الخميس، 29 يوليو، 2010

...قولي مبروووك ، و بردوا مفيش حاجة ساقعة


البت الغلسة بتاعة الشئون ، كنت دايما بكره الشباب اللي بيشتغلوا في شئون الطلبة ، جايز الكبار الواحد يستحمل بطئهم و تناكتهم عشان ناس كبار و لازم نستحملهم يعني...
و بيني و بينكم المرة دي كنت رايح وانا علي أعصابي ، طبعا مانا مش متبهدل من حلوان للجيزة سنة بحالها الا عشان اللحظة المهببة دي ، يعني لو كانت الجامعة قريبة شوية مكنتش فضلت ساعة طول الطريق بتخيل في شكل النتيجة و بدعي ربنا مشيلش مواد تاني غير الإحصا...
اللي فرسني كالعادة كل أقسام آداب (بما فيهم الفرافير بتوع قسم مسرح ) نتايجهم اتعلقت من زمن الزمن و احنا علم نفس اهم قسم في الكلية نتذل كل ده و ياريت حتي النتيجة متعلقة ، دانا لازم ادخل للشئون و افضل اتحايل عليهم اشوف نتيجتي قبل ماموت...
و عند باب الشئون قابلت واحد معايا في القسم لكن عمري ما اتكلمت معاه ربع كلمة ، بس طبعا في الظروف اللي زي دي الكل بيتآلف بطريقة لزجة و مزعجة و تطفلية...
-مش انتا معانا في القسم بردوا ؟
-آه انتا دخلت شوفت نتيجتك ؟
-آه شوفتها.
-و عملت ايه.
-اترفدت.
-الله يبشرك بالخير ، رفدوك ليه.
-عشان ساقط سنتين.
 دخلت لقيت -للأسف- كل الموجودين هما الشباب ، و من ضمنهم البت الغلسة بتاعة الشئون اللي عمرها ما بتضحك و قرفانة علي طول مني كأني داخلها وانا عندي تسلخات...
-أؤمرني.
طبعا أنا قولت ف بالي يا واد ايه الأدب اللي حل عليها ده ، لأ و بتضحك كمان ، جايز عشان مفيش زحمة النهاردة في الشئون ، أو جايز التيشيرت الفحلقي الجديد عمل شغل معاها ، المهم نشوف ام النتيجة و بعدين نشوف موضوع التيشيرت اللي كله عرق...
-عايز اشوف نتيجتي ، اولي انتساب علم نفس.
-اسمك ايه.
-حسني محمد الشحات.
فرت فرتين في الكشوف و راحت رامية الكشف ف وشي...
بصيت لكشف النتايج و دمي فار ، لقيت التقديرات مكتوبة بس ورق الكشوفات معفن و مش متصور عدل و اسامي المواد ممسوحة ، مقدرتش أعرف انا جايب التقديرات دي ف أنهي مواد بالظبط ، صحيح كان في مقبول كتير بس بردوا كان في جيد جدا في مادتين تلاتة و ده إنجاز اسطوري ف حد ذاته ، بصيت في نهاية الكشف و اكتفيت بالجملة دي...
(منقول للفرقة الثانية بمادة مبادئ الإحصاء)
ياااااااااه ، بقالي سنتين بحالهم مشوفتش كلمة منقول دي ، حسيت ان الدنيا زهزهت و احلوت مع اني خفت احسن البت الغلسة بتاعة الشئون تقولي (كل سنة و انتا طيب) و تروح مادة ايدها عايزة الحلاوة ، مانا أصلي عارف الأشكال دي كويس...
بالرغم من كده كانت دي أكتر مرة شوفتها فيها حلوة و بتضحك ، و ساعتها قلت ف بالي مش ممكن تقبل عرض بالجواز دلوقتي ؟ بس ف آخر لحظة افتكرت ان فرش الشقة ناقصه خراطة ملوخية ، و طبعا مش معقول اروح اطلب ايد واحدة وانا معنديش خراطة ملوخية بالليزر ، ميصحش...
و في محطة المترو اتصلت برامي زي ماوعدته قبل ماتصل بابويا بس كان موبايله غير متاح ، رحت باعتله رسالة عشان ابقا خلصت ضميري قصاد ربنا :) و نفضت لابويا :)
المطلوب مني في السنة الجاية بإذن الله تقدير لا يقل عن جيد عشان اقدر احول لانتظام او احول لآداب القاهرة انتظام - و هو الشرط اللي كان مفروض احققه في أول سنة لكن ربنا موفقش - لكن الحقيقة اني مهما جبت من تقديرات مش هحول للقاهرة برغم انها علي مسافة عشر دقايق من البيت ، لإني اتكونت عندي حساسية ضد جامعة القاهرة من أيام كلية دار علوم ، و لإني احترمت جامعة حلوان من أول ما دخلتها لأسباب نفسية مجهولة بالنسبالي انا شخصيا...
ركبت المترو وانا بفكر في كل التفاصيل دي ، و في الآخر سندت راسي لورا و غمضت عيني وانا لأول مرة من مدة احس اني مرتاح...
مبروك عليا النجاح...

