الأربعاء، 1 يونيو 2011

إي اللي انا كاتبه ده :)))




-بص القاعة دي تكون جاهزة قبل الساعة 8 ، بس هحاول اشوف حد من الرجالة يجي يساعدك.
وقفت قصاد القاعة بشمر كمامي و بفكر ، قاعة طويلة عريضة مليانة صمت ، مليانة فضا ، مليانة حاجات كتير... 


-شوف يا خويا البت بنت رحاب لابسالك ايه ، بنات آخر زمن.
-الجو حر نار ، مفيش تكييف هنا ؟
-و هيا دي عروسة دي ؟ دي يخوفوا بيها العيال الصغيرة.
-هوا في بوفيه ولا هانقضيها حاجة ساقعة ؟
-يا رب يكون في جامع قريب الحق اصلي العشا.
-اي الأغاني البيئة دي ؟ طب دانا ف خطوبة أختي كنت عاملة كوكتيل أغاني....
-ماما فين الجاتوه ؟
-و الله صاحبات العروسة مش بطالين بردوا يجوز نسميهم مزز.
-شوف ياخويا بيرقص مع عروسته ازاي تقولش داخل الجنة.
-هوا في حمام هنا ؟
-استغفر الله العظيم ، يا رب توب علينا من الأفراح المشبوهة دي.
-بردوا مفهمتش في بوفيه ولا اقوم اروح بيتنا.
-إي الناس السمجة دي مبتسمين كدا ليه ؟
-الكرسي ده فيه مسمار رخم.
-إي الزحمة دي عايزة اروح اتصور مع العروسة يا ناس دي صاحبتشي الروح بالروح.
-يا خبر معملتش الواجب الأبلة هاتفرمني بكرة.
-كفاية حاجة ساقعة بقا ا ا ا فين البوفيه.
-هوا هايحصل إيه بعد الفرح ؟!
-عايز الحق آخد صورة بالبدلة احطها ع الفيس بوك.
-الواد ده بيبصلي كده ليه ؟
-الجزمة الجديدة ضيقة أووي.
-عايز اطلع بره ادخن سجارة يا ناس.
-الجو سقعة ازاي البنات مش بردانة بفساتينها اللي مش لابساها دي.
-البوفيييييييه.

7 التعليقات:

موناليزا يقول...

حلوة تنويعة المقولات دى:)

فشكووول يقول...

السلام عليكم
تحياتى
ويتوب علينا من المصاريف اللى بتندفع فى القاعات دى والهبل بتاعنا فى الصرف على الافراح
تحياتى

Saydalanya Mat7oona يقول...

و ما يحدث أنيل
:D

عارفاه أنا التدفق الفكرى ده.....ربنا يعينك على دى إمتحانات

try to connect more with studying

حلوة التدوينة

NISREENA يقول...

هوا حضرتك بتحضر أفراح كتير؟؟
جميلة المقولات :)
حسستنا اننا في فرح بجد

فتوح أبو المفاتيح يقول...

حلوة خالص
بتصور الفرط البشري اللي بينتشر في كل فرح
وكل واحد جاي في باله حاجة عاوز يعملها
^_^
او حاجة يتريق عليها
:)
دمت مبدعاً

طالبة مقهورة ..درجة أولى يقول...

س سؤال :بم تفسر

لما البنات لاسعين..حضرتك يقال عليك ايه؟؟

اتصور انت ينفع تعمل بلوج يا حسني
احتمال ابقى اعمل كومينت عندك

يمكن فعلا اطلع داكتورة اسنان وانا علمي رياضة اصلا ..بعد البوست ده كل شيء جايز :P

حَـبآيـۃْ.بـטּـدۉڷ يقول...

يَجُوزْ بَرضُه ! :DDD

هُو الفرحْ ده كله ناس مُعترضه كِده ؟!

Share |