الأربعاء، ١ يونيو ٢٠١١

أول كابوس...


 -تعرف انا نفسي ف إيه دلوقت ؟
-أكيد فكرة مجنونة من بتوعك.
-عرفت ازاي.
-عشان لو كانت فكرة عادية كنتي هتقولي نفسي ف كذا علي طول من غير الساسبنس بتاعك.
-ده إنتا قاتل للمرح يا أخي.
-طب خلاص بجد قولي نفسك ف إيه.
-وانا صغيرة كنت دايما بروح المدرسة نايمة علي نفسي دايما و ساعات وانا ف الطريق كنت بغمض عيني كل 5 ثواني و الحق افتحهم قبل ما البس ف عمود.
تتوقف عن الحديث و تنظر له في صمت فيصرخ مدركا لما يدور برأسها قائلا...
-نعم.
-نفسي اعمل كده دلوقت بس وانا مطمنة.
-اه فهمت شغل عميان يعني امسك إيدك و الناس تتفرج عليا و تقول شوف الرومانسية بيحب واحدة عامية إهئ إهئ.
-اتريق براحتك.
-لا و اتريق ليه دانا هقولك علي حاجة احسن من كل ده.
-إيه.
-نمشي احنا الاتنين مغمضين.
تصفق بيدها في مرح قائلة...
-ماشي موافقة.
-موافقة ايه بس يا بنت المجانين.
-إيه يا حسني اشمعنا احنا ما الناس كلها مغمضين أهو.
ينظر حوله فيجد الناس كلهم بلا عيون...

12 التعليقات:

فتوح أبو المفاتيح يقول...

جميلة جدا جدا جدا جدا أوي
فكرة حلوة
وقصة جميلة
ونهاية رائعة
وتعطي فكرة جميلة
ابدعت يا أخي
واهلا بعودتنا للتدوين
^_^

فاتيما يقول...

طب يعنى انا جاية اقولك
ازيك يا حسنى
وعامل ايه ف المذاكرة
و معلش مقصرة ف السؤال عليك وكدا

تقوم تصدمنى بالبوست دا ؟؟


يعنى انا حمل الرومانسية دى دلوقتى
انا مش ناقصة يا غجر
وماسكة نفسى يا عيال
ليه بتفكرونى باللى عمالة اطنشه ؟!!


تعرف ؟


انتا وصفت ببراعة
مشهد انا بعيشه تقريباً
كل يوم مع الإنسان اللى بحبه
انا وهوه بنغمض عيوننا دايما
عن الدنيا
وكل ما فيها
(غالبا انا كدا علطول وهوه ساعات بيفوق و يبقى عاوز يفّتح )

بس لحظات التغميض دى
بتبقى قمة السعادة
والصح

السعادة لإنك بتمارس حقك
ف الفرحة و التخفف م القيود
والتمسك بمن وجدته اخيرا بعد عذاب

والصح لأنك لو معملتش كدا
هتفرط ف حقك ..
واللى عادة بتتنازل عنه
متصوراً ان غيرك هيمنعك تمارسه
بينما لو جربت لوهلة تبص حواليك هتلاقى الناس تقريبا كلها
.. زيك !!!


كلنا بنحب
وكلنا بنضعف
وكلنا بنمارس كف البصر
عن الواقع

بس مش كلنا
بيعترف بكدا
او يقدر المنحة دى
ولا كلنا عنده شجاعة دخول التجربة
ولا كلنا بنعذر غيرنا ..
لو خاضها
واعترف انه كدا


كالعادة بتخلينى أرغى
و اقول كل حاجة
لأ بقى
كدا مينفعش
انتوا بترشوا ايه ف الجو
يخلى الواحد يخطرف براحته
ويبعبع كدا ؟!!!

ولا أنا عشان فوضحاية ..
تستغلوا الموكف ؟!!

لأ
انا مش جاية المدونة دىتانى
الا ف وجود المحامى بتاعى


عاااااااااااااااااا


القصد

طمنى عليك يا غالى
واخبار الإنطحانات معاك ايه ؟!!!


وتانى

البوست حلو قوى
:)

راء يقول...

هههههههه

فكرتني بواحدة كده بس بلاش فضايح يعني مش هسيح عندك عشان انت مبتسترش :)

ربنا معاك ف الامتحانات ومعايا كمان

لو افتكرتني ابقى ادعيلي يعني يمكن انجح

Unknown يقول...

