الأحد، ٥ سبتمبر ٢٠١٠

إعرف حجمك...


الفيديو ده كان نفسي من زمان انشره ، لإنه بجد أذهلني لأقصي حد و عرفني حجمي في الكون ، لا شئ...
عايز بردوا أشكر كل المدونين الأعزاء اللي قدمولي تهنئة امبارح بمناسبة عيد ميلادي بجد يا جماعة خليتوا لليوم طعم مختلف جدا ومميز ، و مش هاشكر أخويا رامي علي البوست اللي كتبه امبارح و الكلام الجميل اللي قاله لإن الإخوات مفيش بينهم شكر ولا أسف ولا رسميات مكلكعة...
 هوا الحقيقة عيد ميلادي الفعلي يوم تلاتة تسعة ، بس انا بحب امشي حسب ما ابويا زور في شهادة ميلادي و خلاها خمسة تسعة معرفش ليه... :)
بردوا بعتذر لجميع المدونين الأعزاء اللي اتأخرت ف ردي عليهم و اللي مرديتش عليهم أساسا ، أنا أول مرة أعملها يا جماعة صدقوني بس حكم القوي ، قريب بإذن الله هرجع للبلوجر و للمشاركة في المدونات...
متشكر جدا ليكم و ربنا يديم المعروف...

17 التعليقات:

mrmr يقول...

اولا انا لسه ما شفتش الفيديو
وثانيا انت قلت مافيش شكر بين الاخوات ولا اسف
يبقى ما فيش داعى اللت والعجن الكتير
ياللا كل سنه وانت طيب
عيد ميلاد سعيد
اروح الشوف الفيديو وابقى ارجع او مرجعش حسب ظروفك بقى
سلام يا سحس

Alice يقول...

Happy Birth Day
لأ الانسان مش لا شئ ده حاجة كبيرة بانه قدر يستوعب العالم كله من حوله فى عقله .. فى ناس معارضين للاسلام او مشككين حاجة زى كدة كانوا بيقولوا حاجة مضمونها ان الانسان ولا حاجة من الكون ده كله فليه ربنا بيحاسبه حساب عسير فى الآخرة انه كائن مهمل ضئيل وسط الكون ..الرد انحنا مكانتنا كبيرة اوى عند ربنا كفاية ان ربنا امر الملائكة انهم يسجدوا لسيدنا آدم
بس معلش على الاطالة

Ramy يقول...

حسنى

أزيك يا باشا كل سنة وانت طيب

دى حاجة بسيطة صدقنى

و لا تعتذر و لا تشكر احنا بنقدر اكيد فى حاجة معطلاك

بس انا قلت الدور اكيد خلص بس تقوم بالسلامة يا باشا أنشاء الله (:

Ramy يقول...

الفيديو بقى جميل جدا

انا شفته قبل كده بس كان موسيقى بس كان مفهوم صدقنى

اللى فاهم جسمه يقشعر


(:

رمضااان كريييييم (:

غير معرف يقول...

كل سنه وانت طيب يا حسنى
ربنا يدمها عليك سعاده

هرجع للفيديو تانى
دمت بخير

Tarkieb يقول...

كل سنه وانت طيب

داليـ ـ ـ ـ ـ ـ ــــا يقول...

طبعا الفيديو مش ظاهر عندى اصلا مكان حتة كده بيضا
النت سوباد عندى
بس عندى فضول اعرف الفيديو ده إيه ؟؟؟

كل سنه وانت طيب ياسحس
عيد ميلاد سعيد وعمر مديد
اتمنا لك عربيه بليكار
وشقه من غير ايجار
وعروسه بتحب الضحك والهزار

سلام بقه
كفايه عليك كده
وقتك انتها

Noha Saleh يقول...

كل سنة وانت طيب
الانسان ربنا كرمه بالعقل علشان يقدر يشوف ويميز كل الحاجات اللى حواليه ويعرفها علشان يقدر يحمد ربنا ويشكره ويعبده ويقدر نعمته
كل سنة وانت طيب مرة تانية

Rana يقول...

