الخميس، ٢ يونيو ٢٠١١

كلام مكانش لازم يتقال...


كاميرون دييز كانت بتلعب دور واحدة عندها مشكلة مع عواطفها ، و كانت المشكلة إنها مبتعرفش تبكي !
ساعة ما شفت الفيلم ده كنت حاسس فعلا بحالتها دي ، كنت عارف يعني إيه الواحد ميعرفش يبكي...
المشكلة عندي مش كامنة ف إني بكتم جوايا مثلا و مش بحب اظهر دموعي ، المشكلة عندي اني مش بتأثر اساسا عشان اكتم حتي جوايا...
قبل كده ف موقف حصل في عيلتنا شفت اخواتي كلهم بيبكوا ، يفترض ان الموقف كان كبير و يستاهل ، بس انا تنحت..معرفتش اعمل ايه ، و ده اقصي تعبير برسمه علي وشي ف المواقف اللي زي دي ، أتنح ، مبديش تعبير من الأساس...
المواقف دي ليه مبتأثرش فيا ؟ ليه الأوبشن ده مش عندي ؟ ليه مش عارف اشوف البنت دي جميلة فعلا زي باقي الشباب ما بيقولوا ، و ليه مبكيتش لما فلان مات مع اني حاسس انه هايوحشني بس مش شايف ان الموقف يستدعي البكا و كل الدراما دي ، ما الناس بتموت كل ثانية ده الموت نشاط روتيني بيحصل في كل وقت و كل مكان...
ابقا حمار طبعا لو قلت ان انا اللي صح و الناس كلها غلط ، العيب فيا انا ، في حاجة غلط فيا ، سوفت وير العواطف منزلش ليا...
أوقات بحاول اتظاهر اني متأثر فعلا ، بجاري الناس عشان ميتقالش عليا (حلوف) زي ما اخواتي بيقولوا...
بس و بعدين ، و آخرتها...
يجي واحد غلس يقولي اللي بيدرس علم نفس ده لازم يكون حساس عشان يفهم مشاعر غيره و افكاره...
لا يابو لسان طويل :@ بالعكس ده بيبقا في كورسات مخصوص للمتخصصين في المجال ده عشان تبقا مشاعرهم محايدة تماما و طبيعتهم كبشر متأثرش علي نظرتهم للحالة...
و بدون مبالغة أنا صفحة بيضا أوي بس نفسي اتملي شخابيط...
اللي اكتشفته ان العواطف هيا اللي بتصنع لحظات بارزة ف ذكريات كل واحد ، بتصنعله خبرة شعورية و حكايات يقدر يحكيها للناس في ساعة سمر ، انما انا بفضل ساكت مش بلاقي غير حاجات تافهة أوي لا تستحق ، مفيش سيناريو يشد ، يمكن عشان كده انا بفضل الصمت دايما و بنحاز له ، عشان هوا صاحبي من سنين و دايما بلجأله...
ملاحظة : البوست ده للقراءة فقط و يفضل ألا تتضمن التعليقات اي نوع من النصائح علي الإطلاق...

17 التعليقات:

Ahmed EIssa يقول...

علي فكرة انا كدة..بس اعتقد ده نتيجة تدريب طويل ان اللي جوايا ميبانش علي ملامحي

د/دودى يقول...

الاول عجبتنى تدوينتك و صراحتك دى جداااا و بصراحه احيانا بحس بالاحساس ده ...

اجمل حاجه فى حمله التدوين اكتشاف مدونات جديده ممتعه...

البِـئرُ والظمّأْ يقول...

هوا البوست أصلا مش هيستحمل نصايح
بس على فكره حاجه زي كده حلوة قوي
انت ليه متضايق
يارتني كده
:)

Unknown يقول...

الصمت ساعات بيكون رد بليغ ..
التعبير عن المشاعر بيكون خبرة حياتية و نفسية حسب فهمي للأمور ..
لكن مفيش قواعد في الحاجات دي .. مفيش حاجة اسمها المفروض ..
:)

موناليزا يقول...

