تحت شباك أوضتي عدل دكانة لنجار مسيحي وقور و محترم أوي اسمه (عم فتحي) ، و تقريبا هوا اللي شطب شغل النجارة ف شقق بيتنا كلها...
النجار ده طول عمره راجل ف حاله و بيحب شغله جدا وانا بصراحة بحترمه أوي عشان كده رغم إنه جايبلي صداع بإذاعة الشرق الأوسط اللي مشغلها علي مدار الساعة لدرجة اني اترجيته قبل كده يشغل نجوم اف ام بدالها و شغلها فعلا بس تقريبا لمدة شهر و رجع تاني للشرق الأوسط :)
من كام يوم كنت راجع من امتحان و لقيت قصاد دكانته 2 عمال حاطين بريمة في الأرض و شغالين لف و حفر و (هيلا هيلا ، يلا يا عفروتو) ، انا ف الأول مفهمتش بس ابويا من مصادره الخاصة اللي نفسي اعرفها قالي ان الراجل اكمنه كل يوم متعود يرش الشارع 6427243424 مرة بدأ يشتكي من فاتورة المية العالية اللي بتجيله ، ده غير انه حاطط قلل مية كتير قصاد محله عشان الناس تشرب و عشان العيال ولاد الجيران يشربوا منها وسط ما بيلعبوا ف الشارع و كمان حاطط كام قصرية زرع قصاد المحل ، يعني بصراحة كل مابعدي من قصاد محله بحس براحة نفسية من منظر القلل و الكام زرعاية دول بس...
المهم مؤخرا لمعت فوق راسه لمبة منورة و قال بس يا معلم انا اعمل طرومبة مية احسن من خراب البيوت ده...
و تم الموضوع فعلا و عمل الطرومبة...
و نظرا لإن أوضتي بتحتل موقع استراتيجي مطل علي الشارع لدرجة إني تقريبا بحس اني قاعد ف الشارع مش ف أوضتي ، فساعات كده وسط تركيزي ف المذاكرة تتناهي لمسامعي شوية أحاديث جانبية بين الجيران و بعضهم ، و منها الحوار اللي دار بين عم فتحي النجار و بين السيدة الفاضلة جارتنا أم خالد...
-يا عم فتحي.
-أيوة يا ام خالد.
-إي ده انتا ركبت الطرومبة خلاص ؟ (قال يعني مش عارفة).
-آه خلاص.
-يعني بترش منها كده يعني و عادي ؟
-آه تمام زي الفل.
-طب الواد خالد بيقولك متبقاش تملا القلل منها عشان هوا بيشرب من القلل.
-لا مانا مليتها خلاص.
-طب ماهو بيشرب منها.
-طب اعمل ايه مليتها خلاص.
-طب ماهو بيقولك متملهاش بعد كده منها.
-طب إبقوا هاتوا مية حلوة بقا من عندكوا وانا املالكوا منها.
بأمانة الراجل لآخر لحظة كان بيتكلم بهدوء بس انا كنت حاسس ان من جواه هايطق ياعيني :))
جدير بالذكر إن خالد ده واخد وصلة من السويتش اللي عندي ف البلكونة و مشكلة السويتش ده انه بيهيس كتير بس الناس اللي ف الشبكة كلها صبورة إلا خالد ده مجرد ما النت يفصل اسمع الإنذار النووي جاي من العمارة اللي قصادنا...
-يا حوسنا ا ا ا ا ا ا ا ا ي ، يا حوسنا ا ا ا ا ا ا ا ا ا ي.
-إنتا بتزعق ليه ؟ هوا يابني حد قالك إني اطرش ولا انتا فرحان بصوتك ؟
عليا الطلاق جت فترة بقا يجيلي ف الكوابيس و ساعتها فصلت الأسلاك كلها و وديت السويتش لصاحب الشبكة و قولتله يا خالد يا السويتش ، انا بقيت مش عارف انام و ربنا كل ما عيني تغفل صوته يفزعني حتي لو مش هوا اللي بينادي بفتكره هوا و ابص من البلكونة الاقيه حد تاني بينده علي حد غيري...
المهم ان بعد ما السويتش اتصلح رجعته عندي تاني و عدت فترة لا بأس بها من الهدوء لدرجة اني مكنتش مصدق نفسي و ربنا ، لكن بردوا مفيش فايدة ، بعد 3 ايام الاقي نفس النداء بنفس طبقة الصوت المزعجة...
-يا أخي ارحمني بقا ، وانا معنديش ف الشبكة غيرك ؟
-اصل انا خارج دلوقت و كنت عايز اقولك طفي السويتش شوية عبال ما ارجع خليه يرتاح احسن يرجع يهيس زي الأول.
ربنا يسامحك يا ام خالد...
6 التعليقات:
انا أول مرة ادخل مدونتك الجميلة
و عاجبانى فكرة إنك تستعمل دراستك فى علم النفس و تدخلها فى تدويناتك ما هو إحنا بشر تحكمنا نفوسنا و علم النفس لازم يدخل فى كل حاجة لو عايزين نعيش كويس
أما البوست دة بالتحديد فهو يموت من الضحك و حقيقى جدا فنحن شعب يعشق الضوضاء و لا نعرف نعمة إسمها الهدوء إللى ممكن تبقى مفيدة جدا لنا على فكرة
ربنا يكون فى عونك على جيرانك الطيبين الرائعين بس مدمنى الدوشة
تحياتى
لذيذه ام خالد دى
ههههههه
يارب تكون الامتحانات بتمر بسلام
جميل اوى البوست
بس بجد الله يكون فى عونك
قدامك حل من الاتنين يا اما تعزل او تخلى خالد ومامته يعزلوا
شهر زاد المصرية...
انا سعيد جدا بوجودك ، و يارب دايما تزوريني ، لإني الوقت اللي فات بعدت عن التدوين فترة كبيرة ، و أعصابي بجد كانت تعبانة و كنت كإني تايه ، و نفسي استرجع أجواء التدوين الجميلة من تاني مع كل الناس اللي عرفتها و اللي هعرفها بإذن الله...
انا تقريباً ماليش ف حاجة ف الدنيا دي غير ف علم النفس ، يعني حمار في اي حاجة تانية و تلاقيني ف علم النفس اربطلك كل المجالات بيه ، لو فتحتيلي موضوع عن الطبخ بردوا هاجيبلك علاقته بعلم النفس :))))
و الله انا مبقتش قادر احدد عن نفسي ، ساعات بحب الهدوء و ساعات ببقا بعشق الزحمة و الدوشة و بعرف اركز فيها أوي ، بس طبعاً ده ف أوقات و أوقات...
نورتيني بجد :)
مرمر...
مش عارف الحقيقة مرت بسلام ولا لأ يمكن اما النتيجة تظهر ابقا اقولك :)))
نها صالح...
لا و ليه بس كده ، صحيح جيران مزعجين بس محدش عارف جايز يكونوا ارحم من غيرهم كتير ، و بيني و بينك ممكن يوحشوني انا عارف نفسي بحب الذكريات حتي لو كانت سودا :)))
إرسال تعليق