46 التعليقات:

الحب الجميل يقول...

مبروك عليك النجاح
فين الحاجه الساقعه ؟؟؟
هههههه
الف مبروك يا حسنى النجاح ومعليش الماده تمتحنها وتعديها ان شاء الله
المهم انك عديت السنه
دمت فى حفظ الرحمن

Ramy يقول...

مبروك الأول

بس أخيرا المد لله صبرت و نُلت

هنكلم فى حكاية الساقع دى بعدين (:(:

بقى بتوع المسرح فرافير

يا عم رامى هما قريبك ولا اية

لا بس انا بحب المسرح

طيب يا عم رامى معلش

و يا مفترى حد ينسى اهم حاجة
هااا


اللى هى اية يا رامى

خراطة الملوخية

على العموم انت صاحى يا ابنى

(:

رد عليا متتعبنيش

غير معرف يقول...

داندورما
الف الف مبررووووك على النجاح
وماتحطش المادة دى فى دماغك هتعدى زيها زى غيرها....وصدقنى مش مشكله انت فى اى جامعه...المهم انت مرتاح نفسيا فبها ولا لأ...انا حصلى كده برضه ووالدى الله يرحمه اجبرنى ادخل كلية التجارة...وبعد اول محاضرة قررت احول من غير ماقوله...وعملتها وعرف بعد نتيجة اول سنه...قالى انتى مجنونه ..قلتله لأ انا عملتها قبل ماتجنن...سورى للتطويل..بس انا عجبنى قوى البلوج بتاعك وعماله ااقرا كل البوستات القديمه...ودلوقتى فى شهر ابريل..
وبجد كلهم احلى من بعض...
شكرا وتحياتى

Noha Saleh يقول...

مبروك النجاح اولا
الاحصاء دى كانت ملازمانى زى خيالى 3 سنين
بس كلية تجارة تدرس احصاء عادى
لكن غريب ان علم النفس يدرسوا الاحصاء
مدونة حلوة اوى بالتوفيق

أم الخــلـود يقول...

ألف مبروك ولكل مجتهد نصيب ربنا يكرمك ويعلي مراتبك اللهم آمين

تحياتي لك ووفقك الله

Tarkieb يقول...

مبروك يا جلدة.... يا لهوي شكلك بخيل في الفلوس زي المشاعر كمان

طالبة مقهورة يقول...

:)

الف مبروك يا سحس
ده انت كنت عاملنا حالة تأهب في بلوجر
والحمد لله جت على قد الاحصاء

الف مبروك

اه صح انا قافلة التعليقات لأسباب نفسية لأني حاليا مش بكتب لاي حد بكتب لنفسي وبس..كما ان سعات بتيجي تعليقات تفقع المرارة وانا عاوزة احتفظ بمرارتي سليمة واضحي بيها الاسبوعين الجايين..فهمتني دلوقتي؟

مبروك تاني..وطبعا بما ان مفيش بيبسي يبقى فيه عزومة غدا لكل بلوجريين القاهرة..ودول ماشاء الله ميتعدوش

الشـــــوكه النــاعمه يقول...

بجد مبروك كبيره
مش منى لوحدى ماما جنبى اهيه هى واختى بيقولولك الف الف مبروك
مش مهم ياسيدى البيبسى انا اشربه على حسابى اهم حاجه الراحه اللى انت حاسسها
طبعا لكل مجتهد نصيب
الف مبروك

MR.PRESIDENT يقول...