عجبتنى صراحتك
ماهو حقيق ازاى هتعبر بالبكاء مثلاً وأنت مش حاسس بحاجة

أقولك على حاجة أنت فى نعمة بجد
وماتتمناش أن صفحتك البيضا تتملى شخابيط هى كده حلوة

OldCatLady يقول...

لو كان الناصح ده مقصود بيه حاجة زى النصيحة اللى حدفتها فى وشك إمبارح

يبقا بعتذر
:))

فى ناس بتحس بعقلها....و المشكلة بقا إن الناس دى لما بتعيط سبب عياطهم مبيتفهمش لأنه بيبقا تراكمات من مليون حاجة ممكن ببساطة يتوصفوا من الناس بالتفاهة

Rosa يقول...

بعيدا عن النصايح
انت قولت المفيد فى الاخر صحيح العواطف بتصنع مواقف مهما وذكريات واحداث وكتابه...انما ساعات ممكن تكون كارثه متحركه فى حياتك..انما بردو لا بد منها
فهمت حاجه؟؟
:D

نسرين شرباتي "أم سما" يقول...

هياالبشر كده
متفاوتة بأطباعها
فعادي يعني
كلنا بنقلك: يااااا بختك
أصل الإحساس صعب أوي اليومين دول

Unknown يقول...

أحمد عيسي...
بس علي أقل تقدير بتتأثر من جواك و بيبقا في حاجة عشان متبينهاش...
هاتولي انا بقا الحاجة دي وانا مش هبينها متخافوش :))

Unknown يقول...

د/دودي...
بجد متشكر جدا لكلامك و يارب دايما تنوري البلوج... :)

Unknown يقول...

البئر و الظمأ...
أنا طول عمري بسمع ان الحشيش بيعلي الدماغ ، و نفسي اجربه من باب الشعور بنفس اللي بيحسه الإخوة الحشاشين...
أنا آسف طبعا عشان بستخدم التشبيه ده بس اهي أقرب حاجة جت ف دماغي عشان اوصلك رغبتي ف اني ابقا زي باقي البشر...
تيجي نبدل طيب ؟ :))

Unknown يقول...

شيماء...
الصمت ده لغة و ابلغ لغة . الكلام ده لتوصيل معلومة ، و الصمت لتوصيل حاجات من القلب للقلب مينفعش تتوصف بكلام...
أكيد طبعا مفيش حاجة اسمها المفروض أكون كده ، بس لما الاقي الناس كلها واخدة اتجاه معين وانا واقف ف مكاني مش بتحرك غصب عني لازم احس ان في حاجة غلط...
نورتيني يا شيماء :)

Unknown يقول...

موناليزا...
إنتي شايفة كده يعني ؟ طب اجرب طيب و ارجع تاني :))

Unknown يقول...

صيدلانية...

شفتي بقا الظن السيئ :)) لأ طبعا بالعكس ده انتي كلامك كله فوق راسي و الله و حتي لو نصحتيني هنا وانا بقول محدش ينصح بردوا مش هقدر اقولك حاجة لإنك زي أختي الكبيرة ، انا بس بقول كده لإن النصايح ف طبع من طباع الواحد يبقا مجهود ضايع بالنسبة للشخص الناصح ذاته ، صعب حد يغير طبعه...
كلامك صحيح انا كل حاجة بفكر فيها بعقلي بس مظنش عمري بكيت من سنين طويلة لإني معنديش تراكمات من الأساس :))
انتي نورتيني بجد :)

Unknown يقول...

روزا...
اه فهمت طبعا :) عايزة تقولي انها زي ما لها ايجابيات لها بردوا سلبيات ، و ان سلبياتها ف نفس الوقت متصلة بإيجابياتها لإن الواحد لما بيعاني بيتعلم من معاناته د صح كده ? :))

Unknown يقول...

نسرينا...
يا جدعان هوا كله يقولي يا بختك مفيش حبة شحتفة عليا طيب :)))

Ramy يقول...

حاضر يا عم الحج

مش هننصح

اببقى بينى و بينك بقى (:

Share |