الفيديو جميل:)

و هابي بيرث داي

وبالمرة عيد سعيد.. خلي هابي نيو يير بعدين :D

Unknown يقول...

مرمر...
ماهو مفيش شكر بين الإخوات ولا أسف ، بس أنا بخاف بردوا ان ناس كتير تزعل مني فباخد إحتياطاتي لإني لسة معرفش بيفكروا ازاي ناحيتي...
و انتي بألف خير يا مرمر...
نورتيني أوي و يا رب الفيديو يكون شحنك...

Unknown يقول...

اليس...
كلامك مقنع و الله ، بس الواحد لما بيفكر كده ميقدرش يتصور ان الكووووون ده كله بمجراته و نجومه و كواكبه و كل ده لمجرد ان الإنسان يتأمل فيه و بس ، أكيد ربنا ليه حكمة أكبر من كده و أكيد في مخلوقات غيرنا ف الكون...
انا مش بتكلم من الناحية الحجمية ، لما الأرض اختفت من أول خمس ثواني في الفيديو ، هل ممكن تتخيلي الواحد مننا بيشغل مساحة أد ايه من الكون ؟ يعني الإنسان بالنسبة لكل ده لا يقاس أصلا ، و مع ذلك تلاقيه بيتكبر و بيعصي ربنا...
بجد نورتيني أليس...

Unknown يقول...

رامي...
بلاش انتا يا رامي تتكلم عن الشكر و الأسف انتا ماشي بتتأسف لنفسك أساسا :) :)
الدور خلص الحمدلله و بقيت كويس...
الفيديو ده انا شفته علي إقرأ وقت عرضه علي طول ف رمضان اللي قبل اللي قبل اللي قبل اللي فات :) ، بس قلبت عليه النت بعد كده عشان اشوفه تاني معرفتش ، و متتصورش مدي سعادتي اما لقيته ، و كل مرة أشوفه فيها كإنها أول مرة ، بتجيلي حالة ذهول لما بحاول أتصور المسافات و الأحجام الخيالية دي ، حاجة تطير العقل...
كل سنة و انتا بألف صحة و سلامة يا رامي...
نورتني يا باشا :)

Unknown يقول...

الحب الجميل...
و انتي بألف صحة و سلامة يا حب...
ربنا يدمها عليكي حب...
نورتيني أوي...

Unknown يقول...

تركيب باشا...
و أنتا بألف خير و صحة و سلامة ياااارب...
نورتني يا باشا...

Unknown يقول...

آنسة داليا...
فاتك نص عمرك ، حاولي تشوفيه ف أقرب فرصة...
ايه البليكار دي عمري ما سمعت عن ماركة بالإسم ده :)
شقة من غير إيجار ؟ هقولك ايه مانتي متخصصة أحلام مستحيلة :) :)
عروسة بتحب الضحك و الهزار أهي دي اللي ربنا يبعدها عن طريقي ، أنا عايز واحدة جد و كشرية عشان اعرف اتفاهم معاها :) :)
نورتيني يا آنسة داليا و متشكرييييين أوي علي أبو الفصاد :)

Unknown يقول...

آنسة نهي...
و انتي بألف خير و صحة و سلامة...
كلامك صحيح ، مع ان اللي الفيديو بيتكلم عنه يخلي الواحد مننا يستتفه مشاكله الدنيوية اللي بيحاول حلها و يستتفه نفسه لما يعصي خالق كل ده ، المقارنة لوحدها تخلي الواحد يحس بأد ايه هوا ضعيف...
نورتيني آنسة نهي...

Unknown يقول...

آنسة رنا...
لو عجبك الفيديو فعلا هتلاقي زيه كتيييير ع اليوتيوب...
مش فاهم انتي جمعتي كل الأعياد ف نفس واحد ايه الكروتة دي :) :)
نورتيني آنسة رنا و عيد سعيييد...

Share |