مبروك النجاح يا معلم
لووووووووووولووووووووووي

وسيد يا سيد .. سيد جيت احبه سيد

وهيصه هيصه هيصه هيصية سحس العريس هيصه

يله ياعم غنيتلك اهوا ان شاء الله محد حوش .

وانا مش عايز كاوزة علي قولة زمان أن عايز جمبري أو كباب شيش بانيه مش مخلي ومتسألش .

والناجح يرفع ايده هيه

مبروك والف مليار مبروك يا معلم

مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك مبروك

gogo!sf يقول...

الف مبروك على النجاح
وعقبال السنه الجايه ان شاءالله

انت مشكله بجد والله
مش ممكن انا ضحكت جدا على الصبح وده بالنسبالى صعب وانا صايمه كده

بجد اسلوبك جميل فى الحكى بس تفتكر بقى هتقدر تكمل فرش الشقه وتجيب خراطه الملوخيه بس انا شايفه انها غاليه جدا عليك لخص يا عم وابقو اشترو ملوخيه
جاهز وخلاص

مبروك عليك النجاح ويا رب دايما من نجاح لنجاح

اسيره الاحزان يقول...

مبرووووووووووووووووووووووووووووووووك الف مبرووووووووووك

بفرح اوى لما ادخل بلوج والاقى اول بوست ان صاحبها نجح

عقبااااااااااالى ياااااااارب

Silver Eyes يقول...

مساء الخير :)

الف مبرووووووك ليك
وعقبال السنسن الجاية والتخرج باذن الله
ربنا يوفقك

اول كومنت ليا هنا .. والمناسبة جميلة
يارب دايما من نجاح لنجاح

تحياتى :):)

ELMOSTAFZ يقول...

الحب الجميل...
أنا غير معترف بنظرية ان الناجح هوا اللي لازم يتخرب بيته و يجيب الحاجة الساقعة :)
الله يبارك فيكي ، أنا مش زعلان عشان شلت المادة انا متدايق عشان لو مكنتش شلتها كان ممكن اجيب تقدير جيد و احول لإنتظام ، بس محدش عارف الخير فين...
دمتي بكل خير و منوراني دايما...

ELMOSTAFZ يقول...

رامي...
الله يبارك فيك ، عقبال ما حضر فرحك :)
آه و الله صبرت ، بس هوا مش صبر أد ماهوا حب للمجال ، يعني بصراحة لولا اني دخلت المجال ده مكنتش فلحت الا بالعافية...
هجيبلك باكو لبان و تبوس ايدك شعر و دقن :)
ياسيدي ما كلنا بنحب المسرح ، بس مش كل اللي ف قسم مسرح خلاص بقوا نجوم ، معظمهم عيال رايقة و مبتسمة علي طول للحياة بطريقة تغيظ :)
متزعلش مني انا كنت صاحي بس كنت بره و صوت الموبايل واطي جدا...
منورني دايما يا باشا :)

ELMOSTAFZ يقول...

داندورما...
الله يبارك فيكي ، هيا زيها زي غيرها ، بس مش هاتعدي بعيد عنك الولية اللي بتديهالنا شرانية و تلتربع الدفعة شايلة مادتها ، ربنا يكفينا شرها :)
اللي بيدخل جامعة حلوان صعب يسيبها ، لا انتي عندك جرأة مش عندي عشان اعمل حركة مجنونة زي دي ، هوا فعلا مستقبلي وانا المسئول عنه و ده حقك انك تقرري المجال اللي هتمشي فيه ، بس مش كل حاجة في الدنيا بتمشي علي هوانا ، بس حركة زي دي احييكي عليها فيها اصرار اكتر مافيها جنون...
لا طولي براحتك انا بحب التعليقات المطولة جدا ، لسة ف ابريل ؟ يااااه دانتي لسة قدامك مشاوير :)
بس انا مبسوط جدا ان في حد معجب بالمدونة للدرجة دي ، ربنا يديم رأيك فيها و تفضلي متابعاها...
عقبال مانشوفلك حاجة حلوة انتي كمان و نيجي نباركلك...
نورتيني داندورما...

ELMOSTAFZ يقول...

