أيها السااااااااااااااااااااااااااااااااادة المدونين ، ازيكوا عاملين ايه :)

الفكرة جاتلنا من يومين أنا و أختكوا الشوكة الناعمة ، و نظرا لإننا بقالنا فترة ف فريق إعداد راديو إحنا ، شطحنا بخيالنا حبتين ، أنا اللي شطحت بصراحة بس شوكة صححتلي المسار :))

في البداية قولت ليه ميكونش لمدونين مصر راديو ع النت زي راديو إحنا أو راديو تيت ، كل الإختلاف ان الراديو ده يكون مخصص للوسط التدويني سواء بلوجر أو تمبلر او ووردبريس أو مكتوب ياهو...

مجتمع المدونين مش صغير ، و مش هين ، إحنا بنعمل حاجات كتير لازم الناس تعرفها و تتعلم منها ، فبجانب ان احنا بنكتب وجهات نظرنا المتباينة تجاه كل حاجة بتحصل حوالينا ، إحنا بنعمل لقاءات تدوينية ، و تبرعات خيرية ، و في مدونين بيحولوا مدوناتهم لكتب ، إحنا مش بنشارك في المجتمع من ورا شاشات الأجهزة بس ، إحنا بنشارك وجدانيا و عمليا ، إحنا مجتمع نشط لكن قليل جدا اللي يسمع عنا أو يعرف يعني ايه تدوين...

عشان كده حسيت ان لو في وسيلة تسهل الإتصال اكتر بين المدونين زي الراديو ده ، مثلا نعمل برنامج نستضيف فيه كل حلقة واحد من المدونين نعرف الناس بيه و يحكيلنا علي حكايته مع التدوين بدأ ازاي و عمل ايه ، نعمل نشرة أخبار تدوينية نفكر بيها الناس بمواعيد اللقاءات بتاعة التبرع بالدم او مواعيد البوءجة و دي طبعا استاذ خالد همس الأحباب هايمدنا بمواعيدها... :))

حد من المدونين مثلا ربنا كرمه و عمل كتاب نقول علي معاد حفل التوقيع ، و حاجات تانية كتير...

لكن طبعا زي ما قولتلكوا أختكوا شوكة ادتني شلوط في أحلامي الشاطحة و قالتلي علي فكرة معقولة أكتر لإننا معندناش الوقت ولا المجهود ولا الصبر بصراحة لإدارة راديو ع النت ، عشان كده قولنا نبدأها برنامج علي راديو إحنا يضم كل الأفكار دي في شكل فقرات...

الفكرة هانعرضها بإذن الله علي سلطان باشا المانجر بتاعنا :) ف ميتنج فريق العمل الجاي بعد الامتحانات بإذن الله...

بس قبل كل ده حبينا نعرض الموضوع عليكوا و نشتشيركوا عشان كل واحد من السادة المدونين يقول تصوره عن البرنامج ازاي أو لو عنده فكرة كويسة نضيفها للبرنامج ، كده يعني... :)

عشان لما نيجي نعرض الفكرة يبقا عندنا أساس نبني عليه المصادر اللي هانستمد منها إعداد البرنامج...

البوست ده آخر بوست هاكتبه لحد يوم 20/6 آخر يوم ف امتحاناتي ، و كتبته دلوقت عشان لو فضلت الفكرة ف دماغي من غير ما اطلعها هاتعملي قلق وسط المذاكرة و مش بعيد تعمل خرم في دماغي و تبظ منه... :))

أشوفكوا علي خير دايما يارب و ادعولي من قلبكوا...