فتوح ابو المفاتيح...
بجد متشكر جدا لكلامك انعشت ثقتي بأسلوبي من تاني وانا كنت خايف متعجبش حد عشان بقالي فترة بطلت اكتب أو بطلت ابذل جهد إضافي ف الكتابة...
نورت البلوج و ان شاء الله يكون شهر تدويني حلو

نسرين شرباتي "أم سما" يقول...

ممممممممممم
جميلة أوي
الفكرة بتاعة التدوينة
الحوار والنهاية
الناس عايشة مش هامها الا نفسها
منعيش حياتنا كمان

Unknown يقول...

فاتيما...
انا كنت ناوي ف آخر الشهر التدويني بإذن الله أكتب بوست لدلالة كل كابوس هكتبه بإذن الله ، بس لما هاجي اكتب عن الكابوس ده هكتب الكومنت بتاعك عشان انتي شرحتي اللي عايز اقوله بدقة اكتر ، هما الستات ده كده بيلعبوا بالتعبيرات لعب و احنا يا رجالة نفضل نعصر ف دماغنا عشان نعرف نعبر :)))
بس ده كابوس ليه بقا بالنسبالي ، لإنه فعلا عاملي ازمة من فترة ، انا زي ما تقولي متربي تربية عسكرية و محبش الدلع و الحال المايل ، صحيح انا فاهم كل دلالات المشاعر البشرية و عارف احساس العاشق عامل ازاي ، بس كل ده بشوفه من عدسة المجهر و عمري ما تصورت نفسي اكون مكان العينة اللي بفحصها ، و ده سبب ليا مشاكل رغم انها مزعجة بس بتعالي عليها و بعتبرها محصلتش...
أنا مبحبش الضعف و نفسي اجرب اغمض عيني بس مبقدرش استمر و اضحك علي قناعاتي...
انا امتحاناتي هاتبدأ 6/6 و هاتخلص 20/6 بس هاكتب كل يوم بوست خفيف كده عشان نفسي اشارك ف الحملة التدوينية و اهي تسالي مع المذاكرة :))
انا طولت عليكي معلش...

Unknown يقول...

المقهورة... :))
لأ هيا مش واحدة بس هيا كل البنات ، انا اتوقع اي حاجة لاسعة من البنات :))
ربنا يسترها معانا جميعا و اشوفك داكتورة سنان أد الدنيا :)))

Unknown يقول...

نسرينا...
أولا منورة البلوج أول مرة اشوفك حدانا :))
صحيح الناس كلها عايشة حياتها و بتعرف ازاي تستمتع بيها ، بس انا للأسف شكلي بحب القيود اكتر و بحب احافظ علي حدود لحياتي...
نورتيني كمان مرة :)

فراشة يقول...

:) السلام عليكم

اول مره اكتب تعليق هنا
بس مش اول مره آجي هنا :)

اول ما قريت اسم البوست
" اول كابوس "

قلت يارب يكون مشارك ف تدوين 30 يوم عشان استمتع بكتابات حضرتك 30 يوم


اما عن الفكره ف جميله جدا وعجبتني قوي بجد وخصوصا النهايه


ربنا يوفق حضرتك ف المذاكره

Unknown يقول...

فراشة...
آه انتي من القراء الصموتين إياهم ، و دول فئة بعزها جدا لإني واحد منها :))
بجد كلامك فرحني أوي مكنتش اعرف ان في ناس بتقدر اللي بكتبه بالشكل ده :))
بس انا رجعت ف كلامي ف موضوع سلسلة الكوابيس دي بصراحة و قولت خليها بوستات متنوعة احسن و غيرت اسم التصنيف لإسم الحملة...
منورة البلوج دايما فراشة :)

دعاء العطار يقول...

بحب أنا الجنوووون ده

أصل كل الناس مجنونه بس عامله نفسها عاقله

فيها ايه بقى لما نبقى صرحاء ونتجن بجد ؟

عجبتنى أوى ع فكره

ودى أول زياره بس أكيد مش الأخيره

(: (:

غير معرف يقول...

يسلمو عندك افكار حلوه يارنت ع طول نشوف افكارك

Share |