الأحد، ١٥ مايو ٢٠١١

محدش يتخض...

 
من فترة وانا نفسي اجرب الاختراع ده اللي بيسموه (فضفضة) ، و دي تقريبا أول مرة بفضفض فيها في البلوج بس ده لإنها فترة امتحانات و الضغط عليا المرة دي صعب ، فجأة لقيت ان قدامي اسبوعين بس ع الامتحانات و ده خلاني ارتبكت جدا و مش عارف اسيطر علي دماغي...
فاكرين لما قولتلكوا قبل كده ان دايما الأفكار القيمة بتيجي معايا ف غير وقتها ، ده اللي بيحصل معايا كل فترة امتحانات ، ابقا طول السنة ببيض علي بوست عدل اكتبه في المدونة و معرفش ، و وقت ما الامتحانات تقرب تجيلي حالة غلسة من (التدفق الفكري) لكل حاجة و أي حاجة ، و كأن دماغي حوشت الأفكار كل الفترة دي عشان تطلعها علي دماغي دلوقت...
بل و الأغرب من كل ده إني بتجيلي حالة من (الإسهال العاطفي) و بحس اني محتاج لحد احبه و يحبني و الهلس ده ، لدرجة ان ناس كتير حواليا افتكرتني بحب بجد مع ان انا مش فاهم مين دي اللي هاتبصلي اساسا و ليه و علي إيه...
و المصيبة الكبيرة بقا دي لوحدها كوم تاني ، بقيت بحب الأطفال... :s
و من هذا المزنق يا سادة كان لزاما إني أفك عن روحي شوية و أفضفضلكوا عن الإضطرابات النفسية اللي بواجهها في الفترة الحرجة دي لحد ما ربنا ينتعني بالسلامة ان شاء الله...
إدعولي الله يستركوا انا هسقط :(
*************************
نتطرق بالحديث عن موضوع آخر بقا الا و هو ده...
 
شوف يا رامي يا خويا حيث إنك فتحت الكلام عن فاتيما فخليني أتكلم بقا أنا كمان...
أنا متعودتش اظهر اللي جوايا ناحية حد لأي حد ، طبعا هتقولي ليه يا حسحس ؟ هقولك مالكش دعوة خليك ف حالك :))
بس لو هاتكلم عن أول مرة شوفت فيها فاتيما فهقولك بصراحة خفت منها :)) اه بالظبط خفت منها زي ما خفت منك انتا كمان يا رامي في بداية معرفتنا ببعض ، و ده لإني بخاف من الناس اللي بتبقا ودودة من أول مقابلة ، قول عليا براوي بقا قول زي مانتا عايز المهم اني تجاوزت المرحلة دي خلاص و الحمدلله :))
بس الأيام بتثبت للواحد دايما انه غلطان و بيبالغ وانا تقريبا الأيام مبتعملش معايا حاجة غير انها تثبتلي ان انا حمار علي طول الخط :))
اللي حسسني ان انا حمار فعلا و معرفش حاجة عن نفسي ان تاني تجمع بتاع بؤجة الخير لقيت نفسي اتدايقت جدا لما عرفت انها مش جاية ، أنا كنت جاي عشان اعيش نفس جو الفرح اللي عشته ف التجمع الأولاني و بالتالي ده معناه اني كنت جاي عشانها من غير ما احس ، خبيت طبعا و دفنت زعلي وسط الكلام مع عمرو يسري و باقي الناس...
اكتشفت انها (بتشع) سعادة و فرحة حواليها ، و فكرت ساعتها اننا لو صورناها بتصوير كريليان هنلاقيها فعلا بتشع هالات حيوية ملونة كتير حواليها...
انا بخرف انا عارف بس انا بحكيلك خواطري وقتها زي ماهيا بالظبط ، شفت صاحبك تفكيره اهبل ازاي يا عم رامي :)))
خلاصة الموضوع يا رامي ان انا معنديش حاجة اقولها عشان مش عارف اوصف معزة فاتيما عندي أد إيه ، جايز متكلمناش كتير عشان مفيش نقاط مشتركة بيننا غير التدوين بس انا واثق اني من جوايا بحب فكرة وجودها ولو حتي من غير كلام...
كل سنة و انتي طيبة يا فاتيما و عقبال 80 سنة عشان انا مبحبش الأفورة :))

10 التعليقات:

Ramy يقول...

بالنسبة للجزء الأول

هما كده العباقره مبتبنش عبقريتهم غير لما يتحطوا تحت ضغط (:

ناجح بأذن الله يا حسنى

أما بلنسبة للجزء التانى

فافتيما دى من الناس اللى صعب تقابلها فى حياتك مرتين تلاته على بعض

يا حسنى أى أفكار توجد عند الواحد متعتبرش هابله ابداً

أنا عاوز أرغى يا حسنى علشان أصدعك بس

بس مش قادر مُرهق شوية كدة (:

شوفت ربنا بيحبك ازاى

ربنا معاك فى الأمتحانات اللى جايه دى

ركز انت بس و ربنا هيوفقك

أنا - الريس يقول...

هههههههه
إزيك يا معلم
أخبارك أيه
أولا كل سنة وفاتيما طيبة قادر يا كريم
ثانيا فضفتك حلوااااااا
فكرتني بالذي مضي لما كان الأفكار تيجي لي ساعة الإمتحانات
وبقيت السنة أبيض يا ورد
المهم
انت مزاجك عنب

فاتيما يقول...

طب بذمتك يا حسنى
المفروض بعد ما أقرى البوست دا
أعمل ايه ف نفسى ؟!!!

يعنى انا رغرغت ودمعت واتشهنفت واتخضيت وأزبهليت وكل ما فى الصدد عشان تبقى عارف بس ودا اول الكلام ...

بص
انا مش هرتب الرد
بس عادة الحكاية دى حصلتلى مع ناس كتير
فيه ناس بتتخض منى اول ما تعرفنى او تقابلنى لأول مرة عشان اختك فاتيما بتاخد ع الناس الطيبة بسرعة ...
وأحسبك منهم يا حسنى
وقلبى بيقولى علطول
وف الغالب قلبى مبيكدبش
عشان كدا تلاقينى بحب ناس قووووووى
ولو مشفتهمش حتى لحد دلوقتى
ومبركزش مع ناس قوى لأنى مرتحتش من قبل ما اشوفهم او لما شوفتهم مرة ...
معرفش دى خبرة ولا صدفة ولا إيه
بس هيا نعمة والله
ولأنها كذلك
فإنا بها احدث ...دا أقل واجب يعنى

انا دلوقتى زعلانة من نفسى جدا
لأنى مروحتش البؤجة
كنت زعلانة بس
دلوقتى جداااا
لأنى اكتشفت ان وجودى ممكن يفرق كدا !!
وبناء عليه أوعدك التجمع التدوينى القادم هكون اول نفر حاضر ...
وغالبا هيكون التبرع بالدم ان شاء الله
وساعتها هنقعد نرغى ونتكلم و هقعد أنكش فيك زى كل مرة ...
اصلا أول مرة شوفتك قولت الواد دا
شكله طيب بس ماله ساكت كدا ومش طايقنا ؟!!!
المرة الجاية هنرغى ان شاء الله
ومنبطلش كلام
أومال هعيط لمين انا واشتكى انى عدت ال38 سنة ..إهىء إهىء


وبعدين تعالى هنا
عمال تتكلم عن حالتك النفسشاويةو الخربطات اللى بتنتابك اثناءها .. وبعدين مكمل البوست عليا ...
قصشدك إيييييييييييه بقى !!!!!!
أنا مبهفش على بالك الا وقت الإنضطربات ؟!!!!

طب بما انى جيت جنب العيال و والأسهال العاطشفى والحاجات دى مفيش مانع ...
إحنا طايلين !!!

وتعالى هنا برضو
ايه تصوير كريليان دا اللى هتصورونى بيه إن شاء الله ...
لا لا لا لا لا
دنا أهلى مش صعايدة ويقطعونى
آل أتصور آل
طب لو من غير ما ادفع فلوس ..ماشى

وتعالى برضووووووووو
متقولش على افكارك عبيطة
ولا على نفسك حمار ...
مينفعش تبقى بتعزنى كدا
وبعدين تطلع حمار يا فندم
دنتا راجل بتفهم وزى الفل
متزعلنيش بقى

يا حسنى الواحد بيفضل يعيش ف الدنيا ويتفرج ..لحد ما يوصل لحقيقة الأشياء والأشخاص ...
بياخد عمر طويل يعنى
واحيانا يعدى العمر وميعرفش
ويؤسفنى اقولك انه احيانا بعد ما يوصل
يلاقى الدنيا إتغيرت
أو إنه مكنش شايف كويس ..
يعنى المسألة فلسفية معقدة كدا
ملهاش ضوابط قوى
فمتعقدش روحك وتتصور ان الأشياء لها نهاية واضحة ومحددة
الرسول عليه الصلاة والسلام قال المرء بأصغريه ..قلبه ولسانه
وانا مؤمنة جدا بمعنى الحديث دا
وكنت بقعد أشرحه ليوسف لما يقولى عاوز يبقى عند عقل عظيم واعمل اختراعات وحاجات ...
فكنت بقوله ..ان العقل مش كفاية
لأنك ممكن تستخدمه ف الغباء
أو الأذى ليك ولغيرك
وممكن واحد يتولد متأخر عقليا
او حد عقله يروح ...
يبقى عند ربنا ..ايه ؟
المقياس هوه القلب وما فيه
وبعدين ما يخرج على اللسان وربط الإنسان بالوعد والتصرف

اختك فاتيما بتحكم ع البشر من هذا المنطلق فى اغلب الأحوال
عشان كدا قلبى بينفتح لناس
وينقفل لناس
وانتا م الناس اللى قلبى انفتحلهم يا حسنى انتا ورامى وكل الناس الحلوة ..
الهالة اللى بتتكلم عليها
سببها انتوا
الحب اللى بيجيلى منكم
والإهتمام
والدلع
والدعوات
والسؤال
وبوست زى دا وزى بتاع رامى
حاجات زى كدا ..تخلينى بنور ف عتم الليل يا بنى ..
ومن غير كريليان دا خالص كمان

انا عاجزة عن شكرك
على اللى عمله البوست بتاعك
بس ممكن ارد عليك بصورة
حيث انك بقيت تحب العيال ...
:)

أهى

http://1.bp.blogspot.com/-U1CYRhXBXkU/TZXoe7-aFAI/AAAAAAAACPo/6Y_U8jXRFRk/s1600/best-baby-smile-child-5.jpg


خلى بالك من نفسك
وان شاء الله
تبلى بلاءاً حسناً ف الامتحانات
و ترجع تنش متلقيش موضوعات

(وش مطلع لسانه)


أشوفك على الف خير يا رب

mrmr يقول...

فضفض فضفض خد راحتك خلى ماسوره الاسهال تضرب

ربنا يوفقك ومش تنسانا فى الساقع يوم النجاح

وكل سنه وفاتيما طيبه وانا بضم اعجابى وحبى لفاتيما وبقولها بالرغم من انى مش قعدت معاكى يو اللقاء لكن انطباعى عنك مش يفرق كتير عن كل اللى عرفوكى وحبوكى
ربنا يديم محبه الناس ليك يا طمطم

ربنا يسعد قلوب الجميع

basma bahaa يقول...

هههههههههههه الحمد لله مش انا لوحدى بقى اللى الوحل مابحلالوش ينزل عليها غير وقت الامتحانات والمذاكرة!!!
ربنا معاك يا حسنى هتنجح بامتياز كمان ان شاء الله;)
وللاسف انا ماعرفش فاتيما..بس حاجة مطمئنة ان الواحد بتأكد ان لسه فى ناس حلوة وطيبة كدا:)

Unknown يقول...

رامي...
يا فرحتي بالعبقرية اللي هاتسقطني بإذن الله :)) ربنا يستر و اعدي السنة دي علي خير...
صدقني انا كل ده موفيتش فاتيما حقها من الكلام ، بس لإن حاجات زي دي بتبقا من القلب للقلب و صعب تتوصف بكلام...
ربنا معاك يا رامي انا عارف ان رجوعك الشغل بعد الأجازة الطويلة دي فجأة هايخليك تتعب لحد ما تندمج في مود الشغل من تاني...
ابقا طمني عليك :)

Unknown يقول...

سيادة الريس...
الله يطمنك كده اتأكدت ان مش انا لوحدي اللي كده :))
انا مزاجي عنب دايما بوجودك :)

Unknown يقول...

فاتيما...
عارفة ، أختي زيك كده بردوا بتعرف الناس من عنيها طوالي ، وانا في الأول كنت بتريق عليها لحد ما اكتشفت انها عندها حق كل مرة...
هيا مش خبرة ولا صدفة لكن هبة من عند ربنا...
موضوع ال 38 سنة ده انا مش مصدقه بأمانة ده تروحي تخزي بيه عين حد غيري :)))
موضوع انك جيتي ف وسط اضطراباتي ده جه بالصدفة و الله كنت بكتب الجزء الأول بتاع البوست و صادفني بوست رامي فرحت مكمل عليه و قولت ع البركة يا معلم :))
تصوير كريليان ده بقا يا ستي....حاجة كده يعني....موضوع كبير كبير بعدين نفهمه سوا :))
يا فاتيما انا لازم دايما أحط احتمالية لكوني حمار ، لإني شفت ناس كتير بتكون حمير و مصرة علي حموريتها و فاكرة نفسها صح ، انا مش عايز ابقا كده...
انا كنت بقول من فترة ان لازم اتعامل بعقلي أكتر من قلبي و ان اي عواطف تصدر مني دي دليل علي ضعفي ، بس حاليا فكرتي ابتدت تتغير حتي إشعار آخر...
أنتي تستاهلي كل الدلع و الدعوات و الاهتمام و السؤال ، انتي ربنا بيحبك...
الصورة حلوة أوي تسلم إيدك...
ادعيلي ربنا يسترها معايا :))
ربنا يطمننا عليكي دايما...

Unknown يقول...

مرمر...
بلاش حكاية الساقع دي و النبي انا مش هادفع حاجة تاني انا بقولكوا اهو :))
بوستات فاتيما كفاية انك تعرفيها من خلالها بس بإذن الله نشوفك في ميتنج قريب و نقعد كلنا معاها...
ربنا يسعدك و منوراني دايما يا مرمر...

Unknown يقول...

بسمة...
اي يا جدعان دا كل الطلبة شاربين جاز بقا مش انا المسطول الوحيد... :))
لأ امتياز اي دانا لسة بقول ف آخر البوست مبحبش الأفورة :))
لا متقلقيش الدنيا لسة بخير طول ما فاتيما موجودة فيها :)
ابقي خلينا نشوفك بقالك كتير غايبة عن البلوجر...
منوراني دايما...

Share |