آنسة نها...
الله يبارك فيكي أولا...
الإحصا بردوا هاتفضل ملازماني بسبب الدكتورة-إلهي ماتوعي البعيدة-اصلها سماوية شوية و سودة أوي من جوا ، و م النوع اللي بيسأل ف كل محاضرة عن اللي اتقال في المحاضرة اللي فاتت ، و صاحبك كان متفوق طبعا زي مانتي شايفة :) :)
المصيبة الأكبر انها عندنا طول الأربع سنين يعني المادة اللي شايلها دي هذاكرها مع غيرها لنفس الولية ، مانا لازم في كل كلية يطلعلي عفريت يسود عيشتي...
الإحصا عندنا بناخدها عشان و العينات الجماعية و العينات ، يعني لما آجي أعمل دراسة علي عينة من مجتمع معين زي بولاق الدكرور ، ممكن عدد العينة ميقلش عن أربعين مفحوص و ساعات مئات و ألافات لازم هحتاج أعمل احصائيات...
نورتيني ف أول زيارة ، و يارب متكونش الأخيرة...

ELMOSTAFZ يقول...

أم الخلود...
الله يبارك فيكي ، ربنا يجعل الدعوات دي من نصيبنا جميعا ، اللهم آمين...
نورتيني و منوراني علي طول...

ELMOSTAFZ يقول...

تركيب باشا...
الله يبارك فيك :) :) :)
لا و الله مش بخيل أوي يعني :) ، انا متوسط العطاء في كل شئ يعني لا بخيل أوي ولا كريم أوي ، بس بردوا مش هاتطولوا مني حاجة :)
نورتني يا باشا...

ELMOSTAFZ يقول...

آنسة رضوي...
الله يبارك فيكي عقبالك بإذن واحد أحد...
حالة التأهب دي شوية جنب الخنأة اللي كنت فيها ، اللي عايد أو محول زي حالاتي بيبقا في حالة التأهب دي دايما لأنه بيكون مذاكر بجد عن أي سنة و بالتالي بيبقا خايف علي تعبه...
yes, i got it now.
بس أنا غيرك في موضوع المرارة ده أنا لو وصلني كومنت كده ولا كده بقطع رجل اللي كاتبه من المدونة و من البلوجر خالص ، مانا مش مستفز أونطة :)
عزوووومة آه قولتيلي ، طب مانا اعيد السنة أسهل و أوفر :) :)
نورتيني آنسة رضوي و يا رب أشوفك حاجة كبيرة وانا عارف و متأكد انك هاتكوني حاجة كبيرة...

ELMOSTAFZ يقول...

الشوكة الناعمة...
الله يبارك فيكي ، اتفضحنا و الحمد لله...قوليلهم الله يبارك فيكوا جميعا :)
لا من ناحية هاتشربيه علي حسابك فدي حاجة مؤكدة لا نقاش فيها :)
ربنا يكرمك يا رب و ينجحك في كل خطوة ف حياتك...
تحياتي ليكي و سلامي للست الوالدة...

ELMOSTAFZ يقول...

سيادة الريس...
لو كل ريس دلع شعبه كده البلد هاتبقا فلة :) :)
ايه الفرح ده ، و ايه الجمبري البانيه المخلي ده انتا بتجيب الأكل ده من أنهي كوكب :)
الله يبارك فيك يا باشا و عقبال ماشوفك موجه بقا ، مش انتوا الترقية عندكوا بتبقا لموجه بعد كده ولا ايه ؟ :)
نورتني يا سيادة الريس و ربنا يوفقك و يوفقنا جميعا...

ELMOSTAFZ يقول...

gogo!sf...
الله يبارك فيكي ، من بؤك لباب السما...
يا رب تفضلي مبتسمة علي طول ، ليه بس هوا الضحك حرام في الصيام ؟
ايه الملوخية الجاهزة دي ملوخية دليفري يعني :) :s
انا بقول بلاش ملوخية خالص مش هانموت من غيرها يعني :)
نورتيني جوجو ف أول زيارة ، أو تاني زيارة أنا فاكر اني شفتك قبل كده :)

ELMOSTAFZ يقول...

اسيرة الأحزان...
الله يبااااااااارك فيكي و عقبالك بإذن الله...
أول بوست ايه بس امال كل الشهور اللي فاتت دي كنت بكح ؟ :) :)
نورتيني أسيرة ف أول زيارة و أول كومنت و ربنا يوفقك و يوفقنا جميعا...

ELMOSTAFZ يقول...

