الخميس، ١ مارس ٢٠١٢

نظرية الاستقرار...



زمان ، وانا صغير...

زمان ، أيام ما كنت بحب اسافر البلد مع امي و ابويا ، و ايام ما كانت الكنبة الخلفية بتستوعب طولي ، و أيام ما كان عندي البال الرايق لإني انام عليها و اتفرج ع الدنيا من ورا الشباك و هيا بتجري مننا ، و الشمس و هيا بتجري ورانا بإصرار غريب ، مكنتش بسأل نفسي ازاي الدبان بيطير جوا العربية رغم السرعة اللي ماشيين بيها ، و مكنتش بسأل نفسي ليه صوت المحرك بيخليني انام بعمق و احلم كمان ، كنت عارف بس اني بحب الجو ده و خلاص ، كنت عارف انه رغم السرعة اللي ماشيين بيها لكن مطمن و واثق ان ابويا مش هايلبس بينا ف عمود أو يقع بينا في الترعة ، ولو حصلت حاجة من دي هكون نايم و مش هحس بحاجة...
كنت عارف بس الحاجات اللي محتاج اعرفها عشان اطمن و بالي يرتاح ، و أي حاجة تانية مش مهم...



زمان ، وانا مش صغير...


لكن طبعا ، بمرور الوقت تراجع ترتيب الترابط العائلي في قايمة أولوياتي ، أساسا انا من زمان عندي مشكلة ف تحديد هوية قرايبنا ، ولو شفت ابن عمي ممكن افتكره ابن خالتي أو ابن بنت خالي أو أيا كان ، ناهيك عن نسيان الأسامي و الوجوه... 
القصد ان زياراتي للبلد قلت كتير ، ده غير ان الكنبة الخلفية مبقتش تساعني لا نوم ولا حتي جلوس ، كبرت و كبرت معايا مخاوفي و تساؤلاتي ، انا دايما بقول ان الخوف بيكبر و بيتطور معانا لصورة أنضج تلائم المرحلة العمرية اللي بنعيشها ، لكن في النهاية بتفضل جذوره نابعة من الطفل الصغير اللي جوانا...



دلوقت...

الجهل ساعات كتير بيكون له سحر جميل ، الجهل بالأسباب ، ساعات بحس ان لو مكناش عرفنا الحقيقة العلمية للظواهر الطبيعية كانت فضلت محتفظة بسحرها ف نظرنا...
لكن للأسف مؤخرا انشغلت بالسعي ورا الإجابات ، لدرجة اني بدأت اخاف ان الإجابات تنتهي رغم يقيني انها لا يمكن تنتهي...

عرفت ان الدبانة لا يمكن كانت تطير في العربية لو مكانتش السرعة ثابتة ، نفس السبب اللي بيخلي كل شئ جوا الطيارة مستقر طالما السرعة ثابتة...

نفس السبب اللي بيخليني انام علي صوت المحرك ، و صوت الباجور ، و صوت الغسالة ف برنامج العصر ، و صوت القطر ، و أي حاجة مزعجة بس المهم ان الإيقاع ثابت ، و السرعة ثابتة...
لازم السرعة تفضل ثابتة ، لازم...
و إلا كل حاجة هاتطير من مكانها...
و رغم انزعاجي وقت الثورة من الناس بتوع "خربتوا البلد" بس كنت متفهم وجهة نظرهم ، الناس دي مش بتفتقد الفساد ولا حاجة ، الناس دي بتفتقد الثبات ، الاستقرار ، أيا كانت الحالة اللي كانت عليها حياتهم بس الاستقرار بالنسبالهم كان شئ مطمئن ، الفساد بالنسبالهم كان صوته مزعج صحيح بس كان إيقاعه ثابت ، و سرعته ثابتة...
و عشان كده كان رد فعلهم طبيعي جداً مع أول تغير في السرعة ، لإن كل حاجة طارت من مكانها...

15 التعليقات:

الشوكة الناعمة يقول...

جميل اوى يا حسنى

Ahmed Ali يقول...

