فيبدو اكبر بكثير من عمره..

عقله يبدو كآلة لا تكف عن التفكير


ينظر لمن حوله ويتطلع إليهم جمبعاً بنظرة

لا مبالية ولكني أراها محللة للشخص أمامه

يرتسم شبح ابتسامه من وقت لآخر على وجهه

تلقائياً..يبدو انه تذكر خاطرة ما

سمعت من بجواري يقول أنه مريضاً نفسياً..

لم اتعجب فالعالم بأكمله مصاب بشيزوفرينيا..

جميعنا مرضى وبداخلنا كم هائل من التمرد

ولكن نكبته حتى نبدو بشكل لائق..

هو يتظاهر بكونه غير مبالي

لكنه يهتم كثيراً بما حوله

في غمرة نظري إليه جعلني اتساءل

ما الذي يبقيني بكامل قواي العقلية حتى الآن

كيف لي ألا افقد عقلي في هذا العالم

في تلك اللحظة ينظر إلي

ويدرك تحليلي لشخصه

فيجفل وينطلق خارجاً من عربة المترو

____________

قلتلي المدونة مدونتك
وادي اخرة اللي حصل بدأت أهلوس!!!!!!!!

راء يقول...

معرفش هوا مين بالظبط
بس بيتهيألي ده الشخصية اللي بتتكلم عنها في الحلقات
بتاعت مذكرات مريض نفسي
اسفة ع التطويل

Unknown يقول...

آنسة مقهورة...
البطل بيمثل نسبة كبيرة من البشر عايشين حوالينا و بنشوفهم كل يوم...تحليلك لملامح الشخصية رائع و صحيح كليا ، و أكتر حاجة عندك حق فيها...إنه بيكره حد يحلل شخصيته أو يفهم حتي بيفكر ازاي أو ف ايه...
الوعي نعمة كبيرة من ربنا ميقدرهاش الا اللي يفقدها..أكبر خطأ انك تتمني ولو عرض واحد من أعراض المرض النفسي ، اوعي تصدقي عبارة المجانين في نعيم...ألم المرض النفسي يفوق أي ألم لكن البشر الطبيعيين ف نظرهم شئ رائع و نادر...محدش بيحس بحالة الا اما يعيشها بكل جوارحه...
عايز أقولك حاجة كمان...أنا بعشق الكومنتات المطولة ولو حتي أضعاف أضعاف البوست نفسه ، المدونة مدونتك و هاتفضل مدونتك...
نورتيني بجد و الكومنت بتاعك رائع...

انت تسال والكمبيوتر يجيب يقول...

مدونه متميزه...سررنا بالمرور زلذلك نوجه لك هذه الدعوه وننتظر التواصل معنا
نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com

Share |