سيلفر...
مساء النووووووور...
الله يبارك فيكي ، اي السنسن دي دلع سنين ؟ :)
مش عارف و الله ، دانا عديت أولي و بزغرط ، يبقا يوم ما اتخرج هايجيلي تخلف عقلي م الصدمة :)
ربنا يوفقنا جميعا...
نورتيني سيلفر ف أول زيارة و أول كومنت ، و يارب ميكونش الأخير...

ELMOSTAFZ يقول...

اللي هايسيب كومنت تاني هامد ايدي عليه :) :) :) أنا أول مرة تجيلي كمية التعليقات دي مكنتش اعرف ان النجاح متعب بالشكل ده :)
صوابعي يا ناااااااس... :(

آخر أيام الخريف يقول...

مبروك الف الف مبروك ... ومش لازم ترد عشان صوابعك ما توجعكش :))))

طالبة مقهورة يقول...

ههههههههههههههههه
طب والله لانا معلقة تاني

استفزاز ممزوج بغلاسة

نفسي اعرف بقى ازاي بتطفش الناس من عندك ومن البلوجر كمان..عاوزة اخد كورس استفزاز بدل م البشرية كلها بتستفزني

وربنا يخليك يا حسني..وتسبقني انت وتبقى حاجة جامدة وانا وراك عدل

ملحوظة:مش مسامحاك ف العزومة..ده انا بدأت اجوع نفسي من ساعة ما قريب البوست..

Silver Eyes يقول...

العيب مش منى ع فكرة .. خد حقك من الكيبورد بقى :)

وبعدين اطمن ..
انا الحمدلله خلصت تالتة وجالى الضغط والقلب بس من نفس الكلية
متقلقش خالص يعنى .. :)

هههههههه
انا جيت تانى اهو
سلامة صوابعك :)

mrmr يقول...

يعنى شرط نقولك مبررررررررروك
وكمان بتشترط ان ما فيش حاجه ساعقه
لا بقه انا ح الم عليك البلوجريه كلهم علشان تعملنا حفله
ما انا فى منتهى الغلاسه اللى فى الدنيا

اقل ما فيها تعملنا حفله
شكلك كده البخل مسيطر عليك بطريقه غبر طبيعيه

على العموم يا سيدى خد دى
لولولووووووووووووووووووووووووى
دى زعروته صعيديه لو اقعت باقى سنين الكليه مش ح تسمع وحده زيها
الف مليون مبروووووووووووك أ / حسنى
معلش سامحنى جايه متأخره


ربنا يسعدك ويفرح قلبك

ELMOSTAFZ يقول...

آخر أيام الخريف...
انا قريت تعليقك امبارح بس فعلا مرديتش عشان زي مانتي عارفة كان عندي كاللو ف صوابعي :)
الله يبارك فيكي و عقبال ما نباركلك في حاجة حلوة كده ، بس وقتها متنسيش الحاجة الساقعة الله يكرمك :)
نورتيني أوي...

ELMOSTAFZ يقول...

آنسة رضوي...
بردوا شفت تعليقك امبارح و قولت بكرة هرد :) انا بشفق علي اصحاب المدونات المشهورة ازاي بيقدروا يردوا علي كل الكومنتات اللي بتجيلهم ما بالك دول ، سبحان الله أنا فرحان بكل الناس اللي جت عشان تباركلي بس انتي عارفاني مش اجتماعي ولا سبيل لتغييري :) شكلي هقفل الكومنتات زيك :)
تطفيش الزوار غاية في السهولة ، يكفي انك تكوني في غاية البرووووووووود و متخليش أي كلمة تحرق دمك مهما كانت ، هدوء أعصابك لوحده سلاح نووي ضد عدوك :)
أما لو عايزة كورسات في الاستفزاز فهتلاقي أساسيات الإستفزاز محفورة علي جدران معبد الكرنك ، اصل احنا شعب مستفز من يومه :)
أنا خلاص طريقي بدأ يتحدد من ساعة ما دخلت مجال علم نفس ، انتي لسة قدامك فرصة تقرري انتي هاتكوني ايه ، بس كل حاجة بتعمليها و بتقوليها بتقول انك في يوم هاتكوني حاجة كبيرة أوي ، أنا نظرتي مبتخيبش :)
ماشي يا ماما مانا مقولتش حاجة يا أهلا و سهلا اللي عايز يتعزم يجيب غداه من بيتهم ، و ياسلام لو يعمل حسابي معاه :) :) :) انما لو هاتفضلي مجوعة نفسك يبقا هاتستني كتيييييييير أوي و مش هاتطولي مني حاجة :) :)
نورتيني آنسة رضوي و الكومنت بعد كده هايبقا بفلوس :)

BNT ELISLAM يقول...