ملعوبة يا واد .. روعة و سلسة تسرسبك للآخر بكل هدوء و فيها حكمة بطريقة بسيطة

غير معرف يقول...

رائع !
إنّ أكثر ما يروقني في مدونتك وصفحتك الفيسبوكيّة ، ويجعلني أحتفظ بها في مفضّلتي - وإن كنتُ ضيفة صامِته - أنّك تتكلّم بلسانِك عن ذواتنا ! فتخاطبُ الطفل الّذي بداخلنا والكهل الّذي يستوطننا .. فأثناء قراءتي أقول لا بدّ أنه يعرفني ، لا بدّ أنه يتكلّم عني ! وأطمئن شكوكي بالبُعد الجغرافي بيننا :)

هبة فاروق يقول...

الربط بين نظريه الثبات فى الحركه ونظريه الثبات مع اصحاب خربتوا البلد رائع
استطعت الربط بين الحالتين بصوره بسيطه وصلت المعنى بسهوله
اعتقد ان نظريه الثبات نعشقهانحن العرب ونخاف من التغيير لانه مجهول بالنسبه لنا ونخاف من المجازفه لذلك سنظل ثابتين كقطع الاثاث لن تحركنا الا ايدى الغرب
اتمنى ان تتغير المفاهيم ونصبح اكثر قدره على التغيير والتطوير والمجازفه والجرئه عسى ان ينصلح الحال ونستبعد نظريه الثبات جانبا
ولو انى احب مثلك ان اغفل على صوت الباجور وصوته الثابت
استمتعت جدااا ببوستك الرائع

كرابنتس يقول...

اية الدماغ العالية دى
ربط ازاى بين حاجتين مختلفتين جدا بالسهولة دى و ربط و تشبيه صح جدااا

يبئا قولنا اسم البرشام اللى بيتوصف للمريض النفسى يمكن يعمل معانا شغل

Israà A. Youssuf يقول...

حلوة أوي أوي أوي.. التسلسل جميل والربط أحلى :))

عبد الرحمن سالم يقول...

ملعوبة ... زي ما أحمد بيقول :)

.:: مــ ج ـروحـ،،ــة الــفــؤاد ::. يقول...

يا عم على قوانين نيوتن ...غاوي فيزياء حضرتك ؟......بس اسلوب رائع

Ali Soliman يقول...

لا ماشاء الله عليك
اسلوب رائع وموضوع جميل ووصف مثالى كالعــــــــادة
تحياتى ........

مسابقات أدبية شعر وقصة ورواية ومسابقات فنية يقول...

نظرية تسحتق فعلا

مسابقات أدبية شعر وقصة ورواية ومسابقات فنية يقول...

رؤية جديدة تستحق

Sara يقول...

حلوة فكرة الدبانة دي .. معبرة :D

و نظرية جديدة فعلاً :)

تسلم ايدك

L.G. يقول...

طيب تفسر بإيه إن الدبانة ممكن تطلع من الشباك وتكمل طيران مع الرغم من تغير السرعة من وة العربية لبره العربية ؟
طيب تفسر بإيه رد فعل الناس منقسم فيما يخص حالة الاستقرار يعني مش كل الناس قالت خربتوا البلد ومش كل الناس قالت ثورة ثورة حتى النصر ؟
انا واحدة من الناس حياتي لم تتغير ولا استقراري هي هي قبل وبعد الثورة ..
أعتقد أنها تميل لنظرية الخنوع والضعف والوهن
أما الدبانة ليس لثبات السرعة ولكن لأن الدبانة تكتسب سرعة السيارة نفسها داخل السارة ويزيد عليها رفرفة جناحيها فتطير داخل السيارة
حد فاهم حاجة :)
تصدق انت حتبوظلي دماغي وهي مش ناقصة
تحياتي

Alaa Al-Masrey يقول...

تفسير ملهم للحياة والسلوك البشري : )

Alaa Al-Masrey يقول...

تفسير ملهم للحياة والسلوك البشري : )

Share |