الأحد، ١٨ يوليو ٢٠١٠

...بلا أدني مبالغة

البوست ده أكتر بوست احترت ف أمره ، فضلت كتير افكر اكتبه بأنهي صيغة تليق بموضوعه ، مش هبالغ لو قلت انه بالنسبالي اهم بوست كتبته لحد دلوقتي من أول ما قلت يا تدوين ، و مش هبالغ لو قلت اني عمري ما ضحكت ف حياتي من قلبي أد امبارح...
كلنا عرفنا رامي (مدونة بابي) و مفيش رامي غيره عموما :) ، جايز اسلوبه في التعليقات و التدوين ميختلفش عن اسلوبه الفعلي في التعامل المباشر وانا و هوا متفقين علي كده ، بس بردوا لو هساوي بين مقابلة صديق ميتعوضش زي رامي وجها لوجه و بين التعامل معاه في التعليقات أو في الشات هبقا بكدب...
مكنتش اعرف انه ف أجازة في القاهرة من فترة كبيرة و كالعادة نايم علي وداني :)
فكرت اعمل فيها جركن مان باعتبار انه ضيفي في القاهرة رغم انه يعرف القاهرة احسن مني تقريبا ، قولت نروح ساقية الصاوي ، و يا ريتنا ما روحنا... :)
و بعد مشوار طوييييييييييييييييييييييييييييل اكتشفنا ان الدخول بقا بكارنيه عضوية ، طبعا اول تعليق خطر علي بالي (يا خيبة أملك يا ريتشارد) كان نفسها تدخلها يوما ما... :)
أكتر حاجة عجبتني ف رامي توقعه لكل أسألتي و ردود فعلي من قبل ما اتكلم و من غير حتي ما يكون عندي نية الكلام لدرجة خلتني احس ان ف مرحلة متقدمة هسكت خالص و هوا يقول أسألتي و يجاوب عليها لوحده :) :)
إنسان ذكي جدا مرح جدا ، فاهمني من أول يوم و دي حاجة عمرها ما حصلتلي اني الاقي حد فاهمني ما بالك بحد فاهمني من أول لحظة ، أجبرني بتلقائيته اني اكون في منتهي الصراحة معاه رغم اني ساعات بكون كتوم مع اخواتي و صحابي ، خلاني ما حسش بفرق السن إطلاقا رغم انه اكبر مني باتناشر سنة...
انا كنت ناوي ادي البوست طول ما بعده طول بحق المشوار الأسطوري اللي ضربناه سوا امبارح :) لكن لما بحاول افتكر تفاصيل امبارح بيغلب علي تفكيري الشعور الكلي بالفرح و الفخر اني عرفت شخصية متميزة بجد زي رامي ، و بقول اني لو كنت عملت حاجة حلوة ف دنيتي خلت ربنا راضي عني فرامي هوا عملي الأبيض اللي لقيته بعد صبر ، و ياريتني عرفته من زمان اكيد كان مسار حياتي اختلف...
انا عارف في ناس ممكن تقول اني ببالغ مع انه يستحق اكتر من كده ، رامي نفسه ممكن يفتكرني ببالغ لأن تعابير وشي امبارح مكانتش توحي بكل ده ، بس هوا عارف سبب التهييس اللي كنت فيه ، ربنا يكفيكوا شر المرض... :)
امنيتي الوحيدة بعد ما سبته كانت ان ربنا يكرمه و يستقر في القاهرة عشان يبقا ف ايدي اشوفه ف أي وقت ، لإن رغم المقابلة (الكعابي) دي الا اني كان نفسي يفضل معايا للفجر بس مرضيتش اعذبه اكتر من كده معايا :)
و لحد دلوقتي معلقة في دماغي آخر عبارة قالهالي...
(اللي يعيش ياما يشوف ، و اللي يدون يشوف أكتر...)
و بعد ما نزل المترو و سابني كان هايخبطني مكروباص مكتوب علي ضهره (يا بخت اللي يصاحب راجل...) ، ساعتها قولت بصوت مسموع (آه و الله)...
يا بخت اللي يصاحب رامي...

21 التعليقات:

غير معرف يقول...

صباح الخير

ايه دا ايه دا انا كنت لسا كاتبه عندى فى البوست الاخير ان نفسى اشوف كل المدونين والمدونات
جميل كلامك على رامى وهو والله وبدون مبالغه برضوا بحس انه اخوايا بس الصغير هههههه عشان مكبركش يا رامى

تعليقاته كلها جميله ومريحه واسلوبه فعلا متميز وانا متوقعه فعلا ان رامى يكون بنفس الاسلوب اللى انت وصفته بيه

طيب انا عامله تجمع فى اسكندريه هتيجى ولا لاااااااااا

ربنا يديم المعروف بينكم ياارب

مفيش احلى ولا اجمل من الصداقه

دمت فى حفظ الرحمن

Mona يقول...

ربنا يديم المعروف بينكما يارب - على فكرة أنا بعمل تجمع لاصدقائى المدونين مرة كل شهر وهم مختلفو الاعمار لو أنت فى القاهرة يسعدنى أنك تنضم لنا وحأبقى أقولك التجمع القادم أمتى
تحياتى

Mona يقول...

كويس أنى عرفت أن الدخول بعضوية أنا عمرى مارحتها وكان نفسى أروحها أوى بس واضح أنها مش فكرة عاطفية :)))

أنا - الريس يقول...

بعد السلام والتحية
أما بعد
من رئيس الجمهورية
أن تجد صاحب صاحبك في حياتك
أو شخصية مميزة ليس بالشيء الهين
تمسك بصحوبية رامي
بقدر الإمكان
واتمني ان يبادلك نفس الشعور
وياعم دا كويس انك لقيت الساقية
قافلة عشان تفضل تتكلموا مع بعض
وبقي هاتلي نمرت المكروباص اللي كان هيخبطك أنا عارف واحد ضابط يمكن بالواسطة نسحب رخص أم العربية دي .

تحياتي لك ولرامي
وتحياتي للصداقة المحترمة

Ramy يقول...

(: حسنى

(: ياعم و تحتار ولا حاجة

و الله يا انت بتحرجنى بالكلام الجميل دة يا صحبى (:

صدقنى مستحقش كدة صدقنى

يا باشا المشوار لا طويل و لا حاجة

دة بس شيلت اللاب بس هههههههه

طب مقلتش ليه يا عم رامى

عادى بقا مفيش مشكلة (:

احيانا بقى بخاف توقعاتى تضايق بس الخمد لله بتيجى سليمة اصل انا بقيت مدمن توقعات (؛

انا ذكى الله يخليكى يا حسنى دة من ذوقك دة بس يمكن ربنا كرمنى قدامك بس
هو من جهت مشوار اسطورى فهو اسطورى جدا هههههههههههههههههههه

بس بأمانة محستش بجد انى مضايق او زهقان خالص مالص

بس اهم حاجة تكون انت تمام انت لسة خارج من دور

و الله يا حسنى دة كلام كبير عليا قوى يا صحبى

ربنا يكرمك صدقنى يا حسنى انا بعزك جدا و بحترمك جدا

من قبل ما اشوفك

و ربنا زى ما قلت لك بيكون شايل لكل واحد طريق و ربنا شايل لك حاجة كويسة ان شاء الله

لالا يا حسنى انت ربنا كفأك من زمان بوالدك و ولدتك
وأخواتك اللى كلهم بيحبوك و يخافوا عليك

الحمد لله دى بركة دعوة والديك

يا عم يا عم يا بختى انا بيك وبالناس الحلوة المحترمة

اللى عرفتها فى المدونات

ربنا معاك و يحفظك و ينورلك طريقك

غير معرف يقول...

لا انا مصدقاك والله
رامى انسان محترم وبحس انوا اخويا بجد
ربنا يكرمه يارب
انا بقى اللى فارسنى انى مش عارفه اشوف حد كل حبايبى يا فى القاهره يا اسكندريه وده الشئ اللى فارسنى وحارق دمى
كمان فى شئ قهرى اوى كان نفسى اكون راجل بس لمده شهر وزاحد عشان اشوف رامى وانتا طبعا يا حسنى ومدونين كتييييييييييييير بس تقول ايه حظ
ده حتى ريتشاردى حبيبه قلبى من المستحيل اشوفها حاسه انى عايشه فى المريخ
ابقى سلم لنا عليه كتير اوى المره
الجايه والنبى
انا عندى فكره والله ياريت تعملوها اعملو تجمع فى القاهره قبل مارامى يسافر ونتجمع كلنا مع الناس الحلوه دى وانا رغما عن القنال كلها ها اجى والله
اتمنى والله

Tears يقول...

جميل اوى هذا الشعور الطيب بينكم



ربنا يديم المحبة

richardCatheart يقول...

ههههههههههه
ايه دا يا عنى كنت معاكم
والله فيك الخير يا مستا افتكرتنى كده على طول

ياعنى ايه بقى اللى يحب يروح لازم يشترك هو نادى و لاايه خيبه

والله انا رامى بعزه وبحترمه جدع ومهذب حقيقى ومرح مش عقد وشكله كده رومانسى جامد
وانت دماغ يا معلم ياعنى هاتبقى فله
سبحان الله ربنا بيجمع الناس من اخر الدنيا واللى ماكانش ممكن يعرف بعض بقى سهل يعرف بعض

والله انا سعيده
وانا كمان نفسى اشوفكم ونتجمع كلنا ان شاء الله

ربنا يديم المعروف يجعلكم خير لبعض وعلى بعض يا رجاااااااااله
وبعد كده خلى بالك من المشاريع المكرو باصااااااااات ياعنيى

Tarkieb يقول...

أه هو بصراحة جدع اووي واجدع منك كمان وجه زارني مش زيك عامل زي القرع بتمد لبرة.... يعني يا ابني لازم انكشلك شعري وما استحماش عشان ابقى فيه حاجة من ريحة اوديت وتيجي تعبرني ...ربنا يخليكو لبعض دي اهم حاجة

Unknown يقول...

الحب الجميل...
صباح الجمال ، انتي حاسة انه اخوكي الصغير انا حاسس انه توأمي :)
اسلوبه في التعليقات هو اللي شدنا ليه قبل اي شئ ، طبيعي مش بيتكلم برسمية معقدة :)
انا مرحتش اسكندرية ف حياتي الا مرة واحدة وانا صغير ، علي كل حال لما تحددوا زمان و مكان ابلغوني بالله عليكم يا قوم ، وانا بإذن الله هتصل برامي و اشوف علي ماذا ينوي...
المعروف بيننا هايدوم بإذن الله طول مانا متمسك بصديق ميتعوضش زي رامي...
نورتيني يا حب...

Unknown يقول...

مدام مني...
اللي بيخاف علي زعل صاحبه من أقل حاجة لازم المعروف يدوم بينهم بإذن الله...
دعوة حضرتك مقدرش ارفضها ده شرف اكبر من اني اجادل فيه...
لا و الله ابدا انا كنت قولت لرامي اني مش هعمل عضوية عشان الساقية بعيدة عني ف مش بروحها كتير ، بس بعد كده فكرت و قولت مانا من غيرها مش هعرف ادخلها لا كتير ولا قليل ، و بعدين ممكن تعملي عضوية عن طريق موقع الساقية بس يكون ليكي صورة شخصية ع الجهاز او اعملي نسخة بسكانر من أي صورة شخصية عندك...
نورتيني يا مدام مني...

Unknown يقول...

بشوي اتصل بيا دلوقتي و زفلي الخبر التعيس ، ادعولي يا جماعة انا نازل الجامعة اشوف النتيجة و هكمل التعليقات اما ارجع بإذن الله ، وفقا للحالة النفسية...

Unknown يقول...

طلعت آوت ، آخر الأسبوع هاتظهر...

Unknown يقول...

سيادة الريس...
فعلا ، و الغريب انك بتلاقيه ف اوقات متخطرش علي بالك...
انا متمسك بيها من أول تعليق كتبه رامي :)
يعني لو كنا دخلنا الساقية كنا هانمسك ف خناق بعض ؟ :) ع الأقل مكنتش مشيته كلللللللللللللللللل ده :) :)
للأسف ملحقتش اشوف نمرة العربية :)
نورتني يا سيادة الريس...

Unknown يقول...

هختصر و اقولك كلامك مينفيش الحقيقة اللي شفتها ، لذا كل الكلام اللي ف البوست انا كاتبه عن اقتناع تام...
طب طالما عادي بقا مفيش مشكلة المرة الجاية همشيك اد ده تسع مرات المشي رياضة بردوا :) :)
اللي يتدايق من توقعاتك يبقا مش عايز يعترف بحقيقة تفكيره ، لإنك عمرك ما بتتوقع حاجة الا اما تكون متأكد منها مش بتشم علي ضهر ايدك لا مؤاخذة :)
تعرف يا رامي من أول المقابلة لآخرها مسمعتش منك كلمة مش فاهم ، و كل حاجة بقولها بتفهمها فورا و أي حاجة بتقولها بفهمها ، عايز اكتر من كده ايه :)
لا البرد راح الحمد لله بس مفعول الدوا مش راضي يروح معرفش ليه :) :)
يسمع من بؤك ربنا ، اكون اتخلقت في الدنيا لهدف عالي دي امنيتي رغم اني دايما بتصور نفسي تحت اوي بس بقول دي نزغات شيطان...
ربنا يحفظنا جميعا...
نورتني يا رامي و دايما منورني...

Unknown يقول...

الشوكة الناعمة...
كلنا حسينا ان رامي اخونا من أول مرة اتعاملنا فيها معاه ، صعب أوي تلاقي حد يخاف علي زعلك من أقل كلمة بيقولها...
بصي مش هواسيكي ولا هخفف عنك ، بس انا شفت رجالة متسواش حاجة ، و شفت بنات تساوي ميت راجل ، ولو نفسك تكوني راجل فالرجولة بتصرفاتك الكويسة اللي بتقربك من الناس ، إنتهي العصر البيولوجي ، دلوقتي الإنسان العقلاني بيهتم بفكر الإنسان اللي قدامه و يحترمه أيا كان نوعه ، ده العصر الفكري ، لذا تأكدي اننا كلنا متواجدين مع بعض دايما طول ماحنا بنقرالك و بنتعامل مع أفكارك و ابداعك و اسلوبك الجميل و تعليقاتك الأجمل ، فقط المواجهة المباشرة تضيف عناصر أكثر واقعية بتشبع حاجاتنا البشرية للتجمع...
طبعا كل الفزلكة و الكلام الفاضي اللي قولته لا يسمن ولا يغني من جوع :) لكنه رأيي الحالي اللي بوجهه ليكي...
سلامك هيوصل بإذن الله ، ده لو مكانش وصله من دلوقت :)
انتي بتقوليلي انا ؟ :) دانا لسة كنت بقول لرامي امبارح اي لقاء مدونين مش هروحه من غيرك لإني هكون معرفش غيرك :) الكلام ده تقوليه لرامي بقا وانا وفقا لرغبته هقدر اتكلم... :)
نورتيني جدا...

Ramy يقول...

شوف يا حسنى

الحب الجميل عامله

لقاء فى اسكندرية يوم الجمعة

شوف اقلب كدة الموضوع فى دماغك

و هى عبال متنزل التفاصيل

و اظبط الدنيا

هتصل بيك أكيد اطمن عليك و على النتيجة

و نشوف نظبط الموضوع أزاى يا صحبى (:

بالتوفيق بأذن الله يا صديقى (:

Unknown يقول...

تيرز...
العلاقات الطيبة دايما بتدوم بأمر الله...
نورتيني تيرز...

Unknown يقول...

ريتشارد...
شوفتي بقا ، معرفش ليه مش عاملين فرع عندكوا ف اسكندرية ، مش لما يطل ع البحر اولي ما يطل النيل ، بس اكيد اسكندرية مليانة سواقي ثقافية بتعمل عروض زيها و احسن...
موضوع الرومانسية ف رامي مفروغ منه انا اكتشفت انه رومانسي لأبعد الحدود لكن في اطار الرومانسية بيديها حقها ، مش ماشي يسبل يعني عمال علي بطال :) :)
أنا بردوا قلت زيك كده ، المصادفات الحلوة دي عمرها ما حصلت معايا لدرجة اني افتكرت ان الدنيا مضطهداني ، بس دلوقتي عرفت ان زي ما رامي قال كل واحد ربنا مقدرله سكته ، وانا ابتديت اعرف سكتي...
ان شاء الله هانشوف بعض كلنا ان عشنا و كان لنا عمر...
رامي من أول ما شفته كان وشه حلو عليا ، أول ما روحت البيت سمعت خبر حلو كنت مستنيه من مدة...
انا دايما باخد بالي م العربيات بس الليلة دي كنت ضارب قرش كونجستال و كنت مسطول شوية... :) :) :)
نورتيني يا ريتشاررررد...

Unknown يقول...

تركيب باشا...
و الله عارف اني مقصر معاك بس و الله متلخبط و حتي حلقاتك مش عارف اسمعها لإن النت قاطع من شهر و بدخل من نت الموبايل يدوب ارد ع التعليقات ، صدقني اي تقصير مني ناحيتك هوا حاجة مش بإيدي انما انا بعزك جدا و انتا عارف كده...
نورتني يا تركيب...

Unknown يقول...

رامي...
زي ما اتفقنا بقا :)
ادعيلي ربنا يسترها معايا اكتر ما يوفقني...

Share |