الف مبروك للنجاح ومدونه كتير عجبتنى تقبل مرورى





اسمحلى بالدوزم الدخول المدونه

ELMOSTAFZ يقول...

سيلفر...
كيبوردات آخر زمن :)
الضغط و القلب بس ؟ احمدي ربنا انك لسة عايشة :) و علي كل حال الواحد لما بينجح سنة ممكن يحس انه قادر انه يكمل في الكلية دي مهما كانت الظروف ، خصوصا لو كانت في المجال اللي انا بحبه...
نروتيني سيلفر و تشرفي ف أي وقت ، بس بلاش وقت الزحمة الله يكرمك :) :)

ELMOSTAFZ يقول...

مرمر...
مين قال ان الناجح لازم هوا اللي يجيب حاجة ساقعة ، دانا حتي خارج من فترة توتر عصيبة لازم تراعوا مشاعري مش تخربوا بيتي :) :)
كان غيرك أشطر :) حفلة ليه وانا جبت امتياز ؟ دانا حتي طالع بمادة ، شكلنا هانتعب سوا... :)
أهي دي تالت مرة ف بلوجر اسمع فيها كلمة أ\ حسني دي ، دا لو امي شافتها هاتفضل تضحك :)
متشكرين ع الزغروطة ، مش قصدي حاجة و الله بس أنا مبحبش الزغاريط و مبحبش الأفراح و مبحبش أي مكان فيه زحمة و دوشة كتير و ناس بتضحك عمال علي بطال :)
يا ستي ولا يهمك متأخرة أحسن من انها ماتجيش خالص ، عقبال ما اباركلك في حاجة أحسن من كده...
نورتيني بجد يا مرمررررر...

ELMOSTAFZ يقول...

بنت الإسلام...
الله يبارك فيكي و عقبالك ، يا رب تفضل المدونة عجباكي و تتابعيني دايما...
نورتيني...

mrmr يقول...

انت زعلان من كلمه استاذ
يعنى عايزنى اقولك ياد يا حسنى
ومالله انا معنديش مانع
انت ذى ابنى برضه
هههههههههههههههههه
ولا يهمك يا باشا خلى الساقع عليا وانا كمان اللى ح افرقه على الحبايب
عقبال ما افرق الساقع بتاع جوازك


ممكن اقولك كلمه محشوره فى زورى
انت سعات فعلا بتكون مستفز يعنى اخترت الاسم على مسمى
سورى يعنى
متزعلش
بس صوره تعريفك والاسم على مسمى
بالرغم انى حاسه ان الطبع غير كده خالص مش عارفه احساسى صايب ولا خايب
واخيرا اقولك
الخلاف فى الراى لا يفسد للود قضيه
مش كده ولا ايه
اوعى تكون زعلت
تحياتى
ومبروووووووووووووووووووووك

ELMOSTAFZ يقول...

مرمر...
اصل انا ليا الف اسم اللي يقولي يا حوكشا و اللي يقولي يا سحس و اللي يقولي يا هباب :) محدش قالي أستاذ حسني دي ف يوم غير بتوع خدمة العملا و ناس قلائل ، ساعات بخاف احسن تكون شتيمة وانا مش واخد بالي :)
طب كويس انها جت من عندك ، طول عمرك صاحبة واجب يا مرمر :)
الكلمة المحشورة ف زورك مزعلتنيش بالعكس دي خلتني ف غاية السعادة :) ده معناه ان ميكانيكية الإستفزاز عندي لسة شغالة ، متخافيش طبعا انا مش طبعي كده علي طول أنا أوقات تلاقيني مستفز و أوقات تلاقيني غاية في الاحترام و الهدوء ، بس الأيام دي فرحان بالنتيجة فتلاقيني مش مظبوط ، يعني حبة هادي و حبة مجنون :)
آه طبعا كده و نص ، الخلاف في الود لا يفسد للرأي قضية :) ربنا مايجيب خلاف انا مش باخد في بالي أي كلام يا مرمر انتي خلاص بقيتي واحدة من عيلتي التانية هنا ، يعني مفيش داعي للأسف و الأستذة و الرسميات الرخمة دي...
الله يباااااااااااارك فيكي و عقبال ما اباركلك في حاجة احسن من كده الف مرة...

mrmr يقول...

