السبت، 15 مايو، 2010

...الدهب الصيني رخص ولا ايه


مش جايب حاجة جديدة طبعا كنت نايم علي وداني و كله عمال يلبس تيجان وانا جاي بعد ما الموضوع اتهرش...
مش مشكلة المهم نعمل اللي علينا و نخلص ضميرنا...
معروف ان انا بكره الرسميات الاجتماعية حتي لو مع أقرب و أعز الناس ليا...عشان كده هاعتبر الكام بوء دول تقضية واجب لأن الكل عارف معزته عندي و مكانته بالنسبالي مش محتاجة تاج و بتاع...
أه طبعا التاج وصلني من سليلة الحسب و النسب سيدة القصر و سيدة البحور السبعة و الأقمار السبعة...و الأقزام السبعة بالمرة الأنسة رضوي (مقهورة درجة أولي) ، أدعولها الله يباركلكوا عشان الامتحانات بقا و كده...
بيقولك يا سيدي :
حسب مافهمت من التيجان المتحدفة ف المدونات الأخري ان لازم اكتب ست أسرار قد لا يكتشفها من يقابلني للمرة الأولي...علي أساس ان انا اجتماعي اوي و بقابل كل يوم 3874 واحد كده ع الماشي...
أول سر يا عم الحج :
السن...و السبب أني طويل و اهبل و غالبا بسيب دقني تطول لحد مابقا شبه الكفار ، بالتالي بلاقي ردود فعل سخيفة بعد كده تجاه اني لسة مقفلتش تسعتاشر سنة و بالطول ده.
تاني سر يا ست هانم :
طريقة التفكير...غالبا ، مش غالبا هوا دايما بصراحة ياخد الطرف التاني عني إنطباع اني غبي لا أفقه شئ في أي شئ ، مش عارف هل تعبير الغباوة مرتسم علي وشي دايما ولا عشان مبتكلمش كتير ولا أنا فعلا حمار...و للأسف لا يتم تعديل ذلك الإنطباع لأني مش بشوف الطرف الثاني مرة تانية...بيفلسع ، لكن نظراته من بعيد دايما بتقولي (اتفو من كل قلبي)....علي كل حال معتقدش اني حتي لو قابلته تاني هغير إنطباعه عني ، مش بعيد أخليه يقين عنده...
تالت سر يا بشمهندس :
الغرور ، و دي صفة يوصف بها كل من يقتصد في كلامه مش عشان أكتسب وقار ولا حاجة...ده عشان غالبا اللي يجي يتكلم معايا بيختار أوقات زي وشه ، الدنيا حر عندي مشاكل المترو زحمة قاعدين ف محاضرة أي بلوة و ده حبكت معاه يرغي دلوقت...مش عارف الناس دي فكرتها عن الكلام ايه بالظبط ، نفسي يدخلوا البلوج ده و يشوفوا أنا رغاي ازاي و يفهموا وجهة نظري...سبب أخر بردوا إني لا أستسيغ الودودين للغاية خصوصا لو كان لسة حد معرفة سطحية بيني و بينه و يروح جايلي البيت كأنه عشرة عمر...ولو قولتله نتقابل في مكان تاني يستخف دمه و يقولي انتا معندكش غدا ولا ايه.
رابع سر يا آنسة :
الخجل و التوتر ، بما ان الخجل هو نوع من التوتر يبقا ندمجهم سوا احسن...و الخجل مع السيدات و الآنسات اللي ربنا مباركلهم في حلاوتهم شوية ، و التوتر...في كل وقت ، لذا بتجنب أسلم علي أي حد لأن أيديا عرقانة دايما حتي ف عز البرد.
سادس سر يا كابتن (علي سبيل الاستهبال) :
هوا بالظبط خامس سر لا يختلف عنه في شئ...
نيجي لنظام الإهدائات اللي بيفكرني ببرنامج اليوم المفتوح بتاع زمان...القائمة كالآتي و الروابط ملطوعة علي شريط المدونة الأيمن...
-مدام مني (A space of my own)...طبعاعشان الكبيرة بتاعتنا و ف مقام أختي الكبيرة أو والدتي هيا تختار بقا عشان متحرجش أنا.
-آنسة رضوي (طالبة مقهورة...درجة أولي).
-سيادة الريس(أنا الريس).
-آنسة داليا(الأحلام الضايعة و المستحيلة).
-آنسة شيماء علي (قهوة بالفانيليا).
-تركيب (عالم تركيب).
-آستاذ إسلام (حصان المرجيحة).
-أنتخ مصري..بقاله تلت اسابيع مش ظاهر.
-ريتشارد(صحيح مالهاش مدونة بس شخصية مرحة و تستاهل تاج).
-دندنة قيثارة الوجد(ليس لها مدونة ولكنها تستحق تاج مرصع بالماس).
و ناس تانية كتير عرفت عن طريقهم يعني ايه تدوين و مدونات...
طبعا دول زيادة عن ستة بس هطنش زي ما آنسة داليا عملت و أعمل فيها عبيط...
موضوع بقا اني ادخل مدونة مدونة و اسيب كومنت تنبيهي عن التاج...أعذروني فيها لأني داخل من نت الموبايل بقالي شهر عشان الجهاز في الصالة و امي هاتجبني من قفايا لو عرفت اني عامل مدونة أساسا...
ياريت الكل يعتبر التاج وصله بمجرد رؤيته للبوست ده...
بعد الامتحانات هقعد ليل نهار علي قلبكوا...
تحياتي للجميع...

14 التعليقات:

داليـ ـ ـ ـ ـ ـ ــــا يقول...

ههههههههههههههههههههه
مش بقلك بتموتنى من الضحك
والله الا هيسمعنى الوقتى هيقول البت اتهبلت
وبعدين انا بستعبط واتسبهل دانا بعمل مش واخده بالى

داليـ ـ ـ ـ ـ ـ ــــا يقول...

وبعدين بردوا انا سعيده انى من الناس الا اخترتهم عشان تهديهم التاج

داليـ ـ ـ ـ ـ ـ ــــا يقول...

اخر تعليق بقه
عشان اقلك مبروك التاج ياسحس وعقبال ما تهدى العروسه بتاعتك تاج

ELMOSTAFZ يقول...

آنسة داليا...
مختاركيش ازاي بس و احنا عندنا كام داليا :)
و بعدين أنا حبيت انك ملتزمتيش بشروط التاج فرحت مقلدك لإن بيني و بينك من هواياتي عدم الإلتزام بالشروط و القوانين ولو التزمت بشئ منها يبقا عشان أنا عايز التزم بيه...
هوا العرايس دلوقتي بقوا بيهادوا بعض بتيجان ؟
هيا الشبكة بقت تاج بدل دبلة و محبس و الكلام الفاضي ده ؟ طب و الله دي حتي تبقا اشيك و فيها كده تقدير للعروسة...بس طبعا العيلة هاتقول اتوكس علي عينك...تاج ايه يا فرفور انتا عايز الناس تاكل وشنا ؟
لكي تحياتي و...كده يعني

الشـوكة الــنـاعـمـة يقول...

بص بقا انت خاليت اخويا شخط فيا من كتر الضحك
ايه خفه الدم دى امال لو مش مريض نفسى كت عملت ايه
لا بجد دمك عسل اخر حاجه
دومت بكل خير

ELMOSTAFZ يقول...

الشوكة الناعمة...
يا ستي الله يكرمك أنا معرفش أن الضحك عندك محظور ف البيت...
(إدجار ألان بو) عمل أسود قصص الرعب و أرق قصائد الحب ، الموضوع متعلق بالتوبيك المطلوب الدخول في تفاصيله...وانا بصراحة لما شوفت موضوع التاج ده ضحكت و قولت ايه الحلاوة دي..هوا الدهب الصيني رخص ولا ايه ؟
الغريب ان كتر المذاكرة بيخلي الطلاب تتوتر و تقلق...معايا فترة الإمتحانات دي رغم قلقي و توتري لكن دماغي بتلسع و فيوزاتي بتضرب و بفضل أضحك ولو حتي بدون سبب...جايز عشان كده طلع البوست ده بطابع مختلف...
لكي تحياتي و...كده يعني

طالبة مقهورة ..درجة أولى يقول...

نيهاهاهاهاهاهاهاااااااي

حلوة الاقزام السبعة يا مظبطني يا سحس ^_^

معلش يبني اعصر على نفسك لمونة..وخدهم ع قد عقلهم انا جالي التاج كده المرة الجاية هبقى اظبطهولك مخصوص

مممممم.. حسيت انك انطوائي جدا وعشان كده بياخد الناس عنك فكرة غلط وبيفلسعوا..مع اني انا رخمة اساسا ومبفلسعش بسهولة ^_^ يعني على قلبك

تعرف انا عكسك ف موضوع الخجل والتوتر..ايدك بتكون سخنة دايما..انا ايدي في عز الحر ممكن تلاقيها متلجة بمعنى الكلمة..ده مش بيعقدني بس بيخلي الكل يتريق عليا ويقولي كلي شوية ..وهما اصلا مش فاهمين اني عاملالهم مجاعة فا لبيت ^_^ الشكل ده يا أخي خداااع

يللا العواف عليك

ومتخرجش حد م المدونة غير اما يدعيلي..انت حر ذنبي ف رقبتك :P

ELMOSTAFZ يقول...

آنسة مقهورة...
مرة جاية ايه عليا الطلاق ماهتكون في مرة جاية...كفاية الفضايح اللي اتقالت ، مش فاهم هوا عشان آخد تاج لازم أدفع تمنه فضيحة :)...هاتستغربي لو قولتلك اني كان ممكن أكتب أكتر من ست أسرار بس ساعات الصراحة الزايدة ممكن تغير الفكرة الصحيحة المأخوذة عني بدون قصد...وانا مش عايز أجازف بتشويهها عشان تاج لا راح ولا جه :)
يعني من الأسرار اللي ممكن محدش ياخد باله منها لما يقابلني...إني مقدرش أستحمل التفاعل البشري لمدة أكتر من خمس دقايق ، يعني لو قابلت حد سواء صاحبي أو غريب بكون عايزه يمشي و يحل عني بعد خمس دقايق من وصوله..و أحيانا أقل ، و بفضل مستني منه كلمة يلا سلام بفارغ الصبر...
بس ده سر طبعا اوعي تقولي لحد :)
حكاية العرق دي مش مسببالي أزمة في التعامل مع الناس أد ماهيا مسببالي أزمة ف ورقة الإجابة في الإمتحانات..ممكن أخلص كيس مناديل ف امتحان واحد عشان أحافظ علي ورقة الإجابة ناشفة..كان عندي ف لجنة م اللجان مراقب سخيف شاف شكل ورقتي راح قالي (انتا تافف عليها ولا ايه)...كنت فاكر الموضوع زيادة أملاح بس في دكتورة قالتلي انها حالة نفسية أدتني عشانها كام دوا كده طبعا معملوش أي بتنجان و بطلتهم بعد كام شهر...
أمي لو شافتك بإيدك الباردة دي هايكون أول تشخيص تقوله انك عندك أنيميا :)
لكي تحياتي و...كده يعني

richardCatheart يقول...

هههههههههههههههههههههههه
واد يا كرستييييييييان قوم ذاكر
دا صوت قلب الام
هههههههههههههههههههههههه
والله جميل التاج واجباتك جميله
بس والله بالعكس مابشوفكش ابدا غبى بالعكس انت ذكى زياده عن سنك واهتمامتك مختلفه عن سنك
بس يمكن انت بتقابل ناس خبؤاااااااااااات

متشكرين يا سيدى على كلامك الطيب
وعلى التاج هاشيله فوق راسى كتر خيرك
يالى مش مستفز

ELMOSTAFZ يقول...

ريتشارد...
أنا لو سمعت امي بتناديني كرستيان هفتكرها بتشتمني :)
مش شايفاني غبي ؟ ده يدعم فكرة ان شكلي يوحي بالغباء أكتر ، و زي ما آنسة مقهورة قالت..الشكل ده خادع أوي...بس طبعا اللي عايز يعرفني كويس لازم يجادلني في شئ يستحق الجدال من غير مايركز بقا ف شعري المنكوش أو دقني الطويلة أو هدومي المكرمشة ، نوادر من أقابلهم هكذا و طبعا صاروا أقرب أصدقائي...
خبؤات دي واضح انها صفة ذميمة لسة نازلة السوق جديد...
انتي مجربتيش شخصية المستفز ف وضع التشغيل فاحمدي ربنا لإني خسرت ناس كتير بسببها ، و كسبت هدوء أعصابي و فششان غلي...
لكي تحياتي و...كده يعني

Mona يقول...

أولا أشكرك على أنى أول أختيار ربنا يخليك طبعا مقام الاول لا يعلو عليه وربنا يخليها لك فخلينا فى الاخت الكبيرة علشان لا نزعل الامهات :)
بص أنا ماليش فى حوار التيجان ده خالص وكان جالى أول مافتحت المدونة ومعملتوش عمرى
بس أنا عجبتنى طريقة عرضك للاسرار بجد ضحكتنى موت
ربنا معاك فى الامتحانات ويوفقك أن شاءالله ومستنينك تقعد على قلبنا
تحياتى

ELMOSTAFZ يقول...

مدام مني...
مقامك عندنا طول عمره عالي و هايفضل عالي...
آسف عشان مش متوفر الايام دي لكن عندي ظروف مخلياني بعيد عن التعليقات شوية...
أسف علي التأخير و لكي تحياتي الكبيرة...

richardCatheart يقول...

http://richardcatheart.blogspot.com/

فتحنا البلوج وربنا يقدرنا ويستر

ELMOSTAFZ يقول...

الف مبروك ريتشارد...
كام يوم و هتلاقيني بنطلك هناك زي البرغوت بس ادعيلي بس اعدي الكام يوم دول علي خير...
لكي تحياتي و خلافه...

Share |