كده انت اطمنت على نفسك ان الاستفزاز شغال لسه
وانا السبب فى التاكيد ده
يبقى ليه عندك حاجه ساعقه دى على جنب كده من غير ما حد يعرف لحسن تلم البلوجريه كلهم علينا ويطلبوا الساقع منك عصب وتضرر
على رأى اللمبى
وجميل ان شخصيك ذى الكوكتيل ده معناه انك شخص سوى
ودى حاجه تطمن

مرسى قوى لزوقك وربنا يديم المحبه

mic يقول...

جامدة جدآ المدونة بتاعتك ديه اتمنى نكون اصدقاء وكمان حبيت اقولك انى متابع مواضيعك كلها والصراحة جامدة جدآ

ELMOSTAFZ يقول...

مرمر...
اللمبي كان بيقولها (غصب و اقتدار) :) :) صحيح صدق اللي قال الصعايدة دماغهم ناشفة و محجرة :)
طب مانا سوي هوا حد جابلك سيرة اني بنكش شعري و بكلم صباع رجلي الصغير :) :)
نورتيني يا مرمر و منوراني دايما...

ELMOSTAFZ يقول...

Mic...
سعيد ان المدونة عجبتك ، و ان شاء الله نكون اصدقاء و أكتر...
نورتني مايك...

Tears يقول...

مش عارفه اقولك ايه بس استغربت انك بتصف قسم المسرح بالفرافير و كأن هذا شىء تافهة او سهل و هو على العكس

كمان مش فاهمه على اى اساسا ممكن تقول ان القسم اللى بتدرس فيه اهم قسم...مش حاسس بشبه عنصرية و استعلاء كده؟

دعنى احدثك بصفتى أحد اعضاء هيئة التدريس فى الجامعة و اقولك ان كل الاقسام مهمة و الا ما كانت من الاساس و برضة كل الكليات مهمه و مش صحيح ان الهندسة اهم من الزراعة لان لولا المهندس الزراعي ما كانا لقينا نأكل من الاساس

انت مثقف و اكيد بتفكر بشكل منفتح و قد يكون التعبير خانك او انا التى لم افهم جيدا

مبروك نجاحك

دمت بخير

ELMOSTAFZ يقول...

تيرز...
أولا حمدلله ع السلامة بقالنا كتير مش بنشوفك...
لأ الشهادة لله هيا مش ذلة لسان ولا حاجة ، و لو فرضنا اني مثقف فده مش معناه اني معصوم من الخطأ ، لإني لو كنت ف قسم مسرح و داخله عن حب و رغبة في مجاله كنت هقول علي طلبة علم النفس قسم فرافير بردوا ، الموضوع ده بنسميه عندنا ف علم النفس (خطأ إدراكي) و ده سببه اني بحب المجال اللي بدرسه أوي و بتحيز له دايما من وسط كل المجالات بل و بدمجه فيها بأي شكل ، لإن ف رأيي علم النفس له دور هام جدا في كل المجالات اللي بيمارسها البشر ، لإن أي عمل بيتم من الإنسان و للإنسان اللي هوا موضوع دراسة علم النفس...
ده غير اني دايما بلاقي بتوع مسرح بيحضروا معانا محاضرات في المواد السهلة اللي عندنا فتلاقيني خدت فكرة خطأ و عممتها علي منهجهم كله...
الله يبارك فيكي و عقبال ما اباركلك ف حاجة احسن من كده...
منوراني دايما تيرز...

dodda يقول...

10000مبروك
الذ حاجه فى الموضع
انا فرحانه زى ما اكون انا اللى نجحت
مع انى اول مره ادخل عندك!!
ربنا ينجحك علطول

ELMOSTAFZ يقول...

dodda...
الله يبارك فيكي ، طب يا ستي ربنا يجعلها بجد و تنجحي و نيجي نفرحلك و نباركلك...و نشرب الحاجة الساقعة :)
أول مرة و ربنا ما يجعلها آخر مرة...
نورتيني...

اسيره الاحزان يقول...

سورى انا كنت اقصد اخر بوست موجود يكون نجاح

يلا انا كمان نجحت الحمد لله